作者：劉閎翊 （台北市溪口國小六年ê學生）
Tī tsiah-nī熱ê暑假，有一工，台語老師khà電話來講：「你beh參加9月底ê演說比賽，lán趁歇熱約一工來去學校練習台語。」啊！我頭殼mooh leh燒！
Hit一日，老師準備真濟資料，教我演說比賽ài注意ê mê角、逐工ài整理一篇演說四格圖ê功課，而且ài錄音寄hōo老師聽。Tse是我頭一擺參加台語演說比賽，心內是真緊張。拄開始，逐擺交功課我lóng ài khai三、四點鐘tsiah ē-tàng完成，寫kah我tsiok想beh哭。M̄-koh老師真有耐心，每一擺lóng ē kā我提醒：「入聲聲短、ài收束，m是合脣音，ài發出聲……。」Tiānn-tiānn鼓勵我mài有siunn大ê壓力，hōo我漸漸感覺khah安心。老師koh有介紹台語『卡通』ê影片，內容真笑詼，我kap小弟逐工lóng ē看，看kah笑hai-hai。Tse是我練台語上輕鬆koh歡喜ê代誌！
經過一工koh一工ê練習，我tsit-má m̄免一點鐘就ē-sái完成錄音功課，老師mā呵咾講：「因為你tsiok認真，所以台語愈來愈liàn-tńg，內容koh-khah精彩，時間掌握kah tsiok拄好！」我聽了真歡喜，hōo我想著俗語講：「一枝草，一點露。」只要lán認真拍拚，一定ē沓沓仔進步。
Tī歇熱tsit兩個月ê練習，我想beh感謝小弟陪我做伙看台語『卡通』，阮阿爸、阿母陪我練習講台語、查資料，上感謝老師tsiok用心教我台語，hōo我進步tsiânn濟，一直鼓勵我m̄-thang放棄。最後，我beh對家己講：「M̄管比賽ê結果是按怎，我lóng有用心認真去準備--ah，台語mā愈來愈liàn-tńg，tse是我上大ê收成！」希望tsit擺演說比賽順利完成。
（感謝施雅惠老師推薦投稿）
#心內話 專欄，本文使用教育部推薦漢字kap臺灣閩南語羅馬字拼音方案。
台文通訊BONG報334期，2022年1月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
