作者：Bí-hûn
Lán台語有濟濟人拍拚做正名khang-khòe，阮mā想beh kā土地ê地名正音沓沓仔khioh倒tńg--來，he有土地ê地理kap歷史也有人ê生活文化。
Tī阮ê故鄉嘉義朴子ê上南爿，19號公路ê 90公里hia有一个號做「牛挑灣」ê庄頭，地名正音是「Gû-taⁿ-oan」。Chit-má來稽考「Gû-taⁿ-oan」按怎來--ê。
Tī地質學有華語名詞號做『曲流』kap『牛軛湖』，先用台語號做「彎溪」kap「牛oaⁿ湖」。地質kap地勢ē hō͘溪流chiâⁿ做「彎溪」，地質若是沙塗，真緊就ē變做「牛oaⁿ湖」；m̄-koh若是岩石像高雄茂林部落ê濁口溪「蛇頭山」kap「龍頭山」，tio̍h-ài千年萬年chiah ē chiâⁿ做「牛oaⁿ湖」，hia正經是「彎溪」ê大自然教室。
Che「牛挑灣」（Gû-taⁿ-oan）庄頭是真好作穡ê塗沙地，chit-má來看「彎溪」按怎chiâⁿ做「牛oaⁿ湖」。 先講話頭，就是逐个「彎」lóng有「lap墘」kap「thóng墘」。
1.A圖ê溪水流到第一个彎，ē kā「lap墘1」ê塗沙chhiâng到第二个彎koh ē thūn踮「thóng墘2」，又koh溪水流到第二个彎，仝款ē kā「lap墘2」ê塗沙chhiâng到第三个彎koh ē thūn踮「thóng墘3」。Koh有溪水流到「lap墘3」ē kā塗沙chhiâng--出-去。
2.Án-ne年久月深「lap墘1」kap「lap墘3」ná來ná倚，像B圖，尾手ē像C圖「lap墘1」kap「lap墘3」sio通，chiâⁿ做掠直ê溪水，彎溪hit爿soah變做彎彎ê窟仔水。
 |
| （彎溪ê圖） |
 |
| （牛擔ê圖） |
Che彎彎ê窟仔水，tī古早在地ê台語人看，就親像牛車頭前掛tī牛肩胛ê「牛擔（gû-taⁿ）」iah是「牛oaⁿ」，就kā伊號做「牛擔彎」（Gû-taⁿ-oan）。按清國到kah日本時代，庄名lóng是寫做「牛挑灣」，總--是讀音ài唸做「Gû-taⁿ-oan」。
Che「Gû-taⁿ-oan」庄頭有kā「牛oaⁿ湖」整理做清幽ê社區公園，庄外有一條淹田ê圳溝，就是古早有彎溪ê溪水。庄內有一間tī 1885年創立ê基督教長老教會，甘為霖牧師chiâⁿ做頭一个宣教師，mā是嘉義海線ê頭一間基督教長老教會。
Tī雲林縣水林鄉mā有庄頭叫做「Gû-taⁿ-oan」，漢字mā是寫做「牛挑彎」，iáu-m̄-koh chit庄soah無「牛oaⁿ湖」。He是庄頭有一條溪生做彎彎像牛擔，m̄-chiah古早在地ê台語人就kā號做「Gû-taⁿ-oan」，仝款按清國到日本時代ê庄名lóng寫做「牛挑灣」。水林鄉上有名--ê是番薯，he是通人知。
Koh tī雲林縣斗六有庄頭叫做「朱丹彎」，he是「Gû-taⁿ-oan」變音來--ê。斗六公所網站記錄che庄頭有一條「海豐崙溪」，mā是生做彎彎像牛擔án-ne，m̄-chiah古早在地ê台語人就kā號做「Gû-taⁿ-oan」，尾手m̄知按怎soah叫做「朱丹彎」。
講著彎彎ê溪水，mā有人kā叫做「月眉（goe̍h-bâi）」。Chit-má ùi南部chiūⁿ北、koh se̍h過東部來看台灣ê 「月眉」庄頭。
Tī高雄杉林區上南爿有號做「月眉」ê庄頭。就是有一條楠仔仙溪（Lâm-á-sian-khe）彎彎流過庄頭，tī chia古早在地ê客人kā看做像半圓ê月娘，m̄-chiah號做「月眉」。
Tī嘉義新港有叫做「月眉潭」ê庄頭，正經是有一个彎彎ê月眉潭，庄外有一條淹田ê圳溝he就是古早有彎溪ê溪水，論真mā是「牛oaⁿ湖」。Tī雲林東勢ê「月眉」庄頭，仝款有彎彎ê月眉潭，庄外有一條淹田ê圳溝，仝款就是古早有彎溪ê溪水，論真mā是「牛oaⁿ湖」。向北到台中后里mā有叫做「月眉」ê庄頭，hia北爿有大安溪、南爿有大甲溪，雙溪彎彎流--過，是真拄真、現拄現ê雙月眉。
Koh chiūⁿ北到新竹有「峨嵋」（Ngô͘-bî/Ngo-mi），有峨眉湖mā有峨嵋溪，khah奇巧--ê是峨眉湖kap峨嵋溪iáu黏做伙，本底叫做「月眉」，尾手chiah換做「峨嵋」。Koh再chiūⁿ上北到桃園大溪mā有「月眉」庄頭，大漢溪ê彎溪按chia流--過，chiah án-ne號名。Koh有中壢mā有「月眉」庄頭，he是有洽溪彎彎流--過。
Se̍h來到宜蘭三星ê「月眉」庄頭，káⁿ是月眉圳就是古早ê彎溪chiah án-ne號名？若是花蓮壽豐鄉叫做「月眉」ê Amis族部落，he是因為部落徛tī海岸山脈，遠遠kā看，部落彎彎像月眉chiah án-ne號名。
來講上原味ê彎溪。Tī台北北投有一个所在叫做「唭哩岸」（Ki-lí-gān），台北市北投區公所網站記錄古早ê淡水河流過chia chiâⁿ做「彎溪」，hia古早lóng是平埔族人徛起ê所在，平埔族人講ê「ki-lí-gān」意思就是「彎溪」。
Tī台南大內區有一个在地人叫做「唭仔瓦」（Ki-á-ōa）庄頭，m̄-koh Google地圖是寫做「唭哩瓦」（Ki-lí-ōa）。Koh-kah斟酌看，曾文溪tī chia像chheⁿ-mê蛇轉九个彎kā庄頭箍--起-來，chit个「ki-lí-ōa」kap「ki-lí-gān」仝款是彎溪ê意思。
「唭仔瓦」tī古早就是平埔族Siraya徛起ê所在，chia iáu有公廨，mā iáu有leh夜祭。「ki-lí-gān」iah是「ki-lí-ōa」講是彎溪ê意思，m̄-koh我án-ne leh想，古早平埔族人是借啥mih大自然ê mi̍h件來比喻彎溪--leh？是bî-bî仔笑ê喙脣？是黃梔子（n̂g-ki-chí）？Iah是bā-hio̍h ê翼股--leh？
