雞腿飯ê滋味

作者:田美瑜 

歇睏日阮規家伙仔去運動中心拍羽毛球,運動了後腹肚iau-sà-sà,緊走去新北投ê一間餐廳食飯。雖bóng已經暗時7點半--ah,餐廳iáu是人kheh-kheh。Tsit間店自阮翁婿細漢ê時就開始營業,壁堵phú-phú ê色緻,講出伊規年thàng天,頭家認真滿足逐家腹肚ê心聲。

餐廳ê雞腿飯tsiânn有特色,伊ê紅茶mā不止仔好lim。雞腿飯送--來ê時,kan-ta看著雞腿ê色緻,就tsiânn滿足--ah。咖啡色koh小可仔金金,看起來就真好食款。雞腿皮食--起-來脆脆,雞腿肉甜koh芳,bē輸大飯店ê總舖師,逐工食mā bē厭siān。

Tng當阮大腸告小腸ê時,細漢囝喙笑目笑講,雞腿飯是伊細漢時ê記持。聽--著ê時,心內有一種感動。論真想看māi,真正有影!話頭一開,兄弟兩人你一句我一句,開始講in細漢時,食雞腿飯ê趣味代。

印象上深--ê,有一擺阮tī厝--裡,等翁婿買雞腿飯tńg--來。我無事無白開門出去排鞋仔,想bē到大漢囝suah無聲無sueh,kā門關--起-來。Tann tsit聲害--ah!兩歲外ê囡仔,根本無夠kuân,mā無法度開暗鎖。雖bóng kan-ta隔一个門,囡仔人無看著阿母,iáu是ē淡薄仔驚惶。等翁婿tńg--來ài點外鐘,姑不而將去揣奶母借錢。Hainnh!人若衰,pû仔看做菜瓜。奶母講歇睏日,lán tsit箍圍仔內,拍鎖匙ê店lóng歇睏,假使beh揣開鎖--ê,mā ài坐車30分鐘ê所在去蘆洲hia tsiah有。真正是火hua--ah!

好佳哉,細漢囝拄仔好lim牛奶煞,leh tuh-ku。奶母tsiânn惜囡仔,liam-mi提手機仔khà電話hōo阮囝,安搭囡仔驚惶ê心情。

時間就án-ne一分一秒過--去--looh!等「tang」一聲,電梯門拍--開,阮翁婿出現tī阮ê面頭前,逐家mā lóng輕鬆--起-來--ah!

雞腿飯來--ah!阮ná享受雞腿脆脆芳芳ê好滋味,ná回想阮規家伙仔來食雞腿飯ê記持。心內有一種感動,原來雞腿飯ê內底,有摻真濟囡仔細漢時趣味ê記持。雞腿飯ê滋味,不止是好食,koh有我kap囝兒,對in一粒紅紅,捏kah tsit-má是kau-tshiâng大漢ê少年家ê心情,hōo阮sian講就bē siān,所致不管如何一定ài來交關。


#生活ê藝術 專欄,本文使用教育部推薦漢字kap臺灣閩南語羅馬字拼音方案。
台文通訊BONG報334期,2022年1月出刊。





歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會



李江却台語文教基金會需要你ê定期捐款,逐個月捐助NT$200以上,lán做伙來推動復振台灣語文ê事工,歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會(台文通訊BONG報發行單位)NT$200(iah是逐冬NT$2,400)以上,做伙支持基金會事工kap雜誌編印發行費用。歡迎利用郵局劃撥、信用卡(寫捐款單)、線頂捐款、現金贊助、銀行/ATM轉帳(轉帳了後請通知)、支票、郵局戶頭自動轉帳扣繳(寫授權書),捐款收據ē-tàng做『列舉扣除額』抵稅ê用途。