火金蛄來食茶

作者：蔡天享

「火金蛄，來食茶，茶燒燒，配弓蕉，茶冷冷，配龍眼，龍眼ē開花，匏仔換冬瓜，冬瓜好煮湯，匏仔換粗糠，粗糠好起火，九嬸婆--ā gâu炊粿，炊kah臭火ta兼to̍h火！」台大昆蟲學系楊平世名譽教授起頭就先教tsit條唸謠，在場ê囡仔大細tuè-leh唸kah喙笑目笑，也歡喜，也學著tuì日本時代百年來，有關台灣火金蛄研究ê歷史、生活環境、發光kap保育ê智識。

日人時代注重ê研究是火金蛄有佗幾種，二次世界大戰了後到1990年，無啥新ê科學發現，suà--落-去三十冬到tann，台灣本土學者拍拚有相當ê進展。台灣火金蛄攏總有63種，一生大概有四个階段：卵（十日）、幼蟲（十月日）、塗豆仁（七日）hām火金蛄（十五日）。公--ê kap母ê火金蛄配種了後，母ê火金蛄kā卵放tī澹溼ê塗岸仔--裡，孵做幼蟲，愛食螺仔kap杜蚓，suà--落變塗豆仁，tsiânn禮拜後就變做閃閃sih-sih ê火金蛄--ah！

土地開發致使都市罕得看著火金蛄，真濟有志拍拚做生態水池beh kā復育，挖窟仔、做塗岸、放清氣水、種花草、放螺仔、煞尾tsiah囥火金蛄幼蟲入--去，hōo in有thang食koh有閘遮歇睏ê所在，bē去hōo蝦仔、南洋tāi仔(吳郭魚)iah是田嬰ê幼蟲（『水蠆』）食--去，thìng好生湠，庄跤種作ê田園mā ài有仝款ê觀念kap做法。

近來tsit一二十冬，逐家新興tī清明過了，sio招去遊賞火金蛄，有ê去就近ê公園，有ê趁歇睏日去庄跤，蹛民宿，享受火金蛄閃sih恬靜ê暗暝，親像天星bih落來草埔仔hit一樣，大人囡仔lóng歡喜。比論講台北木柵公園ê萃湖kap虎山ê虎山溪、台中東勢林場iah是嘉義阿里山，lóng是出名走揣火金蛄ê好所在。火金蛄結合生態遊覽，連帶提昇在地農產品買賣hām文化交流，有影是「一兼二顧，摸蜊兼洗褲。」

雖bóng bē少專家kap民眾有teh注重保育火金蛄，m̄-koh iáu是拄著bē少問題，特別是田岸hām溝仔khōng紅毛塗kap作穡人thāu農藥，所引起ê棲息地破壞，若beh kā火金蛄生湠ê環境顧hōo好，就bē-sái得汙染水質、ài做塗岸、種本土花草，推廣生態遊覽mā ài控制人額，mài siunn kā攪擾，全面來配合，tsiah有永續ê火金蛄生態，lán ê囝囝孫孫tsiah ē-tàng ná看火金蛄飛來手--裡ná唱「火金蛄，來食茶，茶燒燒…」。

編按：本文是4/19「棲地復育台語講座~火金蛄來食茶」講座摘要記錄。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃十場有關生態環境議題ê台語講座，歡迎逐家tī逐個月第三禮拜五暗時七點到九點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。

棲地復育台語講座專欄，本文使用教育部推薦漢字kap臺灣閩南語羅馬字拼音方案。

台文通訊BONG報302期，2019年5月出刊。

--------------------------------------------

歡迎捐款贊助　李江却台語文教基金會　（捐款thang抵稅，匯款了後請通知02-23112199）

線上捐款(定期定額) https://ppt.cc/fF5bhx

線上捐款(單筆) https://ppt.cc/fcycox

有固定的長期捐款， 讓更多的台語文相關計畫可以穩定的推行，感謝逐家。

郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會

李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。