Siàu念葉國基先生
/ 張秀滿
熟sāi國基兄，是tī 1994 年，因為阮做伙tī聯合教會做禮拜。後--來，kap伊koh-khah熟sāi是 tī 1997年，我kap伊做伙tī多倫多台灣同鄉會做理事，阮兩个負責編輯同鄉會ê刊物《Together》1。Hit个時chūn m̄是電腦排版ê年代，我ē記得阮不時tī伊Churchhill ê厝，用鉸刀、用糊、用thè-puh做編輯ê khang-khòe，雖然是án-ne，阮編ê《Together》內容真豐富。
除了仝教會，做伙編輯《Together》，阮mā lóng是Toronto台文班ê成員，做伙編輯台語文刊物《台文通訊》。
Toronto台文班ti 1994年成立，台文作家陳雷，就是吳景裕醫師，每個月tùi Hamilton來Toronto教台語文，拄開始是tī聯合教會，有一段真長ê時間tī蘇正玄兄ê厝上課，mā有一段時間國基兄提供伊ê厝hō͘大家上課。
阮學台語文，因為阮知台語文是台灣文化ê根，是民族ê靈魂。阮學習羅馬字，希望台語文復興，大家ē-tàng「喙講爸母話，手寫台語文」。
Toronto ê台文班，tī 1999年受「聰美基金會」委託，承擔台語文刊物《台文通訊》ê編輯，chit个刊物一個月出一期，Toronto ê編輯團隊tùi 1999年10--月開始，lóng總編12冬，144期。編輯組差不多有七、八个人，我kap國基兄lóng是編輯組ê成員，每個月ē做伙開編輯會議。正玄兄、我kap國基兄bat前後擔任chit个刊物ê總編輯。
國基兄ê台語詩寫了真好，伊m̄免稿紙，m̄免電腦拍字，凊彩一張紙，伊就ē-tàng寫出一首真súi ê詩。
國基兄愛大自然，少年ê時伊行過台灣大大細細ê山，甚至行到原住民ê部落，一步一跤印，伊用雙跤感受對土地ê感情。伊有一首詩〈土地kap母奶〉，伊講「若講台灣是阿母，溪水就是母奶」。伊為台灣ê土地，寫愛情ê故事。
國基兄愛hip相，揹一台kha-mé-lah，伊sì-kè hip風景、hip生態、hip建築物、hip人相。伊參與台灣民主化ê街頭運動，伊hip規百張、規千張ê相片。Ē記得有一擺美國中西部台灣人夏令會，就請伊用伊hip ê相片，來講台灣民主化ê歷史。
國基兄真愛駛車，ē記得伊bat tùi Toronto駛去Vancouver，koh tùi無仝ê路線駛倒tńg--來，伊幾若擺駛三四日ê車去Nova Scotia chit个海邊ê小城市，看查某囝kap孫仔。有一擺做化療了後，伊感覺無啥mih副作用，伊就駛車向南去到Florida，來回駛八日。伊tī地圖看著Toronto ê西北爿，有一个小小ê庄頭叫Formosa，伊mā刁工駛兩點半鐘ê車去拜訪。所以chiah有chit張伊真滿意ê相片2。
國基兄愛講笑，7/4是伊ê生日，mā是美國ê國慶日，伊講伊ê生日，全美國lóng teh放煙火慶祝。
國基兄ē-hiáu做木，無師自通， koh講笑講伊kap耶穌基督是仝途--ê，伊m̄是做簡單ê木工，刻花刻了真súi。阮兜ê鞋櫥仔就是伊ê作品。
《台文通訊》最近teh慶祝35週年3，Toronto ê編輯組有koh再聚集，雄雄chiah感覺已經有三个人離開。阿旭兄、吳醫師、國基兄，想beh問，lín三个kám是tī天頂mā teh開編輯會議？Chit期ê文章kám有夠？若無夠，國基請你寫一首詩，來講你精彩ê一生。
除了仝教會，做伙編輯《Together》，阮mā lóng是Toronto台文班ê成員，做伙編輯台語文刊物《台文通訊》。
Toronto台文班ti 1994年成立，台文作家陳雷，就是吳景裕醫師，每個月tùi Hamilton來Toronto教台語文，拄開始是tī聯合教會，有一段真長ê時間tī蘇正玄兄ê厝上課，mā有一段時間國基兄提供伊ê厝hō͘大家上課。
阮學台語文，因為阮知台語文是台灣文化ê根，是民族ê靈魂。阮學習羅馬字，希望台語文復興，大家ē-tàng「喙講爸母話，手寫台語文」。
Toronto ê台文班，tī 1999年受「聰美基金會」委託，承擔台語文刊物《台文通訊》ê編輯，chit个刊物一個月出一期，Toronto ê編輯團隊tùi 1999年10--月開始，lóng總編12冬，144期。編輯組差不多有七、八个人，我kap國基兄lóng是編輯組ê成員，每個月ē做伙開編輯會議。正玄兄、我kap國基兄bat前後擔任chit个刊物ê總編輯。
國基兄ê台語詩寫了真好，伊m̄免稿紙，m̄免電腦拍字，凊彩一張紙，伊就ē-tàng寫出一首真súi ê詩。
國基兄愛大自然，少年ê時伊行過台灣大大細細ê山，甚至行到原住民ê部落，一步一跤印，伊用雙跤感受對土地ê感情。伊有一首詩〈土地kap母奶〉，伊講「若講台灣是阿母，溪水就是母奶」。伊為台灣ê土地，寫愛情ê故事。
國基兄愛hip相，揹一台kha-mé-lah，伊sì-kè hip風景、hip生態、hip建築物、hip人相。伊參與台灣民主化ê街頭運動，伊hip規百張、規千張ê相片。Ē記得有一擺美國中西部台灣人夏令會，就請伊用伊hip ê相片，來講台灣民主化ê歷史。
國基兄真愛駛車，ē記得伊bat tùi Toronto駛去Vancouver，koh tùi無仝ê路線駛倒tńg--來，伊幾若擺駛三四日ê車去Nova Scotia chit个海邊ê小城市，看查某囝kap孫仔。有一擺做化療了後，伊感覺無啥mih副作用，伊就駛車向南去到Florida，來回駛八日。伊tī地圖看著Toronto ê西北爿，有一个小小ê庄頭叫Formosa，伊mā刁工駛兩點半鐘ê車去拜訪。所以chiah有chit張伊真滿意ê相片2。
國基兄愛講笑，7/4是伊ê生日，mā是美國ê國慶日，伊講伊ê生日，全美國lóng teh放煙火慶祝。
國基兄ē-hiáu做木，無師自通， koh講笑講伊kap耶穌基督是仝途--ê，伊m̄是做簡單ê木工，刻花刻了真súi。阮兜ê鞋櫥仔就是伊ê作品。
《台文通訊》最近teh慶祝35週年3，Toronto ê編輯組有koh再聚集，雄雄chiah感覺已經有三个人離開。阿旭兄、吳醫師、國基兄，想beh問，lín三个kám是tī天頂mā teh開編輯會議？Chit期ê文章kám有夠？若無夠，國基請你寫一首詩，來講你精彩ê一生。
1編註：Chit个刊物ê中文名是《多城通訊》。
2編註：倒爿頁ê hit張相片。
3編註：《台文通訊》tī 1991年創刊、《台文BONG報》tī 1996年創刊，兩个刊物tī 2012年合刊做《台文通訊BONG報》，由李江却台語文教基金會繼續發行到taⁿ。今年（2026年）《台文通訊》35週年，時間包含2012年以後《台文通訊BONG報》ê時期。
2編註：倒爿頁ê hit張相片。
3編註：《台文通訊》tī 1991年創刊、《台文BONG報》tī 1996年創刊，兩个刊物tī 2012年合刊做《台文通訊BONG報》，由李江却台語文教基金會繼續發行到taⁿ。今年（2026年）《台文通訊》35週年，時間包含2012年以後《台文通訊BONG報》ê時期。
