作者：Lîm Phek-tông
四年前，唐培禮（Milo L. Thornberry）過身。1965年年底，唐培禮kap秋詩（Judith）受美國衛理公會派來台灣宣教。唐培禮tī台灣神學院擔任教會歷史副教授、台南神學院客座教授。伊講：「Tng我漸漸了解台灣ê情形，我無法度了解為啥mi̍h tī台灣ê宣教師、美國學生、軍人kap使館人員，看著中國國民黨ê暴行，聽著台灣人ê呼求，猶原恬恬無聲，che hām Kitty Genovese（『珍諾比斯』）ê厝邊有啥差別？」
我想著《聖經》中摩西ê故事。一開始，tng摩西去看in兄弟ê擔，是埃及王子去巡視伊ê埃及子民身--上ê擔，因為埃及人beh擔起「建造比東、蘭塞兩个城，做府庫」ê責任。但是，tng摩西目睭金金看著一个埃及人殘殺一个希伯來人ê時，摩西就放下皇族ê出身，伊為著受害者出頭。就是tī chit个時chūn，摩西明明指出啥人chiah是伊「真正」ê兄弟，摩西深深認定hia-ê tī壓迫中受苦ê人chiah是伊ê兄弟。摩西看正爿、倒爿，看「無人tī hia」，並m̄是講現場無人，是親像以賽亞書59:16：「伊看無人拯救，無人替求，不止卬愕（gông-gia̍h）」，摩西teh問，為怎樣無人出手？為何人人恬恬允准chit款代誌發生？身為王子ê摩西bē只是因為殺害一个埃及人致到hō͘法老討命，是因為法老知影摩西認同以色列人，日後摩西必然tín動著現時埃及法老王朝ê統治。
唐培禮講：「殘暴ê蔣政權ē-tàng tī台灣行坦橫，就是因為美國政府kā thīn。我愛我ê國家，我珍惜教會派我到台灣做宣教ê工作，但是我ê良知無允准我kan-na徛tī邊--a看。假使阮啥mi̍h lóng無做，我認為阮是teh同意美國政府支持蔣政權。所以，根據阮ê信仰，阮選擇有所作為。」唐培禮kap秋詩參與救援彭明敏ê行動。後--來， in受著政治事件牽連，hō͘中國國民黨政府趕出境，伊tńg去到美國以後，hō͘美國當做恐怖份子軟禁tī國內無法度出國、特務規工來攪吵。
是tī發動憐憫kap正義ê時，摩西chiah開始chiâⁿ做「以色列」——上帝治理ê人民。唐培禮認同受苦ê台灣人民，真正為基督ê疼做見證。唐培禮bat對我講：「Justice is a journey.（正義是一chōa旅程）」唐培禮kap秋詩用in ê人生教導--lán，正義是充滿疼thàng、艱難、困苦kap希望，而且一直成長學習ê旅程。
