分組論壇第三組：後一間台語學校tī佗位？
主講／張博洋、董力玄、黃淑君
整理／台語政策推動聯盟、編輯部
第二屆「全國台語政策民間會議」分組論壇第三組邀請台灣台語路協會理事長董力玄、新北市議員黃淑君、高雄市議員張博洋來分享，做伙討論「後一間台語學校tī佗位？」。
台灣tī客語kah原住民各族語教學領域已經累積明確ê浸水式教學成果：濟篇幼稚園、國小ê研究lóng顯示，只要課程kah師資設計了好，囡仔ê本族語能力ē明顯提升，對中文、數學等學科無負面影響，tī語言認同kah學習動機ē有khah好ê表現。國外ê經驗，親像紐西蘭ê Māori（『毛利』）語、Hawaii（『夏威夷』）ê族語沉浸學校tī完善師資kah課程支持下，學生學業成績並無khah差，koh ē-tàng成功恢復語言活力。
Tse lóng證明一件代誌：以本土語做教學語，是ē做--得、mā有效--ê。M̄-koh，台語領域iáu無穩定ê相關法規kah資源。第一間台語學校「北嶺國小」雖bóng tī高雄誕生，但是第二間、第三間ài按怎促成？Tsit件代誌需要濟濟討論。
台灣台語路協會理事長董力玄分享，tsit-má ê國民教育屬於地方自治權限，中央ê教育部負責政策ê大方向、制度設計kah監督，地方ê教育局就負責設立學校、校務行政、學區劃分tsit寡，下面ê機關就是學校，負責實際辦學。頭一間台語學校是高雄ê北嶺國小，頭起先，是民間要求、市長答應，議員來監督之下tsiah來設立，有án-ne一步一步ê過程，就ē有成果，總--是，lán mā真要意「後一間台語學校tī佗位？」
北嶺國小ê轉型經驗
高雄市議員張博洋指出，北嶺台語人文實驗學校ē-tàng設立，ài感謝真濟前輩先進來牽成。高雄是台語復振ê關鍵城市，因為高雄差不多有120萬人主要使用台語，是全國唯一ê台語百萬人口城市，所致，高雄真適合來做台語學校。台灣囡仔講台語--ê愈來愈少，tsit-má有失去家己歷史、語言、文化kah自我認同ê危機。北嶺國小就是為著振興本土文化ê理念來辦學。
張博洋講，目前全國普遍因為招生率siunn低來減班，北嶺國小2025年一年仔ê招生率顛倒增加45%，tse代表台語實驗學校有伊ê社會需求。總講--一-句，北嶺國小ē tsiânn做頭一間台語實驗學校，主要是地方社區語言環境、本土教育理念kah學校轉型需求三項sio疊ê結果，台語實驗學校也是偏鄉減班問題ê解決方式。
張博洋補充，tsit个台語實驗計畫是tuì 2024年6--月校務會議通過，申請推動實驗教育，經過教育局討論、試辦，tī 2025年ê新學年tsiah正式掛牌轉型做實驗學校。Leh籌備ê時，用「台語浸水式學習角」做環境設計，tī課程、師資方面，推動台語浸水式協同教學、召開家長說明會，得著八成家長支持。學校無kā台語變做一節課，是用「台語人文」做核心理念，結合閱讀、多語學習、數位kah美感等hānn領域ê課程，hōo台語tsiânn做學習學科kah生活ê工具。
張博洋接suà講著北嶺國小台語教學備授課ê情形。學校ē舉辦實驗課程工作坊，進行實驗課程規畫、教案編寫來替教師增能。也組織教學團，實施共備、授課、議課ê流程，共同評鑑ê優點、欠點，tsiah來調整課程。教師ē kā教材內容台語化，備課ê時就確定教學重點、台語備詢kah正音ê內容。涵蓋部定領域，親像數學、自然、社會、健康、綜合、音樂，koh有校訂課程，教學ê目標是學科素養kah語言沉浸平平重要。
台語實驗學校ê經費來源
張博洋表示，高雄市台語、客語、原住民族語實驗學校ê辦學經費有影有精差。北嶺國小台語實驗學校ê經費是高雄市家己khîng錢--ê，開辦hit學年有262萬ê經費。吉東國小客語實驗學校是提中央客委會kah教育部ê經費，開辦ê時tsūn，一冬是317.2萬ê經費，suà--落-來逐冬有200～300萬ê補助。高雄市四間原住民族語實驗學校逐冬加--起-來ê補助是600～800萬，經費也是tuì中央原民會、教育部來--ê。
現此時，目前ê高雄市長陳其邁真支持台語ê發展，總--是lán無法度確認後一任市長ê立場是啥款，tse也有可能ē影響著未來ê資源，m̄-tsiah希望中央也ē-tàng提供資源、經費hōo台語實驗學校來辦學。
張博洋表示，未來ē繼續監督台語實驗教育ê經費，也ē評估台語實驗教育ê效益。因為北嶺國小實驗學校未來ē-tàng tsiânn做中央kah各縣市參考ê學校，學校ài寫研究報告來評估實驗效果，mā tio̍h強調台語教育ê重要性。
上尾，張博洋講伊ē爭取台語備課ê津貼補助。實驗教育經費無包含教師備課ê津貼，教師除了ài進行原底ê教學備課以外，koh tio̍h khai時間學台語，kā教學內容轉化做台語。不而過，tsit寡付出並無收著其他補助，孤靠教師對實驗學校辦學理念ê認同hām熱情來支持niā-niā。
台語教學ê策略kah輔導
董力玄指出，若beh轉型做台語學校，需要有濟濟準備。根據北嶺國小ê經驗，頭先是師資培力規畫。老師ài ē-hiáu講台語、慣勢講台語，也ài知影按怎用台語上課，包括課室語言、課程內容。因為tsit-má ê囡仔確實是無啥ē-hiáu講台語，所致老師用台語kah學生溝通ê時tsūn，定著ē拄著困難，m̄-tsiah講ài制定雙語教育ê教學策略。北嶺國小有教師增能研習，團報台語認證，也請專案代理老師、代課老師來協助，就是希望ē-tàng創造好勢ê台語環境。
專案代理老師ē協助教師掌握「課室語言」運用，in參各專任備課、協同教學，練習用台語教學科（平均一个年級逐禮拜pun著5～6節課）。華語課用華語授課，英語課用英語授課，其他課程lóng ē「lām」台語上課（比例沓沓仔提kuân）。本土語言課也ē按學生意願選課，mā可能有客語、原住民族語，另外增加全校性ê台語增能課，提升學生閱讀kah口語表達能力。學校也tio̍h編寫、製作台語教材，kā各科教材台文化。
除了頂面講--著--ê，台語學校轉型輔導團也真要緊，目標是希望各縣市lóng有。針對tsit項，有án-ne ê做法：兩班配一位全職ê專案教師，m̄-nā上課，koh ài編寫教材、教師培力、共備課程、協同教學、營造語言環境，甚至參與校務。設定期程，可比一間學校ê轉型以三年做目標。三年了後，一位專案教師留任（ē-tàng做語言行政、新師培力、教案維護、校內語言活動）。其他專案教師就去到後一間學校，幫助學校轉型，沓沓仔建立「台語學校轉型 SOP」kah「轉型專案師資人才庫」。
另外，啥mih學校適合轉型--leh？初期ài揣小型學校，大概6～12班就好。Hit个所在ê社區語言環境kuân比例是台語，校長ê意願ài強，家長社群支持度mā kuân。董力玄表示，tī tsit-má tsit个少囝化ê社會，台語實驗學校凡勢是一種特色轉型ê機會。Lán mā ē-tàng要求政府訂定台語學校轉型辦法、提供語言加給、減課、協同鐘點補助等等ê政策。
董力玄提出結論：理想ê台語學校，絕對m̄是一兩冬就做ē到，tse lóng需要中央提供制度參資源，地方積極運作鼓勵。轉型初期，就算台語比例無夠kuân，mā已經有夠hōo學生ê語言能力明顯進步。長期來講，需要tháu放課綱、調整升學考試制度。
新北市議員黃淑君指出，提升學生ê台語閱讀、書寫能力tio̍h-ài khai時間。總--是，教育部台語認證逐年ê通過率愈來愈kuân，就有leh想講，教育部kám有為著beh hōo koh-khah濟人通過來放冗標準。Tse也致使講，教育現場kah台語界ê思考有小可仔精差。
後一間台語學校ê挑戰
透過tsit場論壇，lán看著高雄北嶺國小tsiânn做全台灣頭一間台語實驗學校，tse已經行出關鍵ê頭一步。「台語浸水式教學」m̄-nā bē影響學科成績，顛倒提升學生ê學習動機kah招生率。北嶺ê經驗證明，用台語做教學語言百面是ē行--得ê路。
總--是，beh複製tsit个成功經驗，生出「後一間台語學校」，目前iáu拄著真大ê挑戰。張博洋kah董力玄lóng指出，tsit-má資源分配無公平。客語、原住民族語lóng有中央專責機關（客委會、原民會）穩定ê經費來源，m̄-koh台語實驗教育目前kan-na靠地方政府ê預算，甚至教師備課、轉譯教材ê辛苦lóng無對應ê津貼，tse對長期ê發展來講是真大ê問題。
董力玄強調，學校ê轉型需要有系統ê「SOP」。Tuì師資ê培力、課室語言ê建立，到專案教師ê入班協助，tse lóng需要時間kah制度ê支持。中央應該ài訂定明確ê轉型辦法，提供語言加給kah輔導資源，hōo有意願ê小型學校ē-tàng安心轉型。
「後一間台語學校」bē-tàng kan-na靠民間ê熱情kah地方來做。教育部也ài負責任，提供法規kah資源來支持，配合地方社區ê強烈意願，tsiah有可能hōo台語學校tuì「一間」變做「一區一間」，hōo lán ê囡仔有法度tī台語ê環境中自信學習。
台灣tī客語kah原住民各族語教學領域已經累積明確ê浸水式教學成果：濟篇幼稚園、國小ê研究lóng顯示，只要課程kah師資設計了好，囡仔ê本族語能力ē明顯提升，對中文、數學等學科無負面影響，tī語言認同kah學習動機ē有khah好ê表現。國外ê經驗，親像紐西蘭ê Māori（『毛利』）語、Hawaii（『夏威夷』）ê族語沉浸學校tī完善師資kah課程支持下，學生學業成績並無khah差，koh ē-tàng成功恢復語言活力。
Tse lóng證明一件代誌：以本土語做教學語，是ē做--得、mā有效--ê。M̄-koh，台語領域iáu無穩定ê相關法規kah資源。第一間台語學校「北嶺國小」雖bóng tī高雄誕生，但是第二間、第三間ài按怎促成？Tsit件代誌需要濟濟討論。
台灣台語路協會理事長董力玄分享，tsit-má ê國民教育屬於地方自治權限，中央ê教育部負責政策ê大方向、制度設計kah監督，地方ê教育局就負責設立學校、校務行政、學區劃分tsit寡，下面ê機關就是學校，負責實際辦學。頭一間台語學校是高雄ê北嶺國小，頭起先，是民間要求、市長答應，議員來監督之下tsiah來設立，有án-ne一步一步ê過程，就ē有成果，總--是，lán mā真要意「後一間台語學校tī佗位？」
北嶺國小ê轉型經驗
高雄市議員張博洋指出，北嶺台語人文實驗學校ē-tàng設立，ài感謝真濟前輩先進來牽成。高雄是台語復振ê關鍵城市，因為高雄差不多有120萬人主要使用台語，是全國唯一ê台語百萬人口城市，所致，高雄真適合來做台語學校。台灣囡仔講台語--ê愈來愈少，tsit-má有失去家己歷史、語言、文化kah自我認同ê危機。北嶺國小就是為著振興本土文化ê理念來辦學。
張博洋講，目前全國普遍因為招生率siunn低來減班，北嶺國小2025年一年仔ê招生率顛倒增加45%，tse代表台語實驗學校有伊ê社會需求。總講--一-句，北嶺國小ē tsiânn做頭一間台語實驗學校，主要是地方社區語言環境、本土教育理念kah學校轉型需求三項sio疊ê結果，台語實驗學校也是偏鄉減班問題ê解決方式。
張博洋補充，tsit个台語實驗計畫是tuì 2024年6--月校務會議通過，申請推動實驗教育，經過教育局討論、試辦，tī 2025年ê新學年tsiah正式掛牌轉型做實驗學校。Leh籌備ê時，用「台語浸水式學習角」做環境設計，tī課程、師資方面，推動台語浸水式協同教學、召開家長說明會，得著八成家長支持。學校無kā台語變做一節課，是用「台語人文」做核心理念，結合閱讀、多語學習、數位kah美感等hānn領域ê課程，hōo台語tsiânn做學習學科kah生活ê工具。
張博洋接suà講著北嶺國小台語教學備授課ê情形。學校ē舉辦實驗課程工作坊，進行實驗課程規畫、教案編寫來替教師增能。也組織教學團，實施共備、授課、議課ê流程，共同評鑑ê優點、欠點，tsiah來調整課程。教師ē kā教材內容台語化，備課ê時就確定教學重點、台語備詢kah正音ê內容。涵蓋部定領域，親像數學、自然、社會、健康、綜合、音樂，koh有校訂課程，教學ê目標是學科素養kah語言沉浸平平重要。
台語實驗學校ê經費來源
張博洋表示，高雄市台語、客語、原住民族語實驗學校ê辦學經費有影有精差。北嶺國小台語實驗學校ê經費是高雄市家己khîng錢--ê，開辦hit學年有262萬ê經費。吉東國小客語實驗學校是提中央客委會kah教育部ê經費，開辦ê時tsūn，一冬是317.2萬ê經費，suà--落-來逐冬有200～300萬ê補助。高雄市四間原住民族語實驗學校逐冬加--起-來ê補助是600～800萬，經費也是tuì中央原民會、教育部來--ê。
現此時，目前ê高雄市長陳其邁真支持台語ê發展，總--是lán無法度確認後一任市長ê立場是啥款，tse也有可能ē影響著未來ê資源，m̄-tsiah希望中央也ē-tàng提供資源、經費hōo台語實驗學校來辦學。
張博洋表示，未來ē繼續監督台語實驗教育ê經費，也ē評估台語實驗教育ê效益。因為北嶺國小實驗學校未來ē-tàng tsiânn做中央kah各縣市參考ê學校，學校ài寫研究報告來評估實驗效果，mā tio̍h強調台語教育ê重要性。
上尾，張博洋講伊ē爭取台語備課ê津貼補助。實驗教育經費無包含教師備課ê津貼，教師除了ài進行原底ê教學備課以外，koh tio̍h khai時間學台語，kā教學內容轉化做台語。不而過，tsit寡付出並無收著其他補助，孤靠教師對實驗學校辦學理念ê認同hām熱情來支持niā-niā。
台語教學ê策略kah輔導
董力玄指出，若beh轉型做台語學校，需要有濟濟準備。根據北嶺國小ê經驗，頭先是師資培力規畫。老師ài ē-hiáu講台語、慣勢講台語，也ài知影按怎用台語上課，包括課室語言、課程內容。因為tsit-má ê囡仔確實是無啥ē-hiáu講台語，所致老師用台語kah學生溝通ê時tsūn，定著ē拄著困難，m̄-tsiah講ài制定雙語教育ê教學策略。北嶺國小有教師增能研習，團報台語認證，也請專案代理老師、代課老師來協助，就是希望ē-tàng創造好勢ê台語環境。
專案代理老師ē協助教師掌握「課室語言」運用，in參各專任備課、協同教學，練習用台語教學科（平均一个年級逐禮拜pun著5～6節課）。華語課用華語授課，英語課用英語授課，其他課程lóng ē「lām」台語上課（比例沓沓仔提kuân）。本土語言課也ē按學生意願選課，mā可能有客語、原住民族語，另外增加全校性ê台語增能課，提升學生閱讀kah口語表達能力。學校也tio̍h編寫、製作台語教材，kā各科教材台文化。
除了頂面講--著--ê，台語學校轉型輔導團也真要緊，目標是希望各縣市lóng有。針對tsit項，有án-ne ê做法：兩班配一位全職ê專案教師，m̄-nā上課，koh ài編寫教材、教師培力、共備課程、協同教學、營造語言環境，甚至參與校務。設定期程，可比一間學校ê轉型以三年做目標。三年了後，一位專案教師留任（ē-tàng做語言行政、新師培力、教案維護、校內語言活動）。其他專案教師就去到後一間學校，幫助學校轉型，沓沓仔建立「台語學校轉型 SOP」kah「轉型專案師資人才庫」。
另外，啥mih學校適合轉型--leh？初期ài揣小型學校，大概6～12班就好。Hit个所在ê社區語言環境kuân比例是台語，校長ê意願ài強，家長社群支持度mā kuân。董力玄表示，tī tsit-má tsit个少囝化ê社會，台語實驗學校凡勢是一種特色轉型ê機會。Lán mā ē-tàng要求政府訂定台語學校轉型辦法、提供語言加給、減課、協同鐘點補助等等ê政策。
董力玄提出結論：理想ê台語學校，絕對m̄是一兩冬就做ē到，tse lóng需要中央提供制度參資源，地方積極運作鼓勵。轉型初期，就算台語比例無夠kuân，mā已經有夠hōo學生ê語言能力明顯進步。長期來講，需要tháu放課綱、調整升學考試制度。
新北市議員黃淑君指出，提升學生ê台語閱讀、書寫能力tio̍h-ài khai時間。總--是，教育部台語認證逐年ê通過率愈來愈kuân，就有leh想講，教育部kám有為著beh hōo koh-khah濟人通過來放冗標準。Tse也致使講，教育現場kah台語界ê思考有小可仔精差。
後一間台語學校ê挑戰
透過tsit場論壇，lán看著高雄北嶺國小tsiânn做全台灣頭一間台語實驗學校，tse已經行出關鍵ê頭一步。「台語浸水式教學」m̄-nā bē影響學科成績，顛倒提升學生ê學習動機kah招生率。北嶺ê經驗證明，用台語做教學語言百面是ē行--得ê路。
總--是，beh複製tsit个成功經驗，生出「後一間台語學校」，目前iáu拄著真大ê挑戰。張博洋kah董力玄lóng指出，tsit-má資源分配無公平。客語、原住民族語lóng有中央專責機關（客委會、原民會）穩定ê經費來源，m̄-koh台語實驗教育目前kan-na靠地方政府ê預算，甚至教師備課、轉譯教材ê辛苦lóng無對應ê津貼，tse對長期ê發展來講是真大ê問題。
董力玄強調，學校ê轉型需要有系統ê「SOP」。Tuì師資ê培力、課室語言ê建立，到專案教師ê入班協助，tse lóng需要時間kah制度ê支持。中央應該ài訂定明確ê轉型辦法，提供語言加給kah輔導資源，hōo有意願ê小型學校ē-tàng安心轉型。
「後一間台語學校」bē-tàng kan-na靠民間ê熱情kah地方來做。教育部也ài負責任，提供法規kah資源來支持，配合地方社區ê強烈意願，tsiah有可能hōo台語學校tuì「一間」變做「一區一間」，hōo lán ê囡仔有法度tī台語ê環境中自信學習。
