作者：蔡惠芬 （Tshuà Huī-hun）
阿爸今年93，阿母87，兩位老大人歲數加--起-來180歲，結婚67年--ah！
阿爸少年做警察，主要ê khang-khuè是維持社會秩序、交通指揮、維護民眾安樂生活。逐工上班ê基本時間（包含備勤）是12點鐘久，m̄管是日頭赤iānn-iānn、天頂做風颱、地下大地動、過年過節mā ài當值，ē-sái講是行船走馬三分命、紅衫穿一半ê頭路，正港是365工逐工7-11 ê khang-khuè！阮六个姐弟仔細漢ê時tsūn，罕得看著阿爸，有一kái伊擔任要緊任務，勤務16點鐘久，無khà tńg去派出所換便衫，自án-ne穿警察衫tńg到厝。Hit當時，四歲ê小弟看著阿爸suah tio̍h驚，ná走ná háu ná叫「阿母！阿母！警察來--ah！警察來--ah！Lán兜to無歹人，警察thài ē來厝--裡？」
阿母是厝--裡九个囡仔ê大姊，自細漢就ài做厝內khang-khuè：起火、煮飯、洗衣、tàu顧小弟小妹……。古早人普遍重男輕女，阿母15歲考tiâu基隆女中，無疑悟火燒厝燒過間，外公一句「查某囡仔是油麻菜子命，bat字就好，冊讀濟是 “雞公雞母”--ê」，就無koh tsiūnn學。無ta-uâ半暝仔bih tī棉tsioh被內háu，就養成認命、勤快、giám-ngē ê個性。20歲結婚，六个囡仔一个仔一个來出世。厝--裡喙齒一米籮，kan-na靠一份薪水tsiok歹pháng，人人sannh心衫穿新食ài鮮。阮兜平素lóng過晝後tsiah去pùn-sò市仔買菜、衫大姊穿--過--ê tsiah-koh留hōo細漢--ê穿、招會仔做會頭，儉腸neh肚lóng是為著想beh hak厝；總算40歲tsiah tī市區買一間店面厝做小生理，阮一家伙仔原在tsinn踮公家宿舍--裡。
阿爸60歲退休，擔任退休警察協會理事，逐日去做志工，koh要求家己早暗行路兩點鐘，真知勇健上要緊，身體beh好ài家己顧，日後khah bē拖累囝孫序細。86歲（2015年）參加「3Q退警志工隊」，逐禮拜拜一去國小擔任導護阿公。阿母tuì 65歲開始參加基隆市長青學苑日文班、免疫kap運動班、歌唱班、日文班，擔任各班班長tsiok濟冬，意愛ē-tàng服務，清楚『施比受有福』，mā知影ài「做一个好樣hōo人tuè」，期待日後hōo囝孫做好模範。
早年農業社會，逐家生活歹過，通常ê家庭lóng是tsit款為著顧三頓、為著下一代拍拚ê翁仔某，從來m̄ bat看電影、m̄知啥是浪漫，度過千辛萬苦，kā食苦當做食補；阮姐弟仔從來to m̄ bat看過阿爸阿母牽手散步iah是出門tshit-thô。序大人50歲以後，tsiah開始參加各種旅遊活動，享受「艱苦頭，快活尾」ê自在人生。
早前阿爸tńg來厝--裡是老爺，目今老母身命行落崎，睏bē落眠、血壓kuân、血糖濟、神經衰弱……漸漸仔有歲--ah，人已經老thuē。現時「某老翁來顧」，厝內khang-khuè khioh來做bē棄嫌。Íng過翁食頭路某khînn家，tsit-má某老翁陪。阮姐弟仔輪流tī歇睏時仔伴老大人sì-kè se̍h，iah是tī口面食飯，就ē看著阿爸kā阿母ê手牽--leh ê畫面。
舊年koh ē-tàng陪伴序大人出門規工，今年初阿母就ài thuh拐仔tsiah敢行出門，se̍h無半工，就huah beh tńg--來；若是坐輪椅出門，to無半點鐘就ē huah忝，ài小可歇喘--一-下。阿母mā無法度徛leh煮飯，姑不而將食外口ê便當。食著生菇ê pháng，送急診；鼻仔鼻bē出氣味，肉粽臭酸--ah，mā kā hut-hut--落-去，趕急診。耳空koh-iūnn，hiânn火，聽無警報音bē記得關火。無頭神，bē記得東bē記得西、仝款ê代誌一直liū，有tang時仔起毛bái，雞母sio踏ê代誌就kā阿爸亂起性地……，精神狀況起起落落。不而過見若是有好代誌，人隨時就又koh精英，親像：娶孫新婦、生乾仔孫、看著六个活潑古錐ê第四代，iah是參囝孫仔同齊食飯，就爽神、心涼脾土開。
舊年10月初替老大人報名「2020年佛光山極樂寺甘露灌頂三皈典禮」，住持妙璋法師，專工來kā年歲上kuân ê兩位老菩薩握手加持做伙hip相，阿爸阿母tsiok歡喜，tsiânn做正式佛門弟子。10--月中旬參加社區『幸福基隆，愛在智慧』活動，阿爸雕西裝kat ne-kut-tái、阿母穿白色ê新娘衫，hip tsiok濟相，阿母講ē-tàng koh梳妝打扮，穿新娘服，回想20歲結婚ê青春時，人生宛然像一場夢！
10月底基隆市2020年市民璇石婚、金婚、紅寶石婚表揚活動主題『我的爸媽怎麼那麼恩愛』lóng總有130對來參加，序大人代表璇石婚（結婚60冬）ê夫妻，tsiūnn台接受林右昌市長表揚kap接受新聞媒體採訪、分享婚姻經營之道。阿爸講：「少年時規心想beh趁錢飼某囝，koh-khah危險ê任務mā無leh驚，kan-na beh ke領寡加班費，無要意著厝內人ê操心，mā m̄知家內事ê焦煩。江蕙《家後》hit首歌詞真鬥搭 “tsiah知幸福是吵吵鬧鬧”。Tse每一對翁某ke減lóng ē，晚年透流ē-tàng牽手行sio倚，67冬來 “三碗飯兩碗菜湯” mā食著好味好素。」
祈願佛祖庇佑，序大人健康、平安、樂暢，khuann-khuann仔行ǹg狐狸大pha尾，序細祝福kap跟tuè。
