清朝統治台灣時期就有人用漢字書寫諺語、民謠ê歷史，日本殖民統治時期台灣人開始用漢字來寫台灣流行歌，因為有30%台語詞素無法度用漢字來表述，致使逐家ē凊彩亂借字。《李筱峰專欄》〈台語文浩劫〉一文指出現代ê人lóng烏白造字，用漢字音讀--出-來ê漢字來書寫台語文，譬如：當選→凍蒜、白癡→北七等，tsit寡詞已經kap原底ê語意無符合，ē-tàng講是將漢字音提來代替、變做台語書寫ê注音工具niā-niā。相對--ê，華語hām台語長期接觸下mā有一寡新創詞出現，華語向台語借--過-來所產生ê新詞彙，簡稱MT（華語ê台語借詞），新創詞是屬tī華語本來無存在ê詞彙，因為借入MT，受著台語影響來擴充華語ê辭彙量，譬如：沒法度、好佳哉、老神在在、三不五時…等（謝菁玉、陳永禹，1998:566-568）。
以早行tī街仔路，從來m̄-bat注意過看板有啥mih特別吸引--人ê所在，kan-na知影看板是beh hō͘消費者順利揣著店名ê大張廣告單niā-niā。Tī五花十色ê看板當中，長期以來受著生活環境快速ê變遷kap大眾傳播媒體ê影響，lán看--著ê多數lóng是以華語發音ê看板khah濟，tsiâⁿ少是以正港台語發音來標示--ê。近年來，台灣本土意識漸漸出頭，有一寡台語借漢字音ê本土化台語看板漸漸變濟，m̄-koh，啥mi̍h是台語看板？伊ê界定其實kài簡單，只要用華語（漢字音）讀--出-來ê音無任何意義，koh來看kám有借入MT，án-ne就ē-tàng tsiâⁿ清楚分辨是m̄是台語看板。
台語看板tī平面kap電子媒體廣告巧妙運用台語文字hām語言，目的是beh營造心適、趣味koh親切ê形象，進一步影響、改變社會大眾過去對台語ê刻板印象，包括一寡民間ê商業，親像『輝休逗』（火燒島）飯類.滷肉、『璺魛灶咖』（阮兜灶跤）海鮮現炒、『什咪哇鍋』（啥物碗糕）羊肉爐等；政府機關ê廣告文宣，親像交通部駕照宣導ê｢無照就麥走」、2013『來台南－懶懶蛇（luā-luā-sô）文化慢走』活動等；政治人物選舉候選人競選ê理念kap口號，譬如「骨力打拼」、「鬥陣車拼」、「好差甲」、「不通青菜」等，lóng是beh透過台語看板來傳達in ê本土風格，giú近kap社會大眾ê距離，希望營造趣味、心適khuì、親切ê形象。
Koh來以電視廣告｢京都念慈庵」川貝枇杷膏、｢鄭杏泰救肺散」tsit兩支廣告來做例，因為電子數位媒體『置入性行銷』ê關係，其中『京都念慈庵』tsit个產品ê廣告是講華語，｢鄭杏泰救肺散」是台語發音，經過電視ê傳播，雖然是漢字ê廣告，lán lóng是以第一擺接觸--著ê音來講tsit項產品ê名稱，並buē kā tsit个名稱改做其他ê發音。Koh來，因為現代科技快速ê進步，ē-tàng講每一个人ê身軀邊lóng有智慧型ê手機仔、平板電腦等3C產品，像tsit-má逐家lóng有leh用ê『LINE貼圖』，tiāⁿ有一寡用台語文創作ê『貼圖』，譬如：穿厚燒（tshīng hō͘ sio）、甘溫啦（kám-un--lah）、那ㄟ安捏（ná ē án-ne）、蝦毀（siáⁿ-huè）、幾霸分（tsi̍t-pah-hun）、熊蓋讚（siōng-kài tsán）等等，雖然m̄是看板ê類型，mā ē-tàng算是語言景觀『置入性行銷』ê一種。
近年來民間ê店頭、金融機構、科技3C產品即時傳達ê訊息功能、政府單位ê廣告文宣kap政治競選活動使用台語看板廣告ê機率愈來愈kuân，為啥mi̍h有愈來愈濟台語看板出現，目的就是beh giú近消費者hām民眾ê距離，tse就是本土語言上大ê功能。若tuì社會語言學去看台語看板ê詞彙kap用字，ē-tàng看出lán ê語言結構有問題，以《教育部臺灣閩南語常用詞辭典》網路版收錄ê｢這馬」、｢連鞭」tsit兩个辭彙來做例，tsit兩个辭彙是lán tī日常生活tiāⁿ leh用ê辭彙，假使無特別學過台語音ê漢字，請問有偌濟人讀ē出--來？明明lán有使用台語ê需求kap ǹg望，為啥mi̍h lán無法度用ha̍h lán家己khuì口ê羅馬字「tsit-má」、「liâm-mi」 kā寫--出-來？
Tī社會ê各種交際溝通工具當中，每一種語言lóng是互相影響、透lām hām借用--ê，每一種語言一直leh產生空間占用ê過程，語言景觀也tuè leh擴散，語言ê分布kap景觀mā變kah愈來愈複雜。華語hām台語是目前台灣兩大使用語言，過去ê『國語政策』是謀殺各種族語ê錯誤政策，beh按怎提升本土語言ê語言景觀能見度對弱勢族群特別重要。台語看板ē-tàng tsiâⁿ做是語言景觀（linguistic landscape）ê主要表現方式之一，語言景觀是政府iah是私人商業機構kap社會大眾溝通ê重要工具kap管道，語言景觀也是提升本土語言活力ê重要因素，無論是tī教育面頂ài建立正確ê書寫系統以外，tī推廣ê部分也ài提高本土語言景觀ê曝光度，當然ài hām創新ê『置入性行銷』做結合，án-ne tsiah有法度全面影響、改變台灣本土語言ê生存環境。
參考冊目
謝菁玉、陳永禹《第二屆台灣語言國際研討會論文選集》〈國語中的閩南語借詞對國語所產生的語意影響〉，文鶴出版有限公司，1998:565-583。
