作者：黃明勝
高雄市小港區大林蒲ê「鳳林宮」到tann已經有三百外年ê歷史（公元1661年～2021年）。不而過，三百外年前鄭成功趕走荷蘭人，uì台灣西海岸ê茄萣海邊（當今小港區南星計畫區ê入口）登陸，真緊選擇現今四面lóng是青ling-ling樹林ê大林蒲開墾定居。
清國道光17年（公元1697年）鳳山知縣曹謹開墾水圳，tī鳳鼻頭山崙起大型抽水機，抽水機ê煙筒朝向鳳岫宮（鳳林宮ê前身）正中心，當地居民lóng認為地理已經受破壞，龍脈sńg-tn̄g--去，最後遷徙到大林蒲庄頭，就是現今ê「鳳林宮」。
照前人ê傳說，大林蒲鳳林宮中有一座外國船鐘，年拄年一直hōo當地居民kap信徒當做是廟中珍貴ê古物。照《鳳林宮建廟沿革誌》中記載，tī清國康熙年間ê時，離大林蒲東北爿兩公里外ê雙叉港和尚溝（照鳳林宮當今地址東北兩公里外，tī紅毛港水壩ê所在，就是鳳山下里紅毛港庄頭ê所在），有一座廟寺，傳說廟內ê和尚主持除了不守清規kap存歹心以外，對到廟--裡參拜進香ê查某kap囡仔koh有tshik惡等不法ê事件。和尚ê歹名，名聲真透，惹附近庄頭居民受氣kap不滿，致使眾人合力將tsia-ê不守清規戒律，作惡多端ê和尚趕出庄頭，來維護地方善良純樸ê民風，而且將廟寺眾神佛轉到別跡服sāi。
值得特別注意--ê是，廟內有留明朝年間ê香爐kap英國Scotland（『蘇格蘭』）船鐘（廟中kā當做晨鐘使用） 。民眾將in帶到大林蒲庄內，tī清國康熙36年（公元1697年）由眾人合資創建鳳林宮ê前身，廟中服sāi溫府千歲kap朱王爺靈旗，hōo地方信眾祭拜，祈求庄頭平安，而且kā tī雙叉港得--著ê香爐kap外國船鐘mā安搭tī廟中。鳳林宮ê信徒uì大林蒲、紅毛港、中林仔、過港仔、鳳鼻頭、邦坑仔kap小港四五路來--ê，是重要ê信仰中心。照頂面所描述，koh加上附近聚落mā有仝款ê傳說，當地老大人認為tsit个船鐘是紅毛人（荷蘭人）所留--落-來ê古物。
