編按：本文是7/19「棲地復育台語講座~咱ê海邊咱ê厝邊─環島海岸健行看著美麗佮哀愁─講座摘要記錄，主講者是中華大自然教育協會邱慶耀講師。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃十場有關生態環境議題ê台語講座，歡迎逐家tī逐個月第三禮拜五暗時七點到九點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
中華大自然教育協會講師邱慶耀做自然環保志工有30外冬--ah，伊自13歲做囡仔ê時，就tuè師傅做印刷，lóng蹛tī山頂，m̄ bat看過海是生做圓iah是扁。有一回，師傅tshuā伊去台北縣八里海墘仔tshit-thô，伊tsiah初次bak著鹹澀ê海水，ná搧秋凊ê海風ná huah講：「Tse就是海--ooh！Suí kah哭爸！」邱老師koh講lán台灣長期戒嚴ê關係，海tsiânn做守衛台灣ê軍事界線，一般人bē-sái凊彩行跤到，久--來就變做對海tsiânn生疏。因為生疏，所以對海有真濟誤解；因為生疏，對海就無太深ê感情。若beh kā lán對海洋ê疼thàng揣--tńg-來，第一就是ài去熟sāi--伊，有心beh接近--伊是上要緊--ê。
一二十冬來，慶耀老師tshuā有志kōo行--ê，去認bat台灣四箍圍ê海岸，行過沙埔、石頭仔山坪kap打馬膠路，用心愛台灣。伊看著大自然ê美景，mā看著人工破壞ê傷痕。譬論講，宜蘭以往有一个頭城海水浴場，百年來，熱--人ê時，是厝邊隔壁kap朋友弟兄sio招去sńg水、搧海風kap拍lā涼ê海埔，1990年代以來，為著beh發展漁業kap商業，政府tī浴場北爿面起造烏石港，所khōng ê駁岸阻擋海沙流來浴場，致使海沙埔原底ê沙仔hōo海湧一sut仔一sut仔沖徙去外海，無沙thang補--入-來，海水順勢食入來庄頭。鄉親為著beh護庄，suah就ài sì-kuè tàn肉粽角hām大khian石頭來擋海水，天然ê海沙埔美景就án-ne來變做無情ê紅毛塗岸，tsiah短短--à 30冬niâ，就規个走精變款--去--ah。Tsit號人做得來，拍歹自然環境ê代誌that倒街，已經無--去ê雲林三條崙海水浴場hām恆春半島ê加洛水風飛沙就親像án-ne。
天然環境損害了後，在地ê生態也tuè leh無--去，môo-khî-á（毛蜞仔）hām海龜失去食si̍t、jia-tsa̍h kap放卵做siū ê所在，in就bē koh來tsia生湠，若m̄是sì-kuè走揣生路，無，就是孤毛tse̍h種。邱老師se̍h過規台灣ê海岸，雙跤行、目睭看、耳仔聽、鼻仔鼻、手骨摸，更加是用心去感受，伊鼓勵lán hām大自然做朋友，培養觀察kap欣賞ê本事，tsiah有法度發見美麗ê母親台灣。
彰化Ông-king（王功）ê海墘仔出名飼蚵仔，當頭白日ê時，海湧滾絞，沖著沙埔ê石頭，激起一phō一phō大大細細ê水pho，一般人行leh過，bē倚去kā看，邱老師ē ku落去欣賞。拄激--起-來ê水pho，水kânn khah濟mā khah細型，是透明無色--ê，過一時仔，pho變大變薄，日頭光tshiō落到tè，變化做七彩--ê，閃閃sih-sih，tng-teh好看ê時，一下手就破--去--ah！Tī tsit十外秒仔ê水pho小世界，老師講kah是歡頭喜面，喙角全pho，tsit時電火照著老師ê喙pho，也是金光七彩--ê！Tsiok想beh tuè伊去走讀台灣tsiah-nī仔suí ê海岸。
Tsit kái演講也有講著海邊無仝天時ê風聲kap水影ê交插變化，以及植物hām動物tī變化多端ê環境內底，beh按怎樣來生存；也有頭殼額仔包pōo-kin，tī路邊huah賣菜蔬老阿媽ê人情故事，展現--ê是人tī台灣海岸走跳，用心交陪hām歡喜分張ê疼心。後kái lán若出外去遊賞，ài ē記--得：「顧行路ē失覺察，ài ná停--leh，tsiah有好光景！」
#棲地復育台語講座 專欄，本文使用教育部推薦漢字kap臺灣閩南語羅馬字拼音方案。
台文通訊BONG報305期，2019年8月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
