作者：陳慕真
故人陳信從tī 1950年1月初6出世，嘉義朴子牛挑灣人。老爸陳天惠、老母陳黃抄。有三个小弟：信德、信堅、信福，兩个小妹：麗華、麗雪。自細漢tùi爸母傳承基督ê信仰，是第三代基督徒。求學ê過程tùi松梅國校、東石初中、高雄中學到中興大學法律系，對法律kap政治有真深ê興趣kap使命感。
故人1975年kap屏東人邱淑華女士結婚、建立家庭。Tī屏東市開補習班，從事教育40幾年，栽培chiūⁿ千位ê子弟。Koh辛苦chhiâⁿ養四个囡仔：耐革、慕真、理揚、頂新。故人用心栽培囡仔，建立以信仰、母語kap台灣意識做主體ê家庭教育。囡仔mā tī社會上盡力拍拚——耐革是警察，目前tī高雄市長陳其邁身邊服務；慕真是大學助理教授；理揚長期參與台語文kap台越文化chhui-sak ê工作；頂新是律師，目前是律師事務所ê所長。故人有六个孫仔：品澄、玟綺、安歌、泉躍、翊恩、安保，伊疼惜囝兒孫、koh用心教育，建立和樂、美滿、團結ê家族。
故人tī細漢ê時，得著小兒麻痺，一生行動不便。總--是，結婚了後有牽手用心ê照顧kap陪伴，共同建立一个充滿愛ê家庭。伊雖然身軀上有勞苦，但是，精神上豐富滿足、心靈自由開闊。伊關心台灣國家ê前途、熱愛鄉土、主張台灣獨立。伊ê意志堅定、樂觀正向、對人誠懇。伊真愛讀冊、思考，講ê話充滿智慧，對台灣政治時勢ê判斷真有見解。伊真gâu鼓勵人，時常用聖經ê話kap冊ê智識勉勵身軀邊ê人，hō͘囝兒序細、學生、朋友、厝邊lóng得著幫贊，bat kap伊接觸ê人lóng受著伊ê啟發kap鼓勵。
2021年11月19，故人身體無爽快，tī屏東市厝--裡安歇主懷，享年71歲。故人ê一生，親像《聖經》哥林多後書6:10所講：「雖然有煩惱，其實tiāⁿ-tiāⁿ有喜樂；雖然散赤，其實hō͘真濟人好額；káⁿ-ná無半項，其實逐項lóng有。」故人地chiūⁿ ê苦難已經煞。總--是，伊ê離開留hō͘身軀邊ê人深深m̄甘，伊ê做人處事留hō͘後一代美好ê典範，hō͘人無盡ê siàu念。
