雙手抱孩兒，
tsiah知爸母時
/ 顧怡君
查某人kap姊妹仔伴無聊bóng phò-tāu ê時，講天講地講kah規飯lē，sian講to講bē siān ê代誌就是in生囝ê經驗。有一句話講：「生贏雞酒芳，生輸四塊枋。」規欉好好——無錯，查某人生囝bē輸kap閻羅王leh khiú大索siāng款。生囝tsit項代誌對我來講，就有一擺真深刻ê體驗。
我有兩个後生，頭tsiūnn仔khah細粒子，無艱苦偌久就生--ah。M̄-koh，我beh生第二胎ê時，真正是阿婆--à生囝——tsiânn拚--leh。Iáu ē記得hit工，我hông sak入去產房了後，醫生就先用超音波檢查囡仔ê狀況，tsiah發見坐胎無正，囡仔睏坦笑，m̄是掠坦phak ê姿勢。最後，醫生決定beh tī我催tsūn ê時，伸手入去產道內底tńg-se̍h囡仔ê頭，按算beh kā胎位tshiâu好勢，hōo囡仔khah好生。講著khah簡單，lín kám知影hit-lō疼，ē hōo人疼kah hainn-hainn-tshan，哀kah ná像leh刣豬仝款，實在有夠悽慘--ê。
Án-ne koh--無-打-緊，tuè tī主治醫生身軀邊實習ê少年醫生mā想beh臨床試驗看按怎kā胎位tshiâu hōo正。Tann害--looh！我哪ē tsiah歹命！我又koh疼又koh驚，驚生產ê時間若是thōng siunn久，萬不二囡仔tio̍h腦性麻痺是beh按怎？我哀求醫生趕緊替我手術，mài koh tshiâu--落-去--ah。醫生本底掛保證講：「M̄免驚，liam-mi就ê tsiânn。」想bē到，我tsit箍寶貝仔囝suah一下手koh翻tńg身，頭前我所忍受ê拖磨到tann lóng是無彩工。醫生tsit聲tsiah nauh講：「Tsit个囡仔siunn 狡怪--ah，lán tio̍h-ài趕緊準備開刀。」
Thìng候醫生破腹一下看，tsiah tio̍h驚講囡仔頷頸phua̍h數珠，已經箍一輾--ah，好佳哉囡仔落尾平安出世。Tńg臍了後，護理師kā囡仔抱來hōo我看，叫我定著ài kā伊拍kha-tshng，因為害阿母ê命kiōng-kiōng beh休--去。天下爸母心，甘願家己吞忍，m̄甘囝兒受苦，我ǹg望tsit个囡仔ē-tàng平平安安，順序gâu大漢，拍kha-tshng ê代誌就準拄好。
生囝是查某人一世人ê大代誌，uì十月懷胎到囡仔出世，tse對阮來講lóng是重大ê考驗，我相信tse是查埔人永遠to體會bē著--ê。「雙手抱孩兒，tsiah知爸母時」，我tsit-má已經深深認bat著tsit个道理--ah。
我有兩个後生，頭tsiūnn仔khah細粒子，無艱苦偌久就生--ah。M̄-koh，我beh生第二胎ê時，真正是阿婆--à生囝——tsiânn拚--leh。Iáu ē記得hit工，我hông sak入去產房了後，醫生就先用超音波檢查囡仔ê狀況，tsiah發見坐胎無正，囡仔睏坦笑，m̄是掠坦phak ê姿勢。最後，醫生決定beh tī我催tsūn ê時，伸手入去產道內底tńg-se̍h囡仔ê頭，按算beh kā胎位tshiâu好勢，hōo囡仔khah好生。講著khah簡單，lín kám知影hit-lō疼，ē hōo人疼kah hainn-hainn-tshan，哀kah ná像leh刣豬仝款，實在有夠悽慘--ê。
Án-ne koh--無-打-緊，tuè tī主治醫生身軀邊實習ê少年醫生mā想beh臨床試驗看按怎kā胎位tshiâu hōo正。Tann害--looh！我哪ē tsiah歹命！我又koh疼又koh驚，驚生產ê時間若是thōng siunn久，萬不二囡仔tio̍h腦性麻痺是beh按怎？我哀求醫生趕緊替我手術，mài koh tshiâu--落-去--ah。醫生本底掛保證講：「M̄免驚，liam-mi就ê tsiânn。」想bē到，我tsit箍寶貝仔囝suah一下手koh翻tńg身，頭前我所忍受ê拖磨到tann lóng是無彩工。醫生tsit聲tsiah nauh講：「Tsit个囡仔siunn 狡怪--ah，lán tio̍h-ài趕緊準備開刀。」
Thìng候醫生破腹一下看，tsiah tio̍h驚講囡仔頷頸phua̍h數珠，已經箍一輾--ah，好佳哉囡仔落尾平安出世。Tńg臍了後，護理師kā囡仔抱來hōo我看，叫我定著ài kā伊拍kha-tshng，因為害阿母ê命kiōng-kiōng beh休--去。天下爸母心，甘願家己吞忍，m̄甘囝兒受苦，我ǹg望tsit个囡仔ē-tàng平平安安，順序gâu大漢，拍kha-tshng ê代誌就準拄好。
生囝是查某人一世人ê大代誌，uì十月懷胎到囡仔出世，tse對阮來講lóng是重大ê考驗，我相信tse是查埔人永遠to體會bē著--ê。「雙手抱孩兒，tsiah知爸母時」，我tsit-má已經深深認bat著tsit个道理--ah。
