Tapangʉ、Tfuya紀行
/ 林承翰
最近幾年，研究台灣歷史ê人愈來愈濟，相關ê論文mā一篇一篇刊出。因為án-ne，創作歷史小說無需要koh sì-kè走tsông來取材，去圖書館就ē-i̋ng得著tsiânn濟資料。M̄-koh，kan-na靠研究資料寫--出-來ê作品，tiānn hōo我感覺有欠缺，為著創作小說《越過群山》1，我去過阿里山幾若擺。其中，上重要--ê當然是去小說主角——高一生——生活上久ê所在，Tapangʉ（『達邦』）kah Tfuya（『特富野』）。
百外冬前，tsia ê公路無親像tsit-má hiah-nī濟，若beh去部落，上方便ê方法是坐林業鐵路到十字路車頭，koh步lián行--過-去。我mā是照tsit个路線，ná欣賞沿途風景，ná慢慢仔前往目的地。當然，火車母已經uì燒石炭變做食柴油，動力大到免koh需要經過Z字型ê鐵枝路來se̍h翻頭。
車頭到部落ê路已經鋪打馬膠，m̄免煩惱踏著漉糊糜，m̄-koh若認真觀察，iáu是ē-i̋ng揣著一寡無改變ê所在。親像se̍h獨立山幾若輾、鑽過幾若个磅空ê鐵枝路；路--裡有bat hông當做戰時軍糧、mā叫做山茼蒿ê「昭和草」，koh有出征ê時ài hâ--leh、做護身符ê「山芙蓉」。
Siāng款ê風景hōo我siam著高一生ê記憶，無仝款ê風景又koh hōo我思考tsit百外冬到底發生過啥mih代誌，雙跤tshuā領身軀向前行。順曾文溪水頭（bat號做長谷川溪），經過後大埔溪，koh行一塊仔路了後，視野雄雄開闊--起-來，山內一个平台頂、幾間古錐ê厝之間，幾个囡仔leh走sio-jiok。我tshiau揣頭殼中ê資料，發現無一項thang解sueh面前ê風景。Tsit个風景在時間kah空間以外，無屬tī任何所在。Uì tsia開始，換驚疑kah熟sāi tshuā我行過Tfuya，liâu過Iskiana（『伊斯基安娜』）溪，來到Tapangʉ ê民宿。
Kā行李卸--落-來，坐tī眠床小歇--一-下了後，我tsiah發現，hit个風景可能m̄是無tī-leh任何所在，是存在tī所有ê時空。Hit个風景，就叫做故鄉。Kah是m̄是出世、生長tī hia無關係，he是tī所有人心肝底ê故鄉。高一生絕對mā有體驗過仝款ê風景，無法度解sueh、mā m̄免解sueh，只ē-i̋ng用感受--ê。
後--來，我一步一步kā小說寫完，愈來愈確定hit个風景就是所謂ê故鄉。雖然一直到作品完成，入圍文學獎為止，我lóng無koh看著hit个風景，m̄-koh我知影，只要繼續走揣前人ê記憶，思考歷史ê變化，一定有法度koh一擺接近hit个風景。
百外冬前，tsia ê公路無親像tsit-má hiah-nī濟，若beh去部落，上方便ê方法是坐林業鐵路到十字路車頭，koh步lián行--過-去。我mā是照tsit个路線，ná欣賞沿途風景，ná慢慢仔前往目的地。當然，火車母已經uì燒石炭變做食柴油，動力大到免koh需要經過Z字型ê鐵枝路來se̍h翻頭。
車頭到部落ê路已經鋪打馬膠，m̄免煩惱踏著漉糊糜，m̄-koh若認真觀察，iáu是ē-i̋ng揣著一寡無改變ê所在。親像se̍h獨立山幾若輾、鑽過幾若个磅空ê鐵枝路；路--裡有bat hông當做戰時軍糧、mā叫做山茼蒿ê「昭和草」，koh有出征ê時ài hâ--leh、做護身符ê「山芙蓉」。
Siāng款ê風景hōo我siam著高一生ê記憶，無仝款ê風景又koh hōo我思考tsit百外冬到底發生過啥mih代誌，雙跤tshuā領身軀向前行。順曾文溪水頭（bat號做長谷川溪），經過後大埔溪，koh行一塊仔路了後，視野雄雄開闊--起-來，山內一个平台頂、幾間古錐ê厝之間，幾个囡仔leh走sio-jiok。我tshiau揣頭殼中ê資料，發現無一項thang解sueh面前ê風景。Tsit个風景在時間kah空間以外，無屬tī任何所在。Uì tsia開始，換驚疑kah熟sāi tshuā我行過Tfuya，liâu過Iskiana（『伊斯基安娜』）溪，來到Tapangʉ ê民宿。
Kā行李卸--落-來，坐tī眠床小歇--一-下了後，我tsiah發現，hit个風景可能m̄是無tī-leh任何所在，是存在tī所有ê時空。Hit个風景，就叫做故鄉。Kah是m̄是出世、生長tī hia無關係，he是tī所有人心肝底ê故鄉。高一生絕對mā有體驗過仝款ê風景，無法度解sueh、mā m̄免解sueh，只ē-i̋ng用感受--ê。
後--來，我一步一步kā小說寫完，愈來愈確定hit个風景就是所謂ê故鄉。雖然一直到作品完成，入圍文學獎為止，我lóng無koh看著hit个風景，m̄-koh我知影，只要繼續走揣前人ê記憶，思考歷史ê變化，一定有法度koh一擺接近hit个風景。
1編註：《越過群山》是作者創作ê華文小說，用小說ê型式描寫原住民曹族教育家高一生ê性命歷程，bat tī 2023年入圍第六屆台灣歷史小說獎創作獎。林承翰tī 2000年出世，是hit屆入圍作家內底上少年--ê。
