Khah早經濟iáu未進入工業社會進前，台灣各地水利安全設施有khah無周全，民眾經由圳溝周圍踏thut意外死亡ê情形tiānn-tiānn發生，另外一方面過去農業社會經濟普遍khah無發達，民風mā ke tsiânn保守，想bē開跳水自殺死亡ê案例mā ē-sái講ke tsiânn濟。
因為可能受著環境設施hām景點背景ê影響，iah是真正有hit款無形力量ê介入，有一寡所在落水死亡ê案例不斷發生，民眾難免ē認為hia-ê所在無清氣相tsiah ē逐不時發生水鬼仔掠交替ê代誌，而且為著逐家ê安全，附近ê民眾有tang時就 ē求請神明到事故地點進行法會，而且由法師iah是童乩進行掠妖趕鬼ê儀式，tī四五十年進前ê時代，ē-tàng逐不時聽著有一寡所在leh辦tsit款ê儀式。
「村長伯--à，照古埤水門hia又koh有人浮--起-來--ah！」天光無偌久，大箍珠--a兇兇狂狂走去村辦公室揣村長伯--à。
「哪又koh án-ne？Kám有人去派出所報案--ah？」村長伯--à趕緊出聲問大箍珠--a。
「有--lah！已經有人走去報案--ah！」
「好--lah！我等--leh ē隨趕--過-去。」村長伯--à入去內底kā外衫lom--起-來，翻頭鐵馬牽--leh就趕過去現場beh kā家屬tàu處理後事。
照古埤是一條普通時ē得引大溪水灌溉，落大雨ê時ē得瀉田水ê大埤圳，因為beh兼顧灌溉參排水ê功能，照古埤流經過販仔庄水門進前hit站ê圳道ē-sái講tsiânn深，tī beh灌溉ê時tsūn kā水門tshìng kuân來提高水面ê kuân度，深度差不多ē-tàng達到三四層樓深，mā因為實在有夠深，所以bē-hiáu泅水ê人若無注意跋--落-去iah是想bē開跳--落-去，難免ē造成死亡ê情形。
「水門hia最近一年已經有三个人tī hia過往，lán是m̄是tī今年ê冬尾時koh再來kā普普--leh?」Tī村民大會，阿福叔--à提出建議。
「普渡是ài逐家鬥陣參加ê代誌，看逐家ê意思是按怎？」村長伯--à iáu是ài尊重逐家ê意見。
「已經普過幾若kái--ah，掠交替ê情形mā仝款koh一再發生，tsit kái lán是m̄是先來去問帝爺公，看是m̄是有koh-khah好ê做法？」春成khah有leh行廟，伊認為ài先請示帝爺公。
「好--lah！我就先拜託帝爺廟ê阿龍仙kā神明請示看māi。」阿龍仙是帝爺廟ê廟公兼童乩，村長伯仔beh拜託伊問神明。
40幾年前ê農業社會，一般民眾若拄著困擾ê代誌，去庄頭ê境主廟問事ē-sái講是tsiânn sù常，村長伯--à代表村民請示帝爺公，經由阿龍仙扶乩稟告，結果帝爺公指示，除了連桌普渡，也ài搭壇舉辦法會，tsiah ē-tàng超渡圳中ê水鬼仔回歸冥界，iah是離開照古埤ê水門區域。
舊曆8--月下旬，廟方照帝爺公選定ê日子搭壇做法，hit下晝在附近各庄頭逐家贊普之下，tī水門邊恭請法師主持進行大規模ê普渡拜拜，而且tī暗時7點外，法師開始施法beh要求埤圳中ê水鬼仔接受超渡iah是離開hit个所在。
只是tī神明ê神威以及法師配合童乩不斷施法之下，水鬼仔猶原強烈抵抗，到kah子時ê時tsūn，甚至tī水面浮現一座幻影虛壇來kap神壇對tshiâng，法師也舞到非常忝頭，規个人性地也做一下夯--起-來，a̍h m̄知是m̄是神明ê神力，準準tī半暝12點，法師擋bē tiâu，kā手中傳達神明旨意ê玉印出力tàn入去大圳溝底，講mā奇怪，照古埤法會ê現場，一時間雄雄連人mā lóng變kah tsiânn恬靜，水鬼仔ê虛壇也雄雄消失kah無影無跡，無偌久神明經由童乩指示，水鬼仔已經離開，法師ē-tàng開始謝壇。
「碗粿，有人beh食好食ê碗粿--無？」竹篙伯--à leh huah賣伊ê碗粿。
車路店是離照古埤水門差不多七八公里ê一个大庄頭，竹篙伯--à逐暗lóng ē sak伊ê擔仔車，tī庄頭庄尾leh huah賣碗粿，講mā奇怪，普通時伊ê碗粿大部份tī差不多11點外就lóng ē得賣了了，只是在照古埤舉辦法會hit暗，到翻點iáu-koh賰規十碗賣bē出--去，tī竹篙伯--à beh準備收擔ê時tsūn，雄雄看著tsiânn十个手kuānn ka-tsì仔ê外地人beh經過hia。
「有人beh食好食ê碗粿--無？」竹篙伯--à向hia-ê外地人推銷伊ê碗粿。
「好啊！Gún mā ài歇睏--一-下！」Tshuā頭ê外地人回應竹篙伯--à。
就án-ne，hit-tsūn外地人逐家kā ka-tsì仔暫時囥tī路邊，每一个人lóng phâng一碗碗粿拚勢食，拄仔好kā竹篙伯--à ê碗粿銷kah無半碗。
「我看lín逐家kánn-ná lóng真忝？」竹篙伯--à問tshuā頭ê外地人。
「Tio̍h啊！拚規暝又koh ài隨時趕路，免講mā真忝。」
「Lín是tuì佗位來？Tsit-má是beh趕去佗位neh？」
「Gún本來蹛tī照古埤hia，tsit-má beh搬來去普豔埤。」
「Lín leh搬厝？哪有需要透暝搬厝neh？」竹篙伯--à看bē出in是leh搬厝，mā感覺tsiânn奇怪。
「Hia雄雄變kah無法度koh蹛--落-去，姑不而將只好tio̍h-ài透暝搬徙。」Tshuā頭ê外地人kánn-ná tsiânn無奈。
「哪ē án-ne？是發生啥mih代誌？」
「Tse……。」Tshuā頭ê外地人無想beh koh ke講，無偌久hit陣人就lóng koh kuānn起ka-tsì仔，beh繼續趕路去普豔埤。
因為hit工賣了有khah uànn，竹篙伯--à kā伊ê擔仔車sak tńg去到厝，只是簡單先kā擔仔車量約仔拭拭--leh，而且用帆布khàm hōo好勢來防止鳥鼠仔，了後伊就先去洗tn̄g歇睏。
第二工8點外，竹篙伯--à食飯飽開始beh整理擔仔車，tng伊掀開帆布以後發現，hia-ê外地人所食ê碗粿並lóng無食，只是逐碗變kah醬醬，伊心內有數，可能是拄著歹mih仔，拍開囥錢ê銅管仔看，後尾hia所收ê錢竟然lóng是銀紙。
「有夠歹運，無代無誌suah去拄著水鬼仔搬厝。」竹篙伯--à照風俗去hōo人收驚改運，而且勸逐家無代誌mài去普豔埤。
普豔埤離車路店並無真遠，附近ê大排水溝tī hit个所在有設一个水門，所以水門進前ê溝面變做一个小型ê潭區，潭區邊--a有水利會ê工作站，四邊有bē-bái ê綠美化設施，是附近鄉鎮初中生歇睏日上愛去hia辦活動參tshit-thô ê小型風景區。
講--起-來mā tsiânn奇怪，法會辦了後hit兩三年，照古埤lóng無koh發生民眾落水死亡ê案件，過去真少出代誌ê普豔埤顛倒發生三四件民眾落水死亡ê案件。竹篙伯拄著水鬼代誌ê流傳--出-去了，地方人士lóng認為普豔埤ē變kah hiah-nī仔歹空，應當就是照古埤ê水鬼仔搬徙過去普豔埤所造成。
Hit幾年若有囡仔beh去普豔埤tshit-thô，家長lóng ē極力阻擋，只是有一寡仔囡仔也lóng是ē偷偷招規陣去hia tshit-thô，水利會為著beh避免koh再發生民眾落水死亡ê案件，規氣做牆圍阻擋外人，m̄ hōo人koh去工作站前ê普豔埤岸邊辦活動。
後--來，快速道路建造拄好經過普豔埤，排水溝ê水門徙位改建，khah早綠美化kap辦活動ê埸所也lóng總變做道路用地，普豔埤tsit个景點ê地名也tuè leh tuì地圖面頂消失，照古埤水鬼仔搬徙去普豔埤ê流傳故事，地方民眾也漸漸淡忘。
#講古hōo lín聽 專欄，本文使用教育部推薦漢字kap臺灣閩南語羅馬字拼音方案。
台文通訊BONG報305期，2019年8月出刊。
#講古hōo lín聽 專欄，本文使用教育部推薦漢字kap臺灣閩南語羅馬字拼音方案。
台文通訊BONG報305期，2019年8月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
