作者：顏月華
「豬m̄大，大tuì狗去」，讀國校ê時，逐擺若是領著獎狀，提tńg去厝hōo阿母看，ǹg望伊ē-tàng kā我褒--兩-句-仔，伊kan-na ē應我tsit句話，m̄ bat kā我呵咾--過，mā無半句鼓勵ê話語。後--來，無論是參加比賽tio̍h等，iah是出業ê時領著議長獎、市長獎，所有ê一切kánn-ná lóng參我無啥tī代，提--tńg-去ê獎狀lóng恬恬仔囥tī屜仔底，bē輸是別人ê。「豬m̄大……」tsit句話tī我ê心肝底，沓沓仔釘根，有時tsūn，親像一枝針leh ui，一tsūn一tsūn疼tī心內，suah無法度háu出聲，因為我真認命，siáng叫我出世做查某囡仔。Tsit句話mā tsiânn做一个kat，無聲無sueh，縛tī心肝頭。
阮阿爸是遠洋漁船ê船長，船仔便若入港，船公司ê總經理就ē紮蘋果來阮厝--裡行踏。鼻著hit籃芳kòng-kòng ê蘋果，阮三个姊妹仔kan-na ē-tàng tī邊--a流喙瀾，阮lóng知影he是beh留hōo阿兄食--ê，一半擺仔若有thang pun著薄薄--à一周thang食，就歡喜kah m̄知人。阿兄ê身體tsiânn lám，不時leh tsông病院、食刀仔肉。伊便若蹛院，阿母就ài kā纏tuè-tiâu--leh，厝內賰大姊leh看顧，所以阮自五、六年仔ê時就ē-hiáu煮食、款內底--ah。
「阿母，阮老師問我講： “你ê成績tsiah-nī好，哪m̄去考大學？”」伊講：「查某囡仔飼大漢就別人ê，讀hiah濟冊beh創啥？無彩錢！」Hit當時阮阿爸tài著尿毒，tiānn-tiānn ài去病院洗腰子，大姊已經嫁--人--ah，兄哥去做兵。我真認份，恬恬仔tuè tī阿母身邊，開麵店仔做生理，維持一家大大細細ê生活。想著小弟、小妹iáu hiah細漢，我m̄ bat koh開喙討beh去讀冊。心肝頭ê hit个kat，suah ná來ná ân。
結婚了後，m̄-nā ài kā翁婿ê事業tàu huānn siàu，koh ài tshiânn三个囡仔，不時iáu tio̍h照顧破病ê阿公、阿媽，逐日親像干樂kho̍k-kho̍k-gô，gô kah囡仔lóng大漢、離跤手--ah，坐bē tiâu ê我，揣著一个頭路，繼續gô。Tī職場tsiah知家己ê學歷siunn低，beh去讀冊ê想法koh再浮--出-來。Tsit擺我beh家己主意，我beh來去讀冊，就án-ne，koh做一擺學生。讀二專hit兩冬是我上快樂ê時tsūn，愛讀冊ê我，tsiok認真--ê，出業ê時是全班第二名--neh！科主任ài我留落來繼續讀，koh beh kā我tàu紹介貿易公司ê頭路。無疑悟，翁婿一句『女子無才便是德』koh kā我讀冊ê夢拍精神。心肝內ê hit个結，ta̋nn tsiah beh tháu--開niā-niā，又koh tsiânn做一个死kat--ah。
因為學歷無夠kuân，工作當中真濟好ê機會suah拍ka-la̍uh--去，我mā因為án-ne愈來愈自卑。兩年後翁婿得著癌症，陪伴伊行過四冬抗癌ê日子，看伊一个好好人，hōo癌細胞一喙一喙拆食落腹，留--落-來--ê是bē赴完成ê心願kap滿腹ê m̄甘願。Koh過三冬外，hām我上親ê小弟，因為一場公安意外，雄雄過身。人生ê風風雨雨kā我拍清醒，我知影：行--過ê路，m̄-thang越頭看；想beh做ê代誌m̄好koh躊躇。
2021年ê年初，無意中看著社大有開台語課，lóng無tùn-tenn，就隨去報名。年尾通過認證，koh再參加培訓，順利提著教支人員ê資格。有一日，為著beh慶祝我領著證書，大漢查某囝tshuā我kap阿母去食好料--ê。食到一半，阿母無張無持kā我講：「Khah早lín公kap lín媽無thang hōo阮tsia-ê查某--ê去讀冊，一日到暗，kan-na叫阮ài作穡，我就是學lín公kap lín媽--ê，tsiah ē m̄ hōo你去讀冊……」「阿母--啊！我無怪--你--lah！Lín hit个年代ê查某囡仔phīng阮khah歹命，我看tsiok開--ê，你m̄-thang烏白想--lah！」
心肝頭ê hit个結，雄雄tháu--開，鬱tī心內ê不平kap怨tsheh，就án-ne放hōo風飛--去。Kám知影suà--落-來我beh按怎？Tio̍h！我beh koh享受揹冊包仔去讀冊ê趣味--looh！
