作者：羅九安
為怎樣bat tio̍h過武漢肺炎ê人mā ài注疫苗？疫苗ê路用是leh幫贊免疫系統tī iáu未拄著病毒進前，ē-tàng先培養抵抗伊ê免疫力，包括中和抗體kap T細胞。M̄-koh你若是bat tio̍h過病，照理講，你應該就ē有免疫力，kám tio̍h koh需要注疫苗？而且以早ê認定是，自然感染所得--著ê免疫力，通常ē比注預防射所得--著--ê khah有力mā擋khah久。M̄-koh美國CDC mā是呼籲，就算是tio̍h過武漢肺炎ê人mā tio̍h趕緊來注，khah m̄驚koh hōo病uè--著。
注疫苗所得--著ê抗體對變種病毒khah有效
武漢肺炎ê病毒屬RNA病毒，本身就gâu突變，koh加上伊湠到全世界，致使伊到tann已經生出幾若款ê突變株。衛生專家就煩惱病毒若直直突變--落-去，恐驚ē致到疫苗失去保護力。一个美國Washington大學ê團隊，kā注過兩筒Moderna（『莫德納』）疫苗ê人kap tio̍h病復原ê患者血清--裡ê抗體做比phīng，看佗一款抗體對無仝ê突變株khah有保護力。In ê結果顯示，注Moderna疫苗得--著ê中和抗體，對壓制無仝變種病毒khah有路用。
斟酌kā伊分析以後，in發見注疫苗所產生ê抗體，主要是leh認病毒外殼一種叫做RBD ê抗原。因為病毒利用RBD kap細胞表面ê ACE2受體結合來感染細胞。RBD若hōo抗體包tiâu--leh，病毒就無才調koh感染細胞，也就是講，抗體kā病毒中和。注Moderna疫苗，ē刺激免疫系統生出濟濟無仝款ê中和抗體，來掠RBD抗原頂面無仝款ê結構，也就是所謂ê抗原決定位。所擺，就算其中一个抗體因為sio對應ê抗原決定位突變失去中和力，mā ē-sái倚靠別个抗體來中和病毒。
Hām伊sio比，uè著病以後自然產生ê抗體有khah濟款，ē認病毒無仝部位ê抗原，bē kan-na集中tī RBD。不而過，雖bóng整體來看抗體有khah濟種，m̄-koh伊針對RBD ê中和抗體種類比注疫苗--ê khah少，所以若拄著有變異ê抗原決定位ê變種病毒ê時tsūn，就khah無別款抗體thang tàu跤手，kā病毒中和ê能力就khah輸注疫苗--ê。
Hōo bat tio̍h過病ê人補注疫苗
既然注疫苗所得--著ê抗體kánn-ná比自然產生--ê khah有力，lán是m̄是tio̍h-ài呼籲bat tio̍h過病ê人mā來注？兩个英美ê研究團隊分別tī《科學》期刊發表in針對tsit个議題ê論文。In發見若hōo tio̍h過病復原ê人，koh補注一筒輝瑞／BNT或者是Moderna ê RNA疫苗，in血清--裡ê中和抗體量ē tshìng-kuân 1,000倍。而且koh是tuì kan-na對原底ê武漢株有效，進步到ē-tàng對付包括英國株、南非株等等無仝類ê變種病毒！保護力贏過注兩筒疫苗、m̄-koh m̄ bat tio̍h過病ê人。M̄-koh若是hōo in ke注第二筒，抗體ê效價並bē比kan-na注一筒khah好。
Tsit个現象hōo科學家感覺真趣味，因為tsit款雄雄tshìng-kuân ê抗體反應是免疫系統tī第二擺拄著仝款病毒ê時tsūn，tsiânn典型ê反應，通常由記憶B細胞kap T細胞聯合發動。M̄-koh hit幾个tio̍h病ê人m̄ bat uè著變異株，輝瑞／BNT kap Moderna ê疫苗mā是照武漢株落去設計--ê，照講in ê免疫系統無接觸過變種病毒，為怎樣suah ē hōo in生出ē-tàng中和變種病毒ê抗體kap相關ê T細胞--leh？
現此時得--著ê研究資料顯示，hōo初代ê武漢株感染以後，免疫系統ē生出兩類無仝ê記憶B細胞。一類ē分泌一模一樣ê抗體，專門對抗仝hit隻病毒。另外hit類ê B細胞就m̄是kan-na一種，伊是由濟濟種B細胞株組成，ē-sái分泌無仝款ê抗體。Tsit大類ê B細胞所做--出-來ê抗體，對頭先hit隻病毒凡勢無大路用，m̄-koh伊thang確保lán未來假使拄著變種病毒，免疫系統mā有才調對付，算是一種超前部署ê策略。
記憶B細胞leh發展ê過程--裡，的確ài有T細胞ê參與，T細胞ê種類若愈豐富，培養--出-來ê B細胞就ē愈多元。大多數ê新冠病毒疫苗，in使用ê抗原kan-na是病毒外殼hit个親像尖刺ê spike卵白質；所以注--落-去誘發ê抗體kap T細胞kan-na ē對付spike，特別是伊頂面ē kap細胞ê受體結合ê RBD。Lán若hōo病毒uè--著，病毒內底lóng總25个無仝款ê抗原，lóng有機會hōo免疫系統接觸--著，hōo lán生出khah豐富ê記憶B細胞hām T細胞。若hōo tio̍h過病ê人補注疫苗，in體內百百款ê記憶B細胞kap T細胞一下受抗原刺激以後，就隨分泌大量無仝ê抗體，thang中和tài無仝突變ê病毒。
以上ê研究結果說明，補注一筒疫苗對bat tio̍h過武漢肺炎ê人有大利益，m̄-nā加強對原底hit隻病毒ê抵抗力，mā連帶增加對變種病毒ê保護力。不而過，是按怎注第二筒了suah無出現免疫力加強ê效果？Kám講若bat tio̍h過病，疫苗就無需要注到兩筒？注AZ ê腺病毒疫苗iah是高端ê次卵白質疫苗kám ē有類似ê效果？Tsit幾个問題ê答案，lán目前iáu無kài清楚，的確ài有khah齊全ê資料tsiah thang解sueh。
（本文uì Blog「讀台語，學科學 Tha̍k Tâi-gí, o̍h kho-ha̍k」轉載，有得著作者同意，漢羅用字有調整，原文網址是：https://reurl.cc/W3e51D）
讀台語，學科學
Tha̍k Tâi-gí, o̍h kho-ha̍k
#醫學台文 專欄，本文使用教育部推薦漢字kap臺灣閩南語羅馬字拼音方案
#台文通訊BONG報 330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
