作者：陳榮廷
踏話頭
食老tuè序細走？我現此時kap老某，一半時間蹛tī三峽查某囝ê厝。「兩房一廳」是狹tsinn-tsinn，實在無啥ē得伸勼；不而過，若落樓跤，我就ná生龍活虎。中晝食飽無事做，就行路去khah無兩百公尺遠ê圖書館度日子仔，tńg來順路行tsiūnn大樓邊--a ê小公園仔，看各色ê人，ná聽日本歌ná lim紮--去ê咖啡；暗時仔，等老某厝內收煞好勢，就落樓行去另外過馬路ê龍學公園，tī hia跤幌手動了，順suà行過幾个青紅燈去鮮果大賣場買寡水果tńg--來。一日固定ê時間tī tsia lōng-liú-lian。若有朋友來sio揣，我ē得tshuā路liu-liu去，享受快樂ê三峽大學花園城ê老人生活。
學府理想現代化ê大學花園城
粉鳥--ê kap澤文兩个高中同學，阮約11/2 hit早起10點tī祖師廟sio等。阮行過三峽歷史文物館，iáu有se̍h去收藏古早三峽獨有ê產物「藍染布」ê藍染展示中心。粉鳥兄一向對古城文物有深入ê了解，感心伊一路喙無停睏ê導覽。一日遊了，阮沿路出喙問出名ê東道牛排tī佗？揣到位，人今仔日歇睏，阮目睭金金人傷重，只好tshu入去tī路頭ê越南店，凊彩食一个粗飽。
回程，沿beh坐公車ê路線，uat去查某囝蹛ê萬寶隆社區se̍h一輾，看著tīnn滿滿ê樹欉kap花蕊交叉ko纏tī一棟一棟大樓ê四箍圍。有曠闊透天三、四百坪ê空間，十字通路lóng真大條，no car no motor，tsia ná像運動場，真好勢tsiânn做細漢囡仔ê tshu冰場，mā tshiâng-tsāi有跳舞--ê、拍太極拳--ê、猴囡仔lu skate--ê，tsia一tshok hia一tshok。Hit下晡，阮就拄著一寡細細漢囡仔人，in爸母有ê徛--leh、有ê坐tī石椅頂，lóng注目看in細漢囝tī hia騎跤踏車、lu skate se̍h來se̍h去，幼tsínn天真、sì-kè衝，隨意ê huah聲，siânn阮沿路相hip bē煞。
阮beh行去台北大學ê正門口公車站坐車進前，我特別手kí按學校正門口ê頭前，hit八條直排直通ê大路，看--去是四條hōo車行，賰ê四條，m̄是過路人kap跤踏車行ê路，就是規排規排樟仔ê樹欉kap紅花綠葉ê花園。Tsia就近有幾若棟，以大學名徛頭ê大樓社區：「大學京都、大學風呂、大學耶魯、大學劍橋、大學哈佛……」；甚至in kā「大」kap「學」tsiânn做徛頭ê路名，有「大學路、大德路、大義路、大雅路……」等；有「學府路、學成路、學勤路、學士路……」等。可見，in kā大學學府理想價值ê因素，tsiâu囥tī起造tsit座大學花園城ê規畫--裡。
阮蹛ê大樓社區，kap tsia-ê大學大樓社區近鄰隔壁。阮tsia，幾跤步遠就是一个小公園仔，莫怪，in講阮tsia是「大學花園城」。有一擺大學同窗會拄著培鎰兄，講伊mā蹛三峽台北大學附近。就án-ne，我若過來三峽蹛，阮就sio招tī Seven超商店口倚路邊ê桌仔，坐tī hia lim規晡ê咖啡。伊講三峽鄰近ê山區有幾若tah真好peh山、健行，有啥mih鳶山步道、大板根步道、北插山步道、滿月圓森林步道。過去有真濟同學拜六禮拜lóng ē來tsia peh山，可惜現此時，逐家有歲--ah，跤骨lóng無啥ē-sái peh-kuân-peh低。
宜人宜居ê大學花園城
來三峽一段時間了，早暗拍拚行m̄ bat行--過ê街路，tsiah知公車ê起落站tī佗，tsiah知無三百公尺，就有鮮果大賣場、家樂福、超商、圖書館、兩个小公園仔、各式ê餐飲店。特別是tī學成路大彎角路邊，hit棟樓跤是台糖蜜鄰超商ê大樓，遠遠就看著「日本の味ここにあり」ê字幕，廣告第四樓層ê くら壽司。逐擺我ē假gâu，koh kā老某解sueh一遍：若想beh食著日本人口味ê料理，就來tsia。Tsit棟大樓五、六樓是北大真理堂教會，疫情進前ê禮拜日，阮老某kap查某囝lóng tī tsia出入。三樓是有名ê西堤牛排、二樓是城市綠州專賣運動器材。大樓樓跤ê電梯口邊--a，有設開放24小時ê便所，規暝光iānn-iānn tshiō到外口路面來，suah tsiânn做我beh去掃街路進前，tshiâng-tsāi愛去ê所在。有想著老人尿緊ê方便，遠雄建設趙董ê功德無量。
每兩、三工tuè老某去老街買菜，tsiah知影文化路ê老街頭，hia有兩、三條大街路ê店頭tsiâu是市場。拜一掠外，人山人海，tshap雜、hán-huah ê叫賣聲，鬧熱滾滾。蹛都市化ê城市，公車坐十外分鐘，就ē得到舊街買日常ê食si̍t、ē得去區域性ê大病院看病，koh有ōm-ōm ê樹ńg跤，thìng好坐leh lim咖啡。有圖書館hōo人看報紙、讀雜誌，有幾跤步就行到位ê小公園仔，hōo人坐leh看牽狗仔--ê、sio牽手ê查埔查某囡仔，mā有一寡老歲仔hōo外勞sak來tsia曝日頭--ê，iáu有親像我，tshiâng-tsāi tī tsia聽YouTube放ê歌，tī tsia tuh-ku做眠夢。
文化遺產、精神導師、大學花園社區
有兩百幾年ê三峽祖師廟kap李梅樹紀念館，隔一條三峽河niā-niā。In有一个傳奇ê故事，講國寶級ê台灣第一代畫家李梅樹教授，伊m̄-nā彩繪三峽、koh用盡伊一生ê khuì力，修建祖師廟tsiânn做東方藝術殿堂。若坐新北市ê公車，逐擺lóng ē放hit塊李梅樹教授教學生畫圖、翻修祖師廟ê影片，hōo你看規路，講in三峽人上驕傲ê彩繪人文ê故事。若beh講祖師廟是三峽人ê文化遺產、李梅樹教授是in ê精神導師，若án-ne，起造台北大學附近ê大樓區tsiânn做美麗有人文氣質--ê、適合安居ê大學花園城社區聚落，三峽人實現in學府價值ê理想。
大學花園城是老歲仔人ê好徛家
初初來蹛三峽，ē用得蹛tsia ê 16樓「兩房一廳」，來比phīng阮蹛彰化下廍仔透天ê庄跤厝，講khah誇口ê話：阮兜ê便所就kiōng-beh比tsia ê房間khah大。起初感覺蹛tsia無彰化sù-sī，無啥慣勢，哪ē知，tsia̍p來三峽、tsia̍p se̍h街、tsia̍p行路，tsiah知影大學花園城社區是好徛家。Hit工粉鳥--ê kap澤文兩兄來三峽tshit-thô，我驚家己世面行無透，看in sio拖leh hip，tsiah細聲問in講：「Lín看kám iáu有別位，樹欉、花草tsiah-nī茂盛，koh hōo人感覺tsiah-nī曠闊ê大樓社區？」澤文兄講：「Lín tsia是花園城ê社區，別位ná像無--neh。」
三峽台北大學kap鄰近ê大樓社區，in結合三峽舊街文化ê底蒂，tsiânn做大學花園城ê構想；特別是年外前，開設離三峽半點鐘公車ē到ê土城病院，新北市政府委託長庚經營，有一流ê醫生、一流ê管理水準，掛號費tsiah 80箍起跳，tī捷運永寧站規工lóng有病院定時來回ê交通車，俗koh好。阮某kap我lóng m̄是在地人，ē得來蹛三峽大學花園城真福氣。
