隨機刣人事件ê思考
/ 許正輝
2025年12--月台灣出現一層hōo人真傷心kah感覺恐怖ê代誌，tī鬧熱ê捷運站、大路邊kah誠品冊店koh發生「隨機刣人」ê案件。逐擺若看著tsit款新聞ê報導，心肝lóng ē tiuh--一-下。Tsit款無冤無仇、m̄知原因ê暴力就親像是一phiàn烏雲，hōo原本平靜ê社會產生一層厚厚ê驚惶。
Tng當代誌發生ê時tsūn，lán頭一个反應tiānn-tiānn是受氣kah m̄甘願，lán ē問：「Tsit个社會到底是按怎--ah？」、「是按怎ē發生tsit款代誌？」Tī網路，逐家開始討論，有人主張ài用上嚴ê法律來制裁tsit款人，有人開始檢討社會福利ê安全網kám是破空--ah。
Ē記得有一擺tī麵擔仔食麵，隔壁桌ê阿伯看著電視新聞，氣kah頓椅頓桌講：「Tsit款人絕對是教bē ē，應該ài hōo伊上嚴重ê教示，ài死刑--lah！」坐tī對面ê少年仔也應講：「阿伯，tse是心理健康ê防線崩--去--lah，社會安全網若無補，tsit種代誌永遠ē一直發生。」
Tsit款ê對話反應社會對tsit類事件ê兩種心態：一種是追求正義ê憤慨，另外一種是對社會結構ê擔憂。
隨機刣人事件上恐怖ê所在m̄是tī肉體ê傷害，是tī伊破壞人kah人之間ê「信任」。原本lán tī外口leh行，看著生份人有tang時仔可能ē tàm頭表現善意，上無，mā ē感覺真平安；m̄-koh若有tsit款代誌發生了後，lán就ē開始giâu疑，看著邊--a ê人穿插khah奇怪、眼神koh kánn-ná khah無真正常ê時tsūn，心內凡勢就ē開始驚惶烏白想。Tsit種「社會互相懷疑」ê代誌，對一个文明社會來講是tsiânn大ê傷害。
M̄-koh，lán若是一直bih tī驚惶內面，án-ne加害者就真正贏--ah。評論tsit款事件，lán bē-sái kan-na有受氣ê情緒，koh-khah ài有冷靜ê思考。
頭起先，心理健康ê宣導kah資源ài普及。Tsiânn濟案件ê背後，加害者其實是長期hōo社會邊緣化、甚至是有嚴重心理病疼ê人。若是tī伊發作進前，lán ê社會ē-sái對伊有ke一屑仔關心，或者是醫療體系有法度早一步發現伊ê無正常，無的確ē有tńg-se̍h ê機會。Lán bē-sái等到流血--ah，tsiah來問「藥仔tī佗位？」
Koh來，lán ài重koh kā「社區ê溫度」揣倒tńg--來。Tsiok濟現代人蹛tī大樓，隔壁蹛啥人to m̄知，tsit種孤單kah疏離，就是產生歪tshua̍h行為ê因素之一。若lán ē-tàng對身軀邊ê人有ke一點仔關心，減少排斥，雖然bē-sái保證百分之百無代誌，上無，也ē-tàng hōo tsit个社會ke一點仔人情味，減少一點仔暴力ê氣氛。
最後，面對tsit款不幸，lán koh-khah ài展現出「勇氣」kah「團結」。就親像過去幾件案例當中，lán lóng看ē著tsiânn濟勇敢徛出來阻止歹徒ê正義之士，或者是事後自發性去現場獻花、互相安慰ê民眾，tse代表台灣人ê良心kah溫暖並無因為驚惶消散--去。
隨機刣人事件是一面鏡，照出社會上暗淡ê一面，m̄-koh lán ài ē記--得，光線永遠比烏暗khah強。面對tsit款無張持出現hōo lán ê驚惶，lán除了要求法律ê正義，koh-khah ài用「關懷」kah「冷靜」來補tsit張破--去ê安全網。Ǹg望未來ê日子，lán行tī大路iah是捷運車廂，bē koh再懷疑邊--a ê人kám ē對lán不利，kan-na有平安kah自在。
Tng當代誌發生ê時tsūn，lán頭一个反應tiānn-tiānn是受氣kah m̄甘願，lán ē問：「Tsit个社會到底是按怎--ah？」、「是按怎ē發生tsit款代誌？」Tī網路，逐家開始討論，有人主張ài用上嚴ê法律來制裁tsit款人，有人開始檢討社會福利ê安全網kám是破空--ah。
Ē記得有一擺tī麵擔仔食麵，隔壁桌ê阿伯看著電視新聞，氣kah頓椅頓桌講：「Tsit款人絕對是教bē ē，應該ài hōo伊上嚴重ê教示，ài死刑--lah！」坐tī對面ê少年仔也應講：「阿伯，tse是心理健康ê防線崩--去--lah，社會安全網若無補，tsit種代誌永遠ē一直發生。」
Tsit款ê對話反應社會對tsit類事件ê兩種心態：一種是追求正義ê憤慨，另外一種是對社會結構ê擔憂。
隨機刣人事件上恐怖ê所在m̄是tī肉體ê傷害，是tī伊破壞人kah人之間ê「信任」。原本lán tī外口leh行，看著生份人有tang時仔可能ē tàm頭表現善意，上無，mā ē感覺真平安；m̄-koh若有tsit款代誌發生了後，lán就ē開始giâu疑，看著邊--a ê人穿插khah奇怪、眼神koh kánn-ná khah無真正常ê時tsūn，心內凡勢就ē開始驚惶烏白想。Tsit種「社會互相懷疑」ê代誌，對一个文明社會來講是tsiânn大ê傷害。
M̄-koh，lán若是一直bih tī驚惶內面，án-ne加害者就真正贏--ah。評論tsit款事件，lán bē-sái kan-na有受氣ê情緒，koh-khah ài有冷靜ê思考。
頭起先，心理健康ê宣導kah資源ài普及。Tsiânn濟案件ê背後，加害者其實是長期hōo社會邊緣化、甚至是有嚴重心理病疼ê人。若是tī伊發作進前，lán ê社會ē-sái對伊有ke一屑仔關心，或者是醫療體系有法度早一步發現伊ê無正常，無的確ē有tńg-se̍h ê機會。Lán bē-sái等到流血--ah，tsiah來問「藥仔tī佗位？」
Koh來，lán ài重koh kā「社區ê溫度」揣倒tńg--來。Tsiok濟現代人蹛tī大樓，隔壁蹛啥人to m̄知，tsit種孤單kah疏離，就是產生歪tshua̍h行為ê因素之一。若lán ē-tàng對身軀邊ê人有ke一點仔關心，減少排斥，雖然bē-sái保證百分之百無代誌，上無，也ē-tàng hōo tsit个社會ke一點仔人情味，減少一點仔暴力ê氣氛。
最後，面對tsit款不幸，lán koh-khah ài展現出「勇氣」kah「團結」。就親像過去幾件案例當中，lán lóng看ē著tsiânn濟勇敢徛出來阻止歹徒ê正義之士，或者是事後自發性去現場獻花、互相安慰ê民眾，tse代表台灣人ê良心kah溫暖並無因為驚惶消散--去。
隨機刣人事件是一面鏡，照出社會上暗淡ê一面，m̄-koh lán ài ē記--得，光線永遠比烏暗khah強。面對tsit款無張持出現hōo lán ê驚惶，lán除了要求法律ê正義，koh-khah ài用「關懷」kah「冷靜」來補tsit張破--去ê安全網。Ǹg望未來ê日子，lán行tī大路iah是捷運車廂，bē koh再懷疑邊--a ê人kám ē對lán不利，kan-na有平安kah自在。
