分組論壇第二組：台語日常化
主講／許慧如、劉承賢、曾偉旻、薛丞宏
整理／台語政策推動聯盟、編輯部
編註：全國台語政策民間會議是由李江却台語文教基金會等五个民間團體聯合舉辦ê會議，第二屆tī 2025/12/14進行。Tsit擺會議下晡場ê分組論壇lóng總有五組。第一組是「語言ê轉型正義」，tsit組ê記錄已經tī雜誌第383期刊出，本期雜誌接suà刊出第二組～第五組ê記錄。
第二屆「全國台語政策民間會議」分組論壇第二組邀請台師大台文系系主任莊佳穎來主持、台師大台文系教授許慧如、副教授劉承賢、節目主持人曾偉旻、意傳科技總經理薛丞宏來分享，做伙討論「台語日常化」。
許慧如指出，lán一直做台語ê復振到tann，台語已經真罕得去hōo人看做是無水準ê語言，但是台語ê能力suah uì 1970年代中期出世、tsit-má 50歲左右ê人開始流失。明明有hiah-nī濟人ē-hiáu講台語，lán過去tsit 2、30年ê時間suah lóng kā台語縛tī教育、文化、表演化。
啥mi̍h是台語ê「無正常」？
許慧如表示，第一，是使用場域siunn過集中，tī「食衣住行育樂」內底，台語 kan-na賰「育」kah「樂」ê功能。第二，是台語意識kah程度／實踐無配合，lán m̄-nā ài有台語意識，也ài有台語意志。若準意志無夠，kan-na tī台語課講、hām固定ê台語伴講，tse就是無意志。許慧如講，tsit-má上重要--ê是ài hōo台語是母語，m̄-koh無意識ê人來要意台語。Tsia-ê人就親像睏kah真落眠，beh雄雄kā叫--起-來是真硬táu，總--是，lán ē用得kā慢慢仔khiú--一-下、khiú--一-下，規个環境就ē好--起-來。
許慧如也補充，未來凡勢ē-tàng設計台語、客語、原住民各族語ê語言標章，獎勵公家機關ê第一線服務人員根據家己ê語言能力選擇beh掛啥mih標章，hōo人客便若看就知影ē-tàng kah服務人員講啥mih話。若準由政府來透過tsit款方式，應當是ē-tàng創造環境。
落尾，許慧如分享，日本人leh講英文ê時，ē講日本話是Japanese，bē講是Nihongo。若án-ne，台語就是Taiwanese，mài koh用Taigi iah是其他ê名，tse也是台語正常化ê一步。
Hōo台語代表台灣文化
台師大台文系副教授劉承賢招逐家思考——Wikipedia講，越南文化是越南北部京族ê文化，啊若台灣文化是「原住民」hām「歷代移民」tī 400冬內所融合ê多元文化。M̄-koh真奇怪，既然京族占越南人口八成外仔外，in ê文化ē-tàng代表越南，是按怎lán m̄敢講「台灣文化」通常是指「講台灣話ê族群」所創造ê文化--leh？
有代表性ê文化應該ài hām多數人ê生活相關。劉承賢講，tse m̄是排斥原住民，in ê語言kah文化uân-á ài保護、傳承。M̄-koh，美國人kám ē講美國文化是Indian（『印地安』）文化？澳洲kám ē講澳洲文化是Māori（『毛利』）文化？是按怎全世界kan-na台灣ē講家己ê文化是原住民文化？啊無，就是講tuì三太子、夜市、人情味去。因為濟濟台灣人想講，傳統文化lóng m̄是lán ê，感覺是中國--ê，所以講著台灣文化，就kan-na想著常民文化niā-niā。
其實，文化ê核心就是「語言」，台語就是代表台灣ê語言，台語日常化若無變做是一个現實，台灣人永遠lóng bē感覺家己ê文化有偌特別。劉承賢表示，lán免驚講台灣話kám是中國--ê，lán若主導，台語就是lán家己--ê。
有人ē質疑講「人美國人也講英語--啊，是按怎台灣華語無法度代表台灣？」M̄-koh，tse是錯誤ê類比。劉承賢說明，美國是第一強國tsiah有才調主導英語ê文化，台灣華語koh-khah按怎也無法度行家己ê路，比如講，台灣對外華語教學kah測驗，uân-á ài取中國腔hām中國用法。M̄-koh，台灣有「台語」ê主導權，甚至是全世界「閩南語／福建話」ê宗主，in ē感覺台語是一个標準。
媒體復振台語ê力量
現此時曾偉旻tī中央廣播電台主持節目《台灣夜市Taiwan Yes》，用台語講台灣ê故事hōo世界知影，sak各種議題。有人問講「做媒體」到底ē-tàng創啥？曾偉旻表示，台語媒體ē-tàng提升語言ê能見度hām社會地位，也ē用得做專業ê示範，koh ē-tàng討論國內ê公共事務kah世界ê代誌。
用公視台語台做例，in有推廣野球hām台灣職業排球ê轉播。是按怎結合體育議題做語言復振真重要？曾偉旻講，uì國外 S4C（『威爾斯第四台』）、BBC（『英國廣播公司』）、RTÉ（『愛爾蘭電視電台』）ê經驗來看，ē-tàng了解講若是來講體育議題，對語言復振是真有幫助，也吸引著非台語母語者收看。媒體ê守備範圍uì公共論壇到體育、廣播、出冊，tsia--ê lóng是台語日常化ê一部份。
Tsit-má真濟網tshìng ē用台語hām其他語言做連結，tse也hōo koh-khah濟人知影台語ê地位hām其他語言是仝款--ê。若是愈來愈濟少年人來做相關ê事工，對台語拍底蒂是真有幫贊。
Koh來，有人ē問講媒體leh復振，kám tuè ē赴台語流失ê速度？曾偉旻表示，當然bē赴，總--是lán tī日常各方面lóng ài kā台語khioh--起-來。媒體有伊ê力量，但是也有伊ê限制，逐家ài有實踐ê信心，台語tsiah ē-tàng行kah平安順序。
有人講主播、主持人lóng kā台語當做表演式ê語言，m̄-koh真濟人以早可能是演講、朗讀底ê選手，後--來踏入媒體實踐、復振tsit條路，講台語就tsiânn做in ê日常。曾偉旻表示，beh按怎kā表演變做日常tsiah是重點。愈來愈濟台語表演班tī-leh栽培演員，若少年人願意踏入tsit个領域，lán就ài鼓勵in自表演開始，將台語改做是日常使用ê語言。
台語日常化了後，後一步就是國際化。曾偉旻講，台語ê機會tī OTT（串流媒體）頻道頂頭。Lán若去Netflix拍「台語」來查，就ē-tàng看著濟濟作品（包含全台語、半台語）。另外，世界講閩南語、福建話ê人是非常濟，tse代表lán有tsiok大ê市場，也ài對家己有信心。
Tī企業內起造台語環境
意傳科技總經理薛丞宏，分享in公司創立到tann，tsit八、九年來有做啥mih hām台語、科技相關ê代誌。意傳科技ê理念是kā語言學習者kah語言工作者tàu-sann-kāng，hōo lán有法度kah厝內、社會無仝族群交流，所以in所做ê專案計畫lóng是hām台語、國家語言相關。像台語資訊系統（教育部臺灣台語常用詞辭典、iTaigi愛台語辭典、厝鳥仔講台語口說練習APP），也有語言hām活動大型整合專案。
薛丞宏表示，公司ê氣氛上要緊，若是氣氛有夠好、台語自然就ē通。Koh來，公司ē建立合作單位、同事講台語ê動機，tse對台語來講khah ē久長。薛丞宏也分享伊ê做法，伊開喙就先用台語sio借問，若是對方無特別ê反應，就繼續講台語；若對方聽有，m̄敢講，但是伊家己想beh講台語，就kā應「好，無要緊。」Tsit款情形，大部份ê人來回兩三斗以後，就ē開喙講台語。若準講今仔日對方聽無，就配合對方，有時仔ē-tàng透lām兩三个台語詞。若是對方無ha̍h家己ê意，後改揣別人就好。
另外，tī面試ê時tsūn，也tio̍h揣有台語文能力／意識ê同事。若是台文相關ê khueh，就ē要求對方ài肯寫台文，也ài有台文ê專業能力。公司ē tī面試進前提供題庫，考台文書寫。若準是hām台文無tī代ê khueh，就ē要求對方ài肯讀台文、查辭典。
薛丞宏講，公司接觸--過ê單位是濟濟款，進前有用台文寫批ê經驗，結果對方也真用心來用台文回批。雖然對方對台文iáu無真了解，但是對台語有認同、有意識，也願意去學習，tse是一个真好ê開始。另外，公司leh hām別人開會ê時，對方也ē tuè leh講台語，tse就是一个互相ê過程。Lán tiānn-tiānn認為，外口對台語真無友善，總--是lán若是家己願意拍拚、願意講，未來就ē有改變。
許慧如指出，lán一直做台語ê復振到tann，台語已經真罕得去hōo人看做是無水準ê語言，但是台語ê能力suah uì 1970年代中期出世、tsit-má 50歲左右ê人開始流失。明明有hiah-nī濟人ē-hiáu講台語，lán過去tsit 2、30年ê時間suah lóng kā台語縛tī教育、文化、表演化。
啥mi̍h是台語ê「無正常」？
許慧如表示，第一，是使用場域siunn過集中，tī「食衣住行育樂」內底，台語 kan-na賰「育」kah「樂」ê功能。第二，是台語意識kah程度／實踐無配合，lán m̄-nā ài有台語意識，也ài有台語意志。若準意志無夠，kan-na tī台語課講、hām固定ê台語伴講，tse就是無意志。許慧如講，tsit-má上重要--ê是ài hōo台語是母語，m̄-koh無意識ê人來要意台語。Tsia-ê人就親像睏kah真落眠，beh雄雄kā叫--起-來是真硬táu，總--是，lán ē用得kā慢慢仔khiú--一-下、khiú--一-下，規个環境就ē好--起-來。
許慧如也補充，未來凡勢ē-tàng設計台語、客語、原住民各族語ê語言標章，獎勵公家機關ê第一線服務人員根據家己ê語言能力選擇beh掛啥mih標章，hōo人客便若看就知影ē-tàng kah服務人員講啥mih話。若準由政府來透過tsit款方式，應當是ē-tàng創造環境。
落尾，許慧如分享，日本人leh講英文ê時，ē講日本話是Japanese，bē講是Nihongo。若án-ne，台語就是Taiwanese，mài koh用Taigi iah是其他ê名，tse也是台語正常化ê一步。
Hōo台語代表台灣文化
台師大台文系副教授劉承賢招逐家思考——Wikipedia講，越南文化是越南北部京族ê文化，啊若台灣文化是「原住民」hām「歷代移民」tī 400冬內所融合ê多元文化。M̄-koh真奇怪，既然京族占越南人口八成外仔外，in ê文化ē-tàng代表越南，是按怎lán m̄敢講「台灣文化」通常是指「講台灣話ê族群」所創造ê文化--leh？
有代表性ê文化應該ài hām多數人ê生活相關。劉承賢講，tse m̄是排斥原住民，in ê語言kah文化uân-á ài保護、傳承。M̄-koh，美國人kám ē講美國文化是Indian（『印地安』）文化？澳洲kám ē講澳洲文化是Māori（『毛利』）文化？是按怎全世界kan-na台灣ē講家己ê文化是原住民文化？啊無，就是講tuì三太子、夜市、人情味去。因為濟濟台灣人想講，傳統文化lóng m̄是lán ê，感覺是中國--ê，所以講著台灣文化，就kan-na想著常民文化niā-niā。
其實，文化ê核心就是「語言」，台語就是代表台灣ê語言，台語日常化若無變做是一个現實，台灣人永遠lóng bē感覺家己ê文化有偌特別。劉承賢表示，lán免驚講台灣話kám是中國--ê，lán若主導，台語就是lán家己--ê。
有人ē質疑講「人美國人也講英語--啊，是按怎台灣華語無法度代表台灣？」M̄-koh，tse是錯誤ê類比。劉承賢說明，美國是第一強國tsiah有才調主導英語ê文化，台灣華語koh-khah按怎也無法度行家己ê路，比如講，台灣對外華語教學kah測驗，uân-á ài取中國腔hām中國用法。M̄-koh，台灣有「台語」ê主導權，甚至是全世界「閩南語／福建話」ê宗主，in ē感覺台語是一个標準。
媒體復振台語ê力量
現此時曾偉旻tī中央廣播電台主持節目《台灣夜市Taiwan Yes》，用台語講台灣ê故事hōo世界知影，sak各種議題。有人問講「做媒體」到底ē-tàng創啥？曾偉旻表示，台語媒體ē-tàng提升語言ê能見度hām社會地位，也ē用得做專業ê示範，koh ē-tàng討論國內ê公共事務kah世界ê代誌。
用公視台語台做例，in有推廣野球hām台灣職業排球ê轉播。是按怎結合體育議題做語言復振真重要？曾偉旻講，uì國外 S4C（『威爾斯第四台』）、BBC（『英國廣播公司』）、RTÉ（『愛爾蘭電視電台』）ê經驗來看，ē-tàng了解講若是來講體育議題，對語言復振是真有幫助，也吸引著非台語母語者收看。媒體ê守備範圍uì公共論壇到體育、廣播、出冊，tsia--ê lóng是台語日常化ê一部份。
Tsit-má真濟網tshìng ē用台語hām其他語言做連結，tse也hōo koh-khah濟人知影台語ê地位hām其他語言是仝款--ê。若是愈來愈濟少年人來做相關ê事工，對台語拍底蒂是真有幫贊。
Koh來，有人ē問講媒體leh復振，kám tuè ē赴台語流失ê速度？曾偉旻表示，當然bē赴，總--是lán tī日常各方面lóng ài kā台語khioh--起-來。媒體有伊ê力量，但是也有伊ê限制，逐家ài有實踐ê信心，台語tsiah ē-tàng行kah平安順序。
有人講主播、主持人lóng kā台語當做表演式ê語言，m̄-koh真濟人以早可能是演講、朗讀底ê選手，後--來踏入媒體實踐、復振tsit條路，講台語就tsiânn做in ê日常。曾偉旻表示，beh按怎kā表演變做日常tsiah是重點。愈來愈濟台語表演班tī-leh栽培演員，若少年人願意踏入tsit个領域，lán就ài鼓勵in自表演開始，將台語改做是日常使用ê語言。
台語日常化了後，後一步就是國際化。曾偉旻講，台語ê機會tī OTT（串流媒體）頻道頂頭。Lán若去Netflix拍「台語」來查，就ē-tàng看著濟濟作品（包含全台語、半台語）。另外，世界講閩南語、福建話ê人是非常濟，tse代表lán有tsiok大ê市場，也ài對家己有信心。
Tī企業內起造台語環境
意傳科技總經理薛丞宏，分享in公司創立到tann，tsit八、九年來有做啥mih hām台語、科技相關ê代誌。意傳科技ê理念是kā語言學習者kah語言工作者tàu-sann-kāng，hōo lán有法度kah厝內、社會無仝族群交流，所以in所做ê專案計畫lóng是hām台語、國家語言相關。像台語資訊系統（教育部臺灣台語常用詞辭典、iTaigi愛台語辭典、厝鳥仔講台語口說練習APP），也有語言hām活動大型整合專案。
薛丞宏表示，公司ê氣氛上要緊，若是氣氛有夠好、台語自然就ē通。Koh來，公司ē建立合作單位、同事講台語ê動機，tse對台語來講khah ē久長。薛丞宏也分享伊ê做法，伊開喙就先用台語sio借問，若是對方無特別ê反應，就繼續講台語；若對方聽有，m̄敢講，但是伊家己想beh講台語，就kā應「好，無要緊。」Tsit款情形，大部份ê人來回兩三斗以後，就ē開喙講台語。若準講今仔日對方聽無，就配合對方，有時仔ē-tàng透lām兩三个台語詞。若是對方無ha̍h家己ê意，後改揣別人就好。
另外，tī面試ê時tsūn，也tio̍h揣有台語文能力／意識ê同事。若是台文相關ê khueh，就ē要求對方ài肯寫台文，也ài有台文ê專業能力。公司ē tī面試進前提供題庫，考台文書寫。若準是hām台文無tī代ê khueh，就ē要求對方ài肯讀台文、查辭典。
薛丞宏講，公司接觸--過ê單位是濟濟款，進前有用台文寫批ê經驗，結果對方也真用心來用台文回批。雖然對方對台文iáu無真了解，但是對台語有認同、有意識，也願意去學習，tse是一个真好ê開始。另外，公司leh hām別人開會ê時，對方也ē tuè leh講台語，tse就是一个互相ê過程。Lán tiānn-tiānn認為，外口對台語真無友善，總--是lán若是家己願意拍拚、願意講，未來就ē有改變。
