手攑元帥令，掌領百萬兵
誰人逆我（ngó͘）令，定斬不留情
來來來，看看看，先來先看，慢來減看一半。來看陳某某演布袋戲，看ē著khah贏九斗換一石，看bē著心肝頭ē起gāi-gio̍h！「貧ê道！虎lān世祖，蹛tī tsit个八卦山頂，教有三位ê虎lān徒弟，專門tī-leh製造hit个虎lān仙丹」！「現在社會上有一寡生毛帶角--ê tī-leh作亂，貧ê道！虎lān世祖iáu未開殺戒，若hō͘我開殺戒--者，我就叫我三位ê虎lān徒弟，利用我tsit个虎lān仙丹kā in拍拍--死」。
Tī公元1950年代，guán庄跤theⁿ布袋戲尪仔tsiâⁿ時行，自細漢guán就真愛看布袋戲，逐年若到廟會、神明生、三界公ê生日……..，庄跤所在lóng ē tshiàⁿ布袋戲團來做平安戲，另外koh辦桌請人客，鬧熱滾滾。庄跤人真有人情味，主人家tsiâⁿ好客，鬧熱ê時，koh tio̍h kā一寡親tsiâⁿ朋友請來鬥陣食tsheⁿ-tshau，káng天說皇帝。Guán規陣囡仔就相招去戲棚跤看戲，戲棚跤tsiâⁿ鬧熱，有賣雜細仔、teh撚骰仔（lián tâu-á）、搖三粒仔，看戲ê人mā tsiâⁿ濟。有人講做戲仔是「豬食狗睏毛蟹行」，tī民國四、五十年代ê時，真正是án-ne，拄著神明生，戲tshiàⁿ好勢了後，戲班tio̍h-ài先來搭戲棚，戲做suah tsiah koh kā戲棚拆--轉-去，iah若拄著有人謝神加tshiàⁿ--幾-工-仔，做戲仔就踮後場hia凊彩食、凊彩睏，等戲做煞，tsiah koh kā戲棚拆--轉-去，半暝仔暗眠摸koh無路燈，親像毛蟹teh行路，真辛苦koh tsiâⁿ歹趁食。
做布袋戲愛編故事，kā原來無hiah-nī精彩ê代誌誇口演出，hō͘看戲ê人感覺趣味koh ē接受。有一句話講「一口說出千古書，十指舞動百萬兵。千里路途三五步，百萬軍兵六七人」。親像兩軍作戰，明明就tsiah幾仙仔布袋戲尪仔leh lāng niā-niā，伊suah講有百萬軍ê兵馬leh決鬥，明明to刣無三隻貓仔，伊suah講刣死幾若十萬兵。台北到高雄ài行規禮拜，伊suah三五步就kā解決--ah。演戲--ê講kah喙角全波，聽眾感覺趣味，看ê人koh感覺心適，tse正是搬演布袋戲上成功ê所在。
黃俊雄ê名言：「人有衝天之志，無運不能自通，馬有千里之行，無人不能自往，閹雞翼大飛不如鳥，蜈蚣百足行不如蛇，時也，運也，命也，非我之所能也」。公元1970年代，黃俊雄布袋戲「雲州大儒俠」造成轟動，演出583集，收視率達到百分之九十七ê歷史記錄，一直到1973年布袋戲因為「影響農工作息」ê理由，hō͘政府停止播出，可見講布袋戲有偌大ê影響力。
布袋戲kap歌仔戲lóng是lán ê文化，tsīng古早到taⁿ，lóng是台灣民間上tsia̍p看--著ê野台戲，尾--à koh發展到電視台、電影leh播出，伊純粹用台灣話ê口白發音，用華語講就buē順序。Tse布袋戲是lán ê母語上kài suí-khuì ê所在，對lán ê鄉土教育、對lán台語ê留傳lóng有真正面ê意義。
