作者：游玉雯
自細漢，lóng是阿媽leh照顧我kap兩个小弟。Tī我ê心內，阿媽bē輸是布袋戲內底kau-tshiâng大漢、功夫厲害ê武林高手，跤手liú-lia̍h，啥人kap伊比。逐工天bâ霧仔光，阿媽就ē起床，kā厝--裡kap尪架桌piànn清氣了後，伊ē先燒香拜拜，tsiah-koh念經，kap佛祖講心內話，suà--落去tshuân早頓，無閒tshih-tshih。我tiānn-tiānn踮阿媽ê邊--a tuè前tuè後，tsiânn細漢就ē-hiáu掃塗跤、洗碗、洗衫、kap阿媽去買菜，m̄-nā án-ne，我mā ē kā阿媽tàu煮食。
「民以食為天」，見擺若是講著食，我ê喙瀾就流bē煞。便若聽著阿媽tī灶跤leh tshuân煮食ê聲，我tsit个水跤仔就ē緊倚去tàu-sann-kāng兼偷ni！Ē記得阮阿媽——「阿柑師」教--我ê第一出菜是煎卵包。阿媽講：「Mài看tsit粒卵包無點，若想beh煎hōo suí，是有撇步--ê--ōo！」講煞伊就開火，kā油倒tī鼎底，等油熱，隨khà一粒卵落--去，「tsh」--一-聲，有夠好聽。阿媽講ài小等--一-下tsiah ē-tàng kā卵píng爿，兩爿煎hōo赤赤，卵包tsiah ē好食。
講--起-來真簡單，做--起-來tsiok困難。拄仔開始，我tiānn-tiānn kā卵煎kah破糊糊，koh參卵殼做伙哺，實在tsiok làu-khuì。阿媽kā我講：「萬事起頭難，你m̄-thang做粿無包餡--neh！Ke煎--幾-遍就好。」伊ê鼓勵hōo我koh-khah拍拚練習，有一工，我總算煎好一粒suí-tang-tang ê卵包，lām一寡仔豆油，té一碗飯，我hām阿媽你一喙、我一喙，媽孫仔兩个人愈食愈kah意，kap阿媽學煮食實在tsiânn趣味！
就án-ne，我就開始tsiânn做阿媽ê水跤仔。洗菜、切菜、tshuân配料；hē糖、hē鹽、試鹹tsiánn；洗碗、phâng菜、逐項來。我上愛kā阿媽tàu puān油飯，因為阿媽食老khah無力，見若kā芳貢貢ê油湯炒好，伊就huah我來tshiau。照阿柑師ê標準，逐粒tsu̍t米lóng ài食著油湯，bē-sái有白蔥蔥ê飯粒。論真講，我一个囡仔phí，哪有才調kā油飯puān kah偌tsiâu勻，所致我tshiâng-tsāi ná puān ná看，若看著白白ê tsu̍t米飯，就提起來that入喙。無疑悟阿媽看--著mā無罵--我，kan-na笑笑仔講：「Tann我炊十斤米，你是beh先食幾斤？」阿媽leh滾sńg笑，我是歹勢kah見笑死。
時間ná親像飛行機，siuh--一-下，30冬過--去，阿媽早就tī天頂做仙--ah，我tsit个水跤仔mā已經出師--ah！不而過，我tiānn-tiānn ē siàu念細漢做水跤仔ê日子。每一工功課寫好了後，kap阿媽tsiú踮灶跤學煮食，講笑詼mā講心內話，hit段熱hip-hip ê日子，tī我心內，永遠是溫暖koh幸福ê記持。
