懷念葉國基兄
/ 蘇正玄
葉國基兄是1950年7月初4 tī台北縣樹林鎮出世，今年5月15 tī台灣過身。伊是台北醫學院醫事技術系畢業。
國基tī中學ê時入去台灣長老教會，受洗chiâⁿ做一个虔誠ê基督徒。18歲ê時，就開始關心社會，想beh去山地服務。伊揣教會ê少年醫生kap醫學院ê同學，組織一个山地醫療公共衛生服務團隊，入去深山ê原住民部落服務 。Chit个khang-khòe，伊連sòa做五年。
1980年代，是台灣行向民主過程真重要ê年代，台灣街頭ê社會運動真濟，除了反威權ê民主運動以外，iáu有環保、勞工、農民、原住民種種ê運動。國基lóng有加入chia-ê運動，tī hia hip規十萬張ê街頭運動相片。
1994年6--月，國基為著兩个查某囝ê教育，移民來多倫多。伊來chia兩個月後，就加入多倫多台灣同鄉會，隔tńg年當選同鄉會委員，一直做到1998年。Chit个期間伊lóng是做同鄉會刊物《多城通訊》ê編輯，伊差不多每一期lóng ē寫一篇文章，大部份kap健康有關係。
1999年年初，伊擔任多倫多台灣同鄉會會長。仝hit年ê 6月底，伊去Vancouver參加加拿大台灣同鄉會（簡稱加台會）ê年會，tī hia當選加台會會長，伊同時兼兩个會長ê職務。加台會會長ê任期兩年，兩年中間伊辦過兩擺年會，一擺是2000年tī Kingston ê Queens大學。另外一擺是2001年tī Peterborough ê Trent大學舉行。Hit擺是kap多倫多《台文通訊》讀者聯誼會合辦，同時tī hia慶祝《台文通訊》10週年。年會ê節目非常豐富，除了討論台灣ê政治情勢，koh有台語文學ê演講kap表演，是一場文化氣味真重ê年會。
2000年年底，國基代表加台會去美國華府參加「世界台灣人大會 」（簡稱世大會）ê成立大會，tī hia kap各地來ê代表tī世大會ê會旗頂面簽名 。世大會是一个聯合海內外台灣人社團ê組織，伊ê目標是beh結合全世界台灣人ê力量，推動台灣ê國際參與、民間外交kap研討相關ê公共議題。國基bat參加過幾若擺由世大會kap台灣本土社團共同舉辦ê海內外台灣國是會議。
2011年，世界台灣同鄉會（簡稱世台會）ê年會tī Costa Rica（『哥斯大黎加』）ê首都San Jose（『聖荷西』）舉行，國基tī hia當選世台會會長。世台會是一个聯繫世界各地台灣同鄉會ê組織，每一冬lóng ē開年會。國基做四冬ê會長，辦過四擺年會。2012年ê年會是配合台灣總統選舉tī高雄舉行，會後koh有助選活動。2013 ê年會tī去Hawaii ê遊輪舉行。Koh來兩冬ê年會，一冬tī Hungary（『匈牙利』）ê Budapest（『布達佩斯』），另外一冬tī Turkey（『土耳其』）ê Istanbul（『伊斯坦堡』）舉行，lóng辦kah真成功。
國基mā真熱心參與多倫多台灣人社區ê事工，親像多倫多台灣人社團聯誼會ê khang-khòe、二二八記念會ê籌備種種ê活動。國基是加拿大台灣人權協會kap加拿大FAPA ê會員，tī加拿大替台灣做國民外交，提昇台灣ê能見度，為台灣加入聯合國kap世界衛生組織發聲。伊做過加拿大台灣衛生聯盟ê會長，bat去瑞士Geneva參加台灣加入WHO ê宣達活動。伊bat組織抗議中國霸權ê示威遊行，mā bat駛校車載多倫多ê同鄉去Ottawa抗議中國國家主席胡錦濤來加拿大訪問。伊mā ē去支援別个族群，親像Ukraine（『烏克蘭』）、Uyghurs（『維吾爾族』）、西藏人、香港人ê抗爭活動。
2000年，國基tī台灣經過當時ê台獨聯盟主席黃昭堂ê監誓，宣誓加入台灣獨立建國聯盟。2009年，伊當選台獨聯盟加拿大本部ê主席，為台灣獨立建國ê目標拍拚，一直做到伊過身。
國基bat做過《台文通訊》ê總編輯。《台文通訊》是一份台語文草根運動ê刊物，1991年tī美國加州創刊，1999年9--月徙來多倫多，多倫多ê《台文通訊》讀者聯誼會成立一个編輯小組來做編輯ê khang-khòe。國基tī 2004年1--月接任總編輯，一直做到2011年12--月《台文通訊》徙tńg去台灣。
國基真gâu寫台語詩，其中有四首是寫二二八ê詩。伊有一首詩《春天ê三角湧》是teh寫伊ê故鄉樹林ê隔壁庄三峽ê景致。台灣文學作家陳雷呵咾chit首詩寫了真好，伊講大部份ê詩lóng是teh寫心情，寫景ê詩真少，讀國基chit首詩ná親像teh欣賞一幅真súi ê圖。
國基多才多藝，真gâu唱歌，做過聖歌隊ê指揮。伊是一个handyman，ē-hiáu修理厝、鋪地板、做櫥櫃。伊真愛hip相，真gâu取景，是一位有職業水準ê攝影家。 伊有hip真濟群眾運動、示威遊行ê相片，為台灣人ê歷史留落來真寶貴ê記錄。
國基家己講伊ê一生真精彩，確實有影非常精彩，因為伊見--過ê世面真闊，參與過真濟台灣人ê代誌，熟sāi真濟人，交真濟朋友，去過真濟所在，hip真濟真súi ê相。
國基長期參與海外台灣人ê運動，奉獻真濟。伊kap林哲夫教授、陳雷醫師、陳星旭兄仝款，lóng是台灣精神ê代表。Lán感謝伊ê付出，真m̄甘伊離開，願伊安歇！
國基tī中學ê時入去台灣長老教會，受洗chiâⁿ做一个虔誠ê基督徒。18歲ê時，就開始關心社會，想beh去山地服務。伊揣教會ê少年醫生kap醫學院ê同學，組織一个山地醫療公共衛生服務團隊，入去深山ê原住民部落服務 。Chit个khang-khòe，伊連sòa做五年。
1980年代，是台灣行向民主過程真重要ê年代，台灣街頭ê社會運動真濟，除了反威權ê民主運動以外，iáu有環保、勞工、農民、原住民種種ê運動。國基lóng有加入chia-ê運動，tī hia hip規十萬張ê街頭運動相片。
1994年6--月，國基為著兩个查某囝ê教育，移民來多倫多。伊來chia兩個月後，就加入多倫多台灣同鄉會，隔tńg年當選同鄉會委員，一直做到1998年。Chit个期間伊lóng是做同鄉會刊物《多城通訊》ê編輯，伊差不多每一期lóng ē寫一篇文章，大部份kap健康有關係。
1999年年初，伊擔任多倫多台灣同鄉會會長。仝hit年ê 6月底，伊去Vancouver參加加拿大台灣同鄉會（簡稱加台會）ê年會，tī hia當選加台會會長，伊同時兼兩个會長ê職務。加台會會長ê任期兩年，兩年中間伊辦過兩擺年會，一擺是2000年tī Kingston ê Queens大學。另外一擺是2001年tī Peterborough ê Trent大學舉行。Hit擺是kap多倫多《台文通訊》讀者聯誼會合辦，同時tī hia慶祝《台文通訊》10週年。年會ê節目非常豐富，除了討論台灣ê政治情勢，koh有台語文學ê演講kap表演，是一場文化氣味真重ê年會。
2000年年底，國基代表加台會去美國華府參加「世界台灣人大會 」（簡稱世大會）ê成立大會，tī hia kap各地來ê代表tī世大會ê會旗頂面簽名 。世大會是一个聯合海內外台灣人社團ê組織，伊ê目標是beh結合全世界台灣人ê力量，推動台灣ê國際參與、民間外交kap研討相關ê公共議題。國基bat參加過幾若擺由世大會kap台灣本土社團共同舉辦ê海內外台灣國是會議。
2011年，世界台灣同鄉會（簡稱世台會）ê年會tī Costa Rica（『哥斯大黎加』）ê首都San Jose（『聖荷西』）舉行，國基tī hia當選世台會會長。世台會是一个聯繫世界各地台灣同鄉會ê組織，每一冬lóng ē開年會。國基做四冬ê會長，辦過四擺年會。2012年ê年會是配合台灣總統選舉tī高雄舉行，會後koh有助選活動。2013 ê年會tī去Hawaii ê遊輪舉行。Koh來兩冬ê年會，一冬tī Hungary（『匈牙利』）ê Budapest（『布達佩斯』），另外一冬tī Turkey（『土耳其』）ê Istanbul（『伊斯坦堡』）舉行，lóng辦kah真成功。
國基mā真熱心參與多倫多台灣人社區ê事工，親像多倫多台灣人社團聯誼會ê khang-khòe、二二八記念會ê籌備種種ê活動。國基是加拿大台灣人權協會kap加拿大FAPA ê會員，tī加拿大替台灣做國民外交，提昇台灣ê能見度，為台灣加入聯合國kap世界衛生組織發聲。伊做過加拿大台灣衛生聯盟ê會長，bat去瑞士Geneva參加台灣加入WHO ê宣達活動。伊bat組織抗議中國霸權ê示威遊行，mā bat駛校車載多倫多ê同鄉去Ottawa抗議中國國家主席胡錦濤來加拿大訪問。伊mā ē去支援別个族群，親像Ukraine（『烏克蘭』）、Uyghurs（『維吾爾族』）、西藏人、香港人ê抗爭活動。
2000年，國基tī台灣經過當時ê台獨聯盟主席黃昭堂ê監誓，宣誓加入台灣獨立建國聯盟。2009年，伊當選台獨聯盟加拿大本部ê主席，為台灣獨立建國ê目標拍拚，一直做到伊過身。
國基bat做過《台文通訊》ê總編輯。《台文通訊》是一份台語文草根運動ê刊物，1991年tī美國加州創刊，1999年9--月徙來多倫多，多倫多ê《台文通訊》讀者聯誼會成立一个編輯小組來做編輯ê khang-khòe。國基tī 2004年1--月接任總編輯，一直做到2011年12--月《台文通訊》徙tńg去台灣。
國基真gâu寫台語詩，其中有四首是寫二二八ê詩。伊有一首詩《春天ê三角湧》是teh寫伊ê故鄉樹林ê隔壁庄三峽ê景致。台灣文學作家陳雷呵咾chit首詩寫了真好，伊講大部份ê詩lóng是teh寫心情，寫景ê詩真少，讀國基chit首詩ná親像teh欣賞一幅真súi ê圖。
國基多才多藝，真gâu唱歌，做過聖歌隊ê指揮。伊是一个handyman，ē-hiáu修理厝、鋪地板、做櫥櫃。伊真愛hip相，真gâu取景，是一位有職業水準ê攝影家。 伊有hip真濟群眾運動、示威遊行ê相片，為台灣人ê歷史留落來真寶貴ê記錄。
國基家己講伊ê一生真精彩，確實有影非常精彩，因為伊見--過ê世面真闊，參與過真濟台灣人ê代誌，熟sāi真濟人，交真濟朋友，去過真濟所在，hip真濟真súi ê相。
國基長期參與海外台灣人ê運動，奉獻真濟。伊kap林哲夫教授、陳雷醫師、陳星旭兄仝款，lóng是台灣精神ê代表。Lán感謝伊ê付出，真m̄甘伊離開，願伊安歇！
