自鬼仔古講起：
鬼魂書寫hām歷史記持
主講／張嘉祥
記錄／蔡玉薰
本文是2026/2/11講座ê記錄，講師張嘉祥是庄尾文化聲音工作室ê負責人兼台語獨立樂團「裝咖人Tsng-kha-lâng」ê團長，現場mā邀請樂團ê朱雨民gì-tà伴奏，用講唱會ê方式來紹介作品《夜官巡場》ê創作理路。
文學到音樂
張嘉祥是嘉義縣民雄鄉豐收村ê人，自高中就有leh寫文學作品，suà--落-來大學ê本科是東華大學華文系。伊kan-na tī學校ê社團sńg音樂niā-niā，音樂ê底無hiah-nī仔好，m̄-koh看著美國歌手Bob Dylan提著文學獎，伊做一个文學人mā ē-sái來做音樂--啊！——就是án-ne簡單ê想法，hōo伊uì文學來踏入音樂創造ê世界。
火燒庄
豐收村ê舊地名是「火燒庄」，號tsit个名ê理由有tsiânn濟：譬論講，便若熱--人，庄頭ê天氣就bē輸火leh燒仝款，hiah-nī燒熱。Tī《嘉義縣誌》有寫講火燒庄原底是太平庄，因為動亂hōo官府放火燒庄tsiah改庄頭ê名。伊koh有訪問in阿公，阿公講舊底ê庄頭是客人仔庄（張嘉祥補充：伊mā感覺tsiânn奇，in hia lóng講台灣話khah濟），hām土匪來起衝突，總hōo in放火燒--去。
張嘉祥揣著濟濟ê文本kah序大人口述ê資料，並m̄是為著beh參人理論啥mi̍h是事實，伊m̄是beh做歷史學問，tsit-lō辯論對伊來講m̄是上要緊ê代誌。做一个小說家，伊beh uì tsia-ê鬥bē bā ê「làng縫」來kah歷史「對話」，來探討家己出身故鄉ê歷史，tsit款「對話」，mā就是伊創作ê手路之一。
《夜官巡場》
Tsit本小說kah仝名ê專輯是仝一个時期創作--ê，主要是描寫張嘉祥伊個人、in家族kah故鄉ê歷史，除了台灣，mā有tī法國kah韓國出版，tsiânn趣味--ê是獨獨法國版本是用「民雄鬼仔厝（劉--家古厝）」ê相來做冊皮。張嘉祥分享，ē án-ne安排是因為對法國人來講，台灣是一个熱帶小島，若是tī冊皮無看著tsit款「熱帶小島」ê台灣味，kan-na看台灣版／韓國版冊皮ê圖，ē hōo in當做是leh講佛教ê冊。所擺揀一張「有大欉樹仔、古早款koh有神祕感ê民雄鬼仔厝」ê相，in khah ē-sái理解tsit本冊是leh寫熱帶國家ê鬼仔故事。
〈自頭講起〉
張嘉祥自細漢就「看ē著」，tī〈自頭講起〉tsit个作品有講著過去tī厝內便所看著玉女ê經驗，伊講tsit个玉女看著tsiok tsa̍t腹，無成人講ê鬼ē透光，伊無法度假做無看著玉女，一直想講beh按怎解sueh tsit个狀況。細漢時kā阿母講，結果hōo人拖去收驚，講伊是去hōo瘟神煞--著，大漢了後透過書寫，tsiah發覺講有矛盾，玉女hām瘟神其實無啥交tshap。
Tsit个經驗mā激出伊想beh用無仝款ê角度、專業來思考kah解sueh伊「看ē著」ê mi̍h件，beh講是宗教ê「神鬼」也好，是心理科學ê「幻覺」也好，甚至講是醫學ê「精神病」也好，tsia--ê lóng是伊ê「記持」。伊koh細膩仔解sueh講「記持（kì-tî）」tsit兩字是「記憶維持（î-tshî）」，記憶ài去維持，tsiah有法度tsiânn做記持，tse lóng是伊創作ê養份。
〈水流媽〉
張嘉祥in故鄉ê庄頭uì五穀王廟ê四箍liàn-tńg開始發展，庄頭外圍仔有khah危險ê所在，譬論講水溝仔邊，tiānn lóng ē看著有細間廟踮hia，iah是有人tī hia leh拜拜。若是依宗教來講，應當有鬼神踮tī hia，若換做是心理科學，就是tī危險ê所在總是ài hōo人有一个保平安ê寄託——tse就是lán台灣tsiânn普遍ê水流公／水流媽信仰。
In庄仔頭ê上kài出名、ē kā人報明牌ê水流媽廟，伊ê廟是信徒tio̍h大獎來還願起--ê，聽講是日本時代，有人khioh著一粒m̄知是查埔iah是查某ê頭殼骨，就kā囥tī甕仔內leh拜。後--來，有一對母仔囝騎動輪車跋落去一條溝仔——hit時ê橋無tsit-má--ê tsiah勇，人若跋落溝仔是穩死--ê ——tsit對母仔囝suah講，有一个查某人kā救--起-來，講是水流媽顯聖。所擺，廟--裡看著tsit个故事ê圖頂頭ê水流媽是查某人ê形。
拄仔好，張嘉祥in兜ê豬tiâu就tī一間廟對面，in老母不時ē去拜拜，伊mā kā in母--à纏leh問講：「水流媽到底是查埔--ê iah是查某--ê？」M̄知in老母是有影知影iah是leh kā唬，就應伊講：「水流媽是查埔--ê。」Tsit款衝突又koh hōo伊思考到底啥人講--ê tsiah是正確--ê，in老母kám知影家己leh拜啥mi̍h？Iah是連水流媽mā m̄知伊家己到底是啥人？
Tī小說〈水流媽〉內底，張嘉祥kā「水流媽」設定是查埔--ê，伊想講若家己是一个水流屍，ē想beh做啥mi̍h，kám是beh揣厝來tńg？Iah是踮一个生份ê所在leh報明牌？另外，〈水流媽〉tsit條歌ê曲是uì北管〈新普天樂〉來--ê，通常〈新普天樂〉是做行路、扒船koh有情景轉換ê配樂，船kah水有關係，所擺tsiah以tsit个曲來改編，用「水」kā音樂kah文字牽--起-來。
〈林秀媚〉
張嘉祥hām厝內無講tsiok親近，伊感覺家己逃避厝--裡tsit个情形，bē輸是台灣社會逃避講二二八kah白色恐怖tsit兩个事實。伊讀相關ê口述歷史，心肝內除了艱苦，koh有一款無奈ê感覺，想beh為tsia-ê民主前輩ke做寡代誌，就uì文字kah音樂ê創作起步。
〈林秀媚〉ê創作，是uì一篇林秀媚寫講伊看著翁婿盧 欽半暝tńg來厝內，phak tī桌頂leh háu ê文章開始。二二八hit當時，盧 欽知影陳澄波kah其他議員hōo人掠--去，認為家己做一个ē-hiáu北京話ê人，有義務去kā in tàu-sann-kāng、kah國民政府對話，m̄-koh suah tī路--裡mā hōo人押--去，就無koh tńg去厝--裡。Hit時流傳一句「放火--ê走--去，救火--ê hōo人拍--死」，林秀媚tsiânn清楚了解家己ê翁婿是hōo無講理ê政府刣--死--ê，mā tī盧 欽ê墓頂頭寫『死在歷史上』。
當初beh透過二二八事件來寫小說ê時，張嘉祥mā有去揣二二八事件紀念基金會，勞煩in tàu牽線，得著林秀媚後代ê同意tsiah來創作。另外，歌曲內底ê口白、祭文mā是聽著陳明章老師ê〈祭孤魂〉tsiah有ê想法。伊認為文字、音樂、表演藝術是beh hōo每一个「人」看--ê，希望家己ê創作ē-sái拍開對話ê窗，hōo人bē kan-na用一个角度來看鬼魂／歷史。
《夜官巡場Iā-Kuan Sûn-Tiûnn》
作者： 張嘉祥
ISBN：9789864504688
出版社：九歌
出版日期：2022/7/30
定價：NT$ 340
文學到音樂
張嘉祥是嘉義縣民雄鄉豐收村ê人，自高中就有leh寫文學作品，suà--落-來大學ê本科是東華大學華文系。伊kan-na tī學校ê社團sńg音樂niā-niā，音樂ê底無hiah-nī仔好，m̄-koh看著美國歌手Bob Dylan提著文學獎，伊做一个文學人mā ē-sái來做音樂--啊！——就是án-ne簡單ê想法，hōo伊uì文學來踏入音樂創造ê世界。
火燒庄
豐收村ê舊地名是「火燒庄」，號tsit个名ê理由有tsiânn濟：譬論講，便若熱--人，庄頭ê天氣就bē輸火leh燒仝款，hiah-nī燒熱。Tī《嘉義縣誌》有寫講火燒庄原底是太平庄，因為動亂hōo官府放火燒庄tsiah改庄頭ê名。伊koh有訪問in阿公，阿公講舊底ê庄頭是客人仔庄（張嘉祥補充：伊mā感覺tsiânn奇，in hia lóng講台灣話khah濟），hām土匪來起衝突，總hōo in放火燒--去。
張嘉祥揣著濟濟ê文本kah序大人口述ê資料，並m̄是為著beh參人理論啥mi̍h是事實，伊m̄是beh做歷史學問，tsit-lō辯論對伊來講m̄是上要緊ê代誌。做一个小說家，伊beh uì tsia-ê鬥bē bā ê「làng縫」來kah歷史「對話」，來探討家己出身故鄉ê歷史，tsit款「對話」，mā就是伊創作ê手路之一。
《夜官巡場》
Tsit本小說kah仝名ê專輯是仝一个時期創作--ê，主要是描寫張嘉祥伊個人、in家族kah故鄉ê歷史，除了台灣，mā有tī法國kah韓國出版，tsiânn趣味--ê是獨獨法國版本是用「民雄鬼仔厝（劉--家古厝）」ê相來做冊皮。張嘉祥分享，ē án-ne安排是因為對法國人來講，台灣是一个熱帶小島，若是tī冊皮無看著tsit款「熱帶小島」ê台灣味，kan-na看台灣版／韓國版冊皮ê圖，ē hōo in當做是leh講佛教ê冊。所擺揀一張「有大欉樹仔、古早款koh有神祕感ê民雄鬼仔厝」ê相，in khah ē-sái理解tsit本冊是leh寫熱帶國家ê鬼仔故事。
〈自頭講起〉
張嘉祥自細漢就「看ē著」，tī〈自頭講起〉tsit个作品有講著過去tī厝內便所看著玉女ê經驗，伊講tsit个玉女看著tsiok tsa̍t腹，無成人講ê鬼ē透光，伊無法度假做無看著玉女，一直想講beh按怎解sueh tsit个狀況。細漢時kā阿母講，結果hōo人拖去收驚，講伊是去hōo瘟神煞--著，大漢了後透過書寫，tsiah發覺講有矛盾，玉女hām瘟神其實無啥交tshap。
Tsit个經驗mā激出伊想beh用無仝款ê角度、專業來思考kah解sueh伊「看ē著」ê mi̍h件，beh講是宗教ê「神鬼」也好，是心理科學ê「幻覺」也好，甚至講是醫學ê「精神病」也好，tsia--ê lóng是伊ê「記持」。伊koh細膩仔解sueh講「記持（kì-tî）」tsit兩字是「記憶維持（î-tshî）」，記憶ài去維持，tsiah有法度tsiânn做記持，tse lóng是伊創作ê養份。
〈水流媽〉
張嘉祥in故鄉ê庄頭uì五穀王廟ê四箍liàn-tńg開始發展，庄頭外圍仔有khah危險ê所在，譬論講水溝仔邊，tiānn lóng ē看著有細間廟踮hia，iah是有人tī hia leh拜拜。若是依宗教來講，應當有鬼神踮tī hia，若換做是心理科學，就是tī危險ê所在總是ài hōo人有一个保平安ê寄託——tse就是lán台灣tsiânn普遍ê水流公／水流媽信仰。
In庄仔頭ê上kài出名、ē kā人報明牌ê水流媽廟，伊ê廟是信徒tio̍h大獎來還願起--ê，聽講是日本時代，有人khioh著一粒m̄知是查埔iah是查某ê頭殼骨，就kā囥tī甕仔內leh拜。後--來，有一對母仔囝騎動輪車跋落去一條溝仔——hit時ê橋無tsit-má--ê tsiah勇，人若跋落溝仔是穩死--ê ——tsit對母仔囝suah講，有一个查某人kā救--起-來，講是水流媽顯聖。所擺，廟--裡看著tsit个故事ê圖頂頭ê水流媽是查某人ê形。
拄仔好，張嘉祥in兜ê豬tiâu就tī一間廟對面，in老母不時ē去拜拜，伊mā kā in母--à纏leh問講：「水流媽到底是查埔--ê iah是查某--ê？」M̄知in老母是有影知影iah是leh kā唬，就應伊講：「水流媽是查埔--ê。」Tsit款衝突又koh hōo伊思考到底啥人講--ê tsiah是正確--ê，in老母kám知影家己leh拜啥mi̍h？Iah是連水流媽mā m̄知伊家己到底是啥人？
Tī小說〈水流媽〉內底，張嘉祥kā「水流媽」設定是查埔--ê，伊想講若家己是一个水流屍，ē想beh做啥mi̍h，kám是beh揣厝來tńg？Iah是踮一个生份ê所在leh報明牌？另外，〈水流媽〉tsit條歌ê曲是uì北管〈新普天樂〉來--ê，通常〈新普天樂〉是做行路、扒船koh有情景轉換ê配樂，船kah水有關係，所擺tsiah以tsit个曲來改編，用「水」kā音樂kah文字牽--起-來。
〈林秀媚〉
張嘉祥hām厝內無講tsiok親近，伊感覺家己逃避厝--裡tsit个情形，bē輸是台灣社會逃避講二二八kah白色恐怖tsit兩个事實。伊讀相關ê口述歷史，心肝內除了艱苦，koh有一款無奈ê感覺，想beh為tsia-ê民主前輩ke做寡代誌，就uì文字kah音樂ê創作起步。
〈林秀媚〉ê創作，是uì一篇林秀媚寫講伊看著翁婿盧 欽半暝tńg來厝內，phak tī桌頂leh háu ê文章開始。二二八hit當時，盧 欽知影陳澄波kah其他議員hōo人掠--去，認為家己做一个ē-hiáu北京話ê人，有義務去kā in tàu-sann-kāng、kah國民政府對話，m̄-koh suah tī路--裡mā hōo人押--去，就無koh tńg去厝--裡。Hit時流傳一句「放火--ê走--去，救火--ê hōo人拍--死」，林秀媚tsiânn清楚了解家己ê翁婿是hōo無講理ê政府刣--死--ê，mā tī盧 欽ê墓頂頭寫『死在歷史上』。
當初beh透過二二八事件來寫小說ê時，張嘉祥mā有去揣二二八事件紀念基金會，勞煩in tàu牽線，得著林秀媚後代ê同意tsiah來創作。另外，歌曲內底ê口白、祭文mā是聽著陳明章老師ê〈祭孤魂〉tsiah有ê想法。伊認為文字、音樂、表演藝術是beh hōo每一个「人」看--ê，希望家己ê創作ē-sái拍開對話ê窗，hōo人bē kan-na用一个角度來看鬼魂／歷史。
《夜官巡場Iā-Kuan Sûn-Tiûnn》
作者： 張嘉祥
ISBN：9789864504688
出版社：九歌
出版日期：2022/7/30
定價：NT$ 340
