郭文卿
飛啊飛 飛啊飛 飛過高山kap平地
飛啊飛 飛啊飛 飛過大海kap大溪
身軀白白烏喙pue 目睭金金頭犁犁
喙pue扁扁跤短短 妝kah suí-suí掠魚蝦
Lā-pue啊lā-pue 歡迎來到曾文溪
Lā-pue啊lā-pue 七股溪邊來奉茶
飛啊飛 飛啊飛 飛過天清烏暗地
飛啊飛 飛啊飛 飛過透風落雨暝
千辛萬苦來做伙 飛來飛去千萬回
Lín是guán ê好人客 永遠永遠ê寶貝
Lā-pue啊lā-pue 飛來故鄉幸福地
Lā-pue啊lā-pue Guán ē用心來交陪
飛啊飛 飛啊飛 飛過天光換明月
飛啊飛 飛啊飛 飛過日夜teh輪迴
來來去去無反悔 歇睏趁食無問題
M̄免驚惶孤一个 M̄免煩惱無人陪
Lā-pue啊lā-pue 自由自在sì-kuè飛
Lā-pue啊lā-pue 七股溪邊再相會
