掠蜂
/ 阿仁--ā
(作者是荷蘭Leiden大學ê語言學者， m̄甘台語斷根，kah兩个囡仔講台語)
9--月，tsit幾工仔反天--ah。Bē講kài寒，m̄-koh日頭khah罕得探頭kā陸地tshiō hōo溫燒，若有khah大港ê風吹--來，有tang時仔mā ē ka-lún-sún，阮兜就khah少去後埕食茶--ah。阮蹛一間三層樓ê透天厝，tī荷蘭ê「tsiánn水湖市」過日子。荷蘭語名是Zoetermeer，Zoet是「甜」、meer是「湖」ê意思，Zoetermeer字面上就是「tsiánn水湖」，講khah笑詼--leh kā號做「tsiánn水湖市」。
頂禮拜阮牽--ê問我講，kám有發見三樓ê洗衫間兼倉庫hit間房間內底，有兩、三隻角蜂tī窗仔框趖來趖去。我確實有看--著，想講無定是tńg寒ê關係，hia-ê蜂 tsiah nǹg縫bih tī室內kheh燒，koh拄好揣著阮兜上燒ê一間。
阮兜有兩个iáu無四歲ê囡仔，ài洗ê衫一大堆免講，細漢--ê九個月倚十個月，有leh用布尿tsū仔（m̄是免洗ê hit款），洗衫機kiōng-kiōng逐工leh pháng。Koh加上阮舊年搬--入-來了買ê烘衫機，使用機率bē輸洗衫機，就thang知影hit間房間偌nī仔hip kah燒。
Kā阮某講hia-ê蟲thuā kan-na知影走入來kheh燒bih雨，suah m̄知按怎飛--出-去，我kā窗仔門開--開就好。行tsiūnn樓開洗衫間ê門，隨聽著蜂仔hinn-hinn叫kā我迎接（ngiâ-tsih）。洗衫間兼做倉庫，窗仔門前排幾跤紙箱仔，是阮搬--入-來ê時m̄知beh囥tueh，就bóng囥tī hia，到tann beh一冬--ah，lóng無kha̍p--著。Kā搬走，koh發現五、六隻餓--死--ê —— 有koh-khah濟--ooh？橫直窗仔門開開--leh kā tng iau ê hit陣放生就準煞。
過--幾-日-仔，經過洗衫間ê玻璃門，目尾影著一隻。Koh過--兩-工入去beh khe̍h寡mi̍h件，tn̄g著十thóng隻lóng踮窗仔門ê玻璃leh看外口。Tse tsiah是奇，最近khah無leh落雨，天氣mā khah燒lō--ah，內底哪ē雄雄hiah濟隻？
隔tńg工tī大學備課，阮牽手寄訊息hōo--我，講阮兜應該有蜂siū tsiah tio̍h。伊有tī網路頂查著除蟲專家，網路有寫講tshiànn專家進前ài先揣siū tī佗位，上簡單ê方式是趁好天徛外口斟酌siòng厝，蜂ê翼ē反射光線，ia̍t ê時看著金siak-siak。伊講tsiânn緊就揣有，siū踮天頂窗下跤半公尺ê所在，蜂無làng斷對 hia ê瓦phuè仔nǹg--入-去。牽--ê mā已經hām掠蜂gâu人聯絡好勢--ah ——講阮某khiàng mā無啥mih m̄-tio̍h，有緣娶著伊是我tsit世人ê福氣。
掠蜂--ê kan-na暗時有閒來看，最近in khang-khuè siunn濟，時間排kah ti̋nn-tīnn-tīnn，lóng是因為亞洲來ê虎頭蜂，俗稱「黃跤仔」，來到荷蘭--ah。Tī歐洲，黃跤仔是侵入物種，tsit世紀初按中國坐船來到法國西南部，tsua̋nn uì hia開始生湠。歐盟有規定講ài消除，iáu-m̄-koh，黃跤仔湠了siunn緊，早就無法度控制--ah。法國、英國、白耳義（Pi̍k-ní-gī，『比利時』）、意大利、伊比利半島ê北部lóng無法度消滅--ah。
掠蜂gâu人來阮兜hit暗，牽手tshuā紅嬰仔去睏，我有提早kā阮三歲ê後生huan咐講，等--leh ē有人來，踮三樓kā阿爸tàu處理角蜂ê代誌，伊ē-sái tuè阮起--去，m̄-koh bē-sái jû，ài聽喙，萬不二去hōo角蜂叮--著就慘--ah。
伊tsiânn hònn玄，有生份人來阮兜做khang-khuè，hōo伊暢kah坐bē tiâu。電鈴聲tân ê時，伊跳--起-來，對大門口tsông--去，ná走ná huah講伊beh家己開門。其實--honnh，門tshuànn tìm-táu，三歲ê伊根本to搬bē tín動，uân-á需要阿爸出馬替伊開。伊tsit改khah乖，khah聽話。阮爸仔囝hōo掠蜂gâu人入--來，tshuā起去三樓ê洗衫間。
Beh sio戰進前，掠蜂--ê tio̍h-ài kā戰甲穿好勢、武器掠ân，tsiah來tsiūnn戰場。伊身軀穿防蜂服，是hit種飼蜜蜂--ê穿ê有掛帽仔ê衫。伊手攑一支噴霧器beh kā蜂thāu--死，行對窗仔門，kā開--開，坐踮窗仔框頂半身伸出去對蜂siū噴毒。隨有真濟角蜂hōng-hōng sì-kè飛。
掠蜂--ê噴煞，koh入來kā窗仔門關hōo bā，越頭kā阮後生kah我講，若是想beh看，ē-sái去後埕，uì hia看khah有。查埔囝暢kah直接tsông落樓，ná huānn手huānn仔，ná半荷蘭語半台語huah：「Papa, kom, khuànn phang, khuànn phang!」（阿爸，來，看蜂，看蜂！）是leh hiàm我tuè伊落去看角蜂。
講實在--ê，我mā tsiok想beh看。後生tshóng-tshóng-pōng-pōng，我tuè伊kha-tshng後，tī頭一段樓梯kā khiú過來行tī頭前，驚伊暢kah跤一下踏tîng-tânn，去hōo tshu--lueh。
到一樓，後生鞋仔to m̄看，tshûn-pān赤跤出門。我kā抱--起-來，柴鞋long--leh，就出去後埕，看三樓ê厝瓦頂面有一片烏雲hōng-hōng掛tī天頂，按瓦phuè仔縫有一條蜂河流入hit片雲，ná像厝頂leh tshìng煙。蜂m̄知幾千隻，sì-kè走，雲tuè leh湠，愈湠愈大片，到一个坎站，像一粒玻璃球碎--去，無koh成雲--ah。
雄雄有「蜂球phuè仔」對阮爸仔囝飛--落-來，後生無出聲，我趕緊tsông對後門去，入--去了kā門tong--一-聲關--起-來。佳哉kan-na兩三隻tuè阮nǹg--入-來，其他--ê lóng隔踮外口。我kā後生放--lueh，拍東趕西，一隻uì開--leh ê窗仔門走--出-去，siāng時上尾隻hām我釘孤枝，kā我叮tī kha-tsiah-phiann後壁。我雙手烏白phiat、烏白pué，拍著hōo蜂叮--著ê所在，結果hit時蜂仔飛去手ē-tsat koh叮一改。Tse是伊上尾擺kā人叮，無過一屑仔久，別肢手kā siàn hōo扁扁扁。
掠蜂--ê tsiâu有看--著，tsiânn關心--我，問講有過敏--無。我應無——應該是無--lah，細漢ê時tsūn bat hōo蜜蜂叮--著，啊角蜂--leh？無印象。Hōo角蜂叮--著mā無我想像--ê hiah疼，khah輸注兩射，hōo兩枝針tsha̍k--著。
無疼kah，suah bē記得kā毒suh--出-來，致使隔tńg工叮--著ê hit兩位ê肉硬--起-來，皮膚底癢著beh扒mā無tè扒，過兩禮拜thóng tsiah煞。雖bóng去hōo叮--著無hiah疼，uân-á建議逐家若tn̄g著ak-tsak ê蜂iáu是mài接近、保持距離tsiah tio̍h，安全第一。
頂禮拜阮牽--ê問我講，kám有發見三樓ê洗衫間兼倉庫hit間房間內底，有兩、三隻角蜂tī窗仔框趖來趖去。我確實有看--著，想講無定是tńg寒ê關係，hia-ê蜂 tsiah nǹg縫bih tī室內kheh燒，koh拄好揣著阮兜上燒ê一間。
阮兜有兩个iáu無四歲ê囡仔，ài洗ê衫一大堆免講，細漢--ê九個月倚十個月，有leh用布尿tsū仔（m̄是免洗ê hit款），洗衫機kiōng-kiōng逐工leh pháng。Koh加上阮舊年搬--入-來了買ê烘衫機，使用機率bē輸洗衫機，就thang知影hit間房間偌nī仔hip kah燒。
Kā阮某講hia-ê蟲thuā kan-na知影走入來kheh燒bih雨，suah m̄知按怎飛--出-去，我kā窗仔門開--開就好。行tsiūnn樓開洗衫間ê門，隨聽著蜂仔hinn-hinn叫kā我迎接（ngiâ-tsih）。洗衫間兼做倉庫，窗仔門前排幾跤紙箱仔，是阮搬--入-來ê時m̄知beh囥tueh，就bóng囥tī hia，到tann beh一冬--ah，lóng無kha̍p--著。Kā搬走，koh發現五、六隻餓--死--ê —— 有koh-khah濟--ooh？橫直窗仔門開開--leh kā tng iau ê hit陣放生就準煞。
過--幾-日-仔，經過洗衫間ê玻璃門，目尾影著一隻。Koh過--兩-工入去beh khe̍h寡mi̍h件，tn̄g著十thóng隻lóng踮窗仔門ê玻璃leh看外口。Tse tsiah是奇，最近khah無leh落雨，天氣mā khah燒lō--ah，內底哪ē雄雄hiah濟隻？
隔tńg工tī大學備課，阮牽手寄訊息hōo--我，講阮兜應該有蜂siū tsiah tio̍h。伊有tī網路頂查著除蟲專家，網路有寫講tshiànn專家進前ài先揣siū tī佗位，上簡單ê方式是趁好天徛外口斟酌siòng厝，蜂ê翼ē反射光線，ia̍t ê時看著金siak-siak。伊講tsiânn緊就揣有，siū踮天頂窗下跤半公尺ê所在，蜂無làng斷對 hia ê瓦phuè仔nǹg--入-去。牽--ê mā已經hām掠蜂gâu人聯絡好勢--ah ——講阮某khiàng mā無啥mih m̄-tio̍h，有緣娶著伊是我tsit世人ê福氣。
掠蜂--ê kan-na暗時有閒來看，最近in khang-khuè siunn濟，時間排kah ti̋nn-tīnn-tīnn，lóng是因為亞洲來ê虎頭蜂，俗稱「黃跤仔」，來到荷蘭--ah。Tī歐洲，黃跤仔是侵入物種，tsit世紀初按中國坐船來到法國西南部，tsua̋nn uì hia開始生湠。歐盟有規定講ài消除，iáu-m̄-koh，黃跤仔湠了siunn緊，早就無法度控制--ah。法國、英國、白耳義（Pi̍k-ní-gī，『比利時』）、意大利、伊比利半島ê北部lóng無法度消滅--ah。
掠蜂gâu人來阮兜hit暗，牽手tshuā紅嬰仔去睏，我有提早kā阮三歲ê後生huan咐講，等--leh ē有人來，踮三樓kā阿爸tàu處理角蜂ê代誌，伊ē-sái tuè阮起--去，m̄-koh bē-sái jû，ài聽喙，萬不二去hōo角蜂叮--著就慘--ah。
伊tsiânn hònn玄，有生份人來阮兜做khang-khuè，hōo伊暢kah坐bē tiâu。電鈴聲tân ê時，伊跳--起-來，對大門口tsông--去，ná走ná huah講伊beh家己開門。其實--honnh，門tshuànn tìm-táu，三歲ê伊根本to搬bē tín動，uân-á需要阿爸出馬替伊開。伊tsit改khah乖，khah聽話。阮爸仔囝hōo掠蜂gâu人入--來，tshuā起去三樓ê洗衫間。
Beh sio戰進前，掠蜂--ê tio̍h-ài kā戰甲穿好勢、武器掠ân，tsiah來tsiūnn戰場。伊身軀穿防蜂服，是hit種飼蜜蜂--ê穿ê有掛帽仔ê衫。伊手攑一支噴霧器beh kā蜂thāu--死，行對窗仔門，kā開--開，坐踮窗仔框頂半身伸出去對蜂siū噴毒。隨有真濟角蜂hōng-hōng sì-kè飛。
掠蜂--ê噴煞，koh入來kā窗仔門關hōo bā，越頭kā阮後生kah我講，若是想beh看，ē-sái去後埕，uì hia看khah有。查埔囝暢kah直接tsông落樓，ná huānn手huānn仔，ná半荷蘭語半台語huah：「Papa, kom, khuànn phang, khuànn phang!」（阿爸，來，看蜂，看蜂！）是leh hiàm我tuè伊落去看角蜂。
講實在--ê，我mā tsiok想beh看。後生tshóng-tshóng-pōng-pōng，我tuè伊kha-tshng後，tī頭一段樓梯kā khiú過來行tī頭前，驚伊暢kah跤一下踏tîng-tânn，去hōo tshu--lueh。
到一樓，後生鞋仔to m̄看，tshûn-pān赤跤出門。我kā抱--起-來，柴鞋long--leh，就出去後埕，看三樓ê厝瓦頂面有一片烏雲hōng-hōng掛tī天頂，按瓦phuè仔縫有一條蜂河流入hit片雲，ná像厝頂leh tshìng煙。蜂m̄知幾千隻，sì-kè走，雲tuè leh湠，愈湠愈大片，到一个坎站，像一粒玻璃球碎--去，無koh成雲--ah。
雄雄有「蜂球phuè仔」對阮爸仔囝飛--落-來，後生無出聲，我趕緊tsông對後門去，入--去了kā門tong--一-聲關--起-來。佳哉kan-na兩三隻tuè阮nǹg--入-來，其他--ê lóng隔踮外口。我kā後生放--lueh，拍東趕西，一隻uì開--leh ê窗仔門走--出-去，siāng時上尾隻hām我釘孤枝，kā我叮tī kha-tsiah-phiann後壁。我雙手烏白phiat、烏白pué，拍著hōo蜂叮--著ê所在，結果hit時蜂仔飛去手ē-tsat koh叮一改。Tse是伊上尾擺kā人叮，無過一屑仔久，別肢手kā siàn hōo扁扁扁。
掠蜂--ê tsiâu有看--著，tsiânn關心--我，問講有過敏--無。我應無——應該是無--lah，細漢ê時tsūn bat hōo蜜蜂叮--著，啊角蜂--leh？無印象。Hōo角蜂叮--著mā無我想像--ê hiah疼，khah輸注兩射，hōo兩枝針tsha̍k--著。
無疼kah，suah bē記得kā毒suh--出-來，致使隔tńg工叮--著ê hit兩位ê肉硬--起-來，皮膚底癢著beh扒mā無tè扒，過兩禮拜thóng tsiah煞。雖bóng去hōo叮--著無hiah疼，uân-á建議逐家若tn̄g著ak-tsak ê蜂iáu是mài接近、保持距離tsiah tio̍h，安全第一。
