▍蠓仔香kap蠓仔
作者： 黃桂蘭
伊甸園ê警告，早就bē記--ah
無法度阻擋迷惑
偷偷仔鼻你身軀ê芳味
飛過巴別塔是我一生ê夢
使弄親tsiânn五十做伙來
Tī頂面飛來飛去
Thàng過一層koh一層，下跤
火薰ê麝香hōo我ê意志愈來愈強
明知仔
留戀是一條無回頭ê路
硫磺噴--出ê煙霧是一座hàm古之城
衝出衝入
崩--落-來ê進前
夜市仔ê算命擔
▍夜市仔ê算命擔
作者：林益彰
阿爹講guán ê貴人lóng踮tī頂港
新ê ǹg望充滿未知
別人眼中孤單分明ê城市
走揣ê過程lóng是歡喜
因為guán將艱苦lóng揹tī kha-tsiah-phiann
He是因為失去ê心態變無仝
回頭看tsit段路頭
成功iah是拍ka-la̍uh
無下港ê基礎hām跤步
按怎有tsiūnn北ê路途
一路tsiūnn北，tsia̍p-tsia̍p
回頭看南部，不是留戀
是直覺ê khuà念
阿爹講guán ê貴人lóng踮tī頂港
算命先ê話語大過本地kap所在
自從行出夜市仔ê算命擔
高速公路ê景色
Guán已經真久無見過落南ê花蕊
Tī一个塗豆大ê島嶼內底
勇敢做你愛！
▍勇敢做你愛！
作者：陳俐雯
親愛--ê：
M̄-thang為著「愛」結婚，mā m̄-thang為著「情」改變，因為有一工你ē發現，你熟sāi ê愛ē tī時間ê車輪下恬恬仔走tsing；你所ǹg望ê愛ē因為現實生活ê透lām產生質變。
看khah開--leh，因為緣起緣滅；看khah輕--leh，因為世事皆無常。
Tsit个世間上無情ê考驗是時間，「愛」koh-khah深mā ē薄--去，「情」koh-khah厚mā ē斷sē，分秒lóng是無常ê翼股。
人生短短，愛家己需要智慧，時間無長，做真正ê家己ài有膽量〜勇敢做你愛！
Lim酒人ê khuì口
▍Lim酒人ê khuì口
作者：洪錦田
酒若芳 管待--伊
Tâi蹛塗跤有幾冬
橫直酒蟲ngia̍uh-ngia̍uh動
先開一甕tam看māi
Tsi̍p--一-喙
骨頭tsiâu輕鬆
酒若芳 目空紅
M̄管激了無夠工
橫直喙khoo pho̍k-pho̍k動
買醉免驚跤浮tâng
大喙lim
直透醉酒蟲
酒若芳 siânn喙空
幌頭仔猶原真迷人
橫直厝內照起工
你lán兄弟味相仝
Ûn頭栽
人茫心無茫
酒若芳 hōo空甕
規身出汗人輕鬆
鬥陣總是有緣人
你我交陪講規暗
話盤空
骨頭tsiâu輕鬆
Gōng-gōng等
▍Gōng-gōng等
作者：蔡雲雀
一欉樹一透早gōng-gōng等一群鳥影
一个魚池等待冬去春來ê魚影
膨鼠等待春暖tī樹頭tsǹg來tsǹg去
一pha路燈tī暗暝tshiō--leh
Gōng-gōng等待月娘kap天星
父母等待我細漢ê ǹg望
親像雲tī-leh等待日頭仝款
Guán tī美人樹跤金金看
等待花開花謝
Suah等著山櫻花一phiàn ê粉紅
不知gōng-gōng等--ê是guán
Iah是he等待春天ê花欉
剪絨仔花
▍剪絨仔花
作者：陳美圓
剪絨仔花有紅有白
紅色表示健康kap祝福
白色表示思念kap回憶
Guán已經有十年無見著你
Tī每年ê母親節
Ia̍h是tī街路上
看著kap你年紀相仝
過去ê種種lóng ē浮tī目睭前
Lán ê母仔囝情
永遠囥tī心肝底
Ǹg望阿母你tī別ê所在
過了平安快樂
Guá ê tshit-thô-mi̍h（我ê𨑨迌物）（有聲♪）
▍Guá ê tshit-thô-mi̍h
作者：Ko Ka-hui
Ē-kì-tit guá sè-hàn ê sî, guá ê a-pah kap a-bú lóng ē bé tsiok tsē hó-sńg ê tshit-thô-mi̍h-á hōo guá sńg, ū ang-á, kan-lo̍k, iah-sī hó-khuànn ê tsheh, koh-ū tsiok tsē hó-sńg ê iù-lia̍p-mi̍h.
Tiānn-tiānn thiann guán a-bú leh kóng: guá sè-hàn ê sî tsiok kuai--ê, i nā teh bô-îng, tō khe̍h hia-ê tshit-thô-mi̍h-á hōo guá sńg, guá lóng sńg kah tsin huann-hí, tsìm tī guá ê tshit-thô-mi̍h ê sè-kài lāi-té.
Tsit-má guá í-king tuā-hàn--ah, guá nā khuànn-tio̍h hia-ê puê-phuānn guá tuā-hàn ê tshit-thô-mi̍h-á, koh lóng ē siūnn-khí guá ê a-pah kap a-bú. Guá ē kè-sio̍k pó-tsûn hia-ê mi̍h-kiānn, hi-bāng tsia-ê tshit-thô-mi̍h-á lóng ē-tàng koh kè-sio̍k puê-phuānn--guá, in-uī he sī siōng bí-lē ê kì-tî, tshin-tshiūnn sī pó-tsûn a-pah kap a-bú tuì guá íng-uán ê ài, tse mā sī siōng pó-puè ê huê-ik--lah!
Ài-tsîng lin-long-se̍h（愛情玲瑯踅）（有聲♪）
▍Ài-tsîng lin-long-se̍h
作者：高嘉徽
(Tē 1 pha)
“A-bí lí hó, guá sī A-suat, ah lí tsuè-kīn hó--bô?” A-suat kóng.
“Guá tsuè-kīn bô hó neh! Kám-kak tsiok bái--ê!” A-bí kóng kah tsiok siong-pī--ê.
“Guá tō hōo tsa-poo phiàn, kám-kak ū-kàu siong-sim--ê!”
A-bí lú kóng lú sè-siann.
“A-bí, tó 1 ê tsa-poo kā lí tsia̍h-tshenn-kha, guá tshuē i sǹg-siàu!!” A-suat kóng kah tsiok siū-khì--ê.
“Aih, guá tō gōng-tuh-tuh, lia̍h-tsún kóng i sī ài--guá--ê, kiat-kó guá huat-hiān i ū lú-pîng-iú--ah, guá tsiah kám-kak hōo phiàn--khì--ah!” A-bí kóng kah lâu ba̍k-sái.
“A-bí, guá hām lí kau-tsîng mā beh 10 tang--ah, lí hit ê sî-tsūn thài-ē bô tshuē guá kóng neh?” A-suat kóng kah tsiok kiann-hiânn--ê.
“Aih iah, ài--tio̍h khah tshám-sí--lah!” Hiông-hiông A-tiok tshut-hiān tī pinn--a teh tuā-siann kóng!
Tsit ê sî-tsūn, A-bí kap A-suat sa lóng bô, A-tiok sī siánn-mih sî-tsūn puh--tshut-lâi--lah! In lóng hōo A-tiok--à kiann-kiann--tio̍h!
“Aih iah, lín ê tánn ū-kàu sè lia̍p--ê, guá tsí-sī kā sū-si̍t kóng--tshut-lâi niâ, kám-kóng guá ū kóng m̄-tio̍h--ooh?” A-tiok kài sîng kóng kah tsiok tshio-tiô--ê.
“A-tiok--à, lí si̍t-tsāi sī honnh……m̄ tsai beh án-tsuánn kóng--lí neh?” A-suat sim-lāi sī ū tsi̍t-tiám-á siū-khì.
A-bí khuànn-tio̍h hit ê suí-bīn ê A-tiok, sī kui pak-tóo hué, sim-lāi siūnn: “Lí tsit khoo tsin-tsiànn tsiok siūnn-beh kā i pa--lo̍h-khì--ê!”
Tsit ê sî-tsūn A-tiok khuànn in 2 ê lâng ê bīn-tshiunn tsiok pháinn-khuànn--ê, tō siūnn-beh suan--ah.
(Tē 2 pha)
A-tiok teh siūnn-khang-siūnn-phāng beh tshòng-tī A-bí, kiat-kó suah hōo A-suat khuànn-phuà kha-tshiú, A-suat sī 1 ê thâu-khak tsiok hó ê lâng, i tsá tō tsai-iánn A-tiok--à siūnn-beh pìnn-khang.
Tsit sî, lâm-tsú-kak tshut-hiān--ah, hit ê phiàn A-bí ê lâng tō sī i, miâ kiò-tsò Phòng-hong.
Hit ê Phòng-hong ta̍k uī khì khi-phiàn tsôo-gín-á, A-bí tō sī kî-tiong 1 ê.
Hit ê A-tiok--à khuànn-tio̍h Phòng-hong lâi--ah, kuánn-kín kā i giú khì pinn--a, sè-siann kā kóng: “Eh, lí m̄ sī bô lú-pîng-iú? Thài-ē kā A-bí--à phiàn--ah! Lí kám tsai-iánn i khàu kah sì-lâm-suî, suah--lo̍h-lâi lí beh án-tsuánn bīn-tuì--i--leh?” A-tiok kî-si̍t mā ē huân-ló, in-uī i tī àm-tiong teh kah-ì A-suat, i bô siūnn-beh hōo A-suat ê hó pîng-iú kan-khóo, siūnn-beh khah ū bīn-tsú--leh.
(Tē 3 pha)
A-bí kap A-suat kiânn tī lōo-tiong, 2 ê lâng lóng teh siūnn, siūnn-kóng beh án-ná tshut 1 kháu khuì.
Kiânn--leh kiânn--leh, tī uat-kak ê tsa̍p-sè-tiàm tú-tio̍h Phòng-hong, tsi̍t-sî A-bí kuànn-tio̍h i sī kui pak-tóo hué, i koh m̄ tsai-iánn Phòng-hong kā phiàn kóng i ū lú-pîng-iú ê tāi-tsì. Tsit siann nā sī hōo A-bí tsai-iánn, i tō tshuah teh tán--ah! Jî-tshiánn tsit ê mā m̄ sī tsin-tsiànn ê lú-pîng-iú.
Tng-tong in koh teh siūnn ê sî-tsūn, hit ê kóng sī Phòng-hong ê “lú-pîng-iú” ê koo-niû-á tī tuì-bīn ê hāng-á-káu ta̍uh-ta̍uh-á kiânn hiòng in 3 ê lâng!
Phòng-hong khuànn m̄-sī-sè, tō kuánn-kín suan-tsáu--ah. Hit ê kóng sī Phòng-hong ê lú-pîng-iú ê lâng miâ kiò-tsò A-hue. A-bí khuànn-tio̍h A-hue, ka-tī kám-kak: “I hiah-nī suí, guá pí i bē kuè--lah!” Kî-si̍t A-bí kan-tann khuànn kuè i 1 bīn niā-niā, tsi̍t-sî A-suat siūnn-kóng, hit ê Phòng-hong sī tshut-ūn--ah--ooh! Hiah-nī suí ê tsa-bóo ta̍k ê m̄ kánn siong-sìn sī i ê lú-pîng-iú! Siūnn-kóng i sī-m̄-sī kā ta̍k ê phiàn! Kā ta̍k ê phiàn kah lin-long-se̍h, tsí-ū A-tiok--à tsai-iánn sū-si̍t.
(Tē 4 pha)
Tī tsit ê ho̍k-tsa̍p ê 4 ê lâng, tsha-put-to 20 huè ê ài, in sī beh án-tsuánn kè-sio̍k--lo̍h-khì neh? Kám-tsîng sī tsin ho̍k-tsa̍p--ê, tann in tsiah tsai-iánn siánn-mi̍h sī tsin--ê iah-sī ké--ê.
M̄-koh kóng-tio̍h Phòng-hong i ê hîng-uî si̍t-tsāi tsiok bô ing-kai--ê. A-suat āu--lâi kap A-bí--à tsiok tsheh-sim--ah, A-bí mā tsai-iánn, in koh khuê-ho̍k in ê tsìng-siông ê sing-ua̍h--ah!
Im-ga̍k-huē（音樂會）（有聲♪）
作者：Ko Ka-hui
Kin-nî 6 gue̍h 24 hit kang sī guá jîn-sing tsiok tiōng-iàu ê ji̍t-tsí, uī-siánn-mi̍h án-ne kóng neh? In-uī tsit kang sī guá tsit sì-lâng tē it tiûnn ián-tsàu ka hun-hióng huē, guá tuânn kǹg-khîm, ián-tsàu ê sî-kan tsha-put-to 40 hun-tsing, tshun ê sî-kan sī kóng kòo-sū ê hun-hióng. Guá ián-tsàu huâ-gí kua, koh ū guá ka-kī sóo tshòng-tsok ê kua, miâ hō-tsò “The song of Veronica”; tsit tiâu kua sī guá siá hōo guá sóo kah-ì ê im-ga̍k-ka ê kua.
Iáu-koh ū tī tsit kái ê ua̍h-tāng, tû-liáu hiān-tiûnn kuan-tsiòng, guá ê piáu-ián mā sī beh hōo hit-ê im-ga̍k-ka thiann--ê, in-ūi i mā tsiok kah-ì tsit tiâu kua, tī guá ê im-ga̍k lōo-tôo tiong, ē-tàng ū án-ne ê ki-huē guá tsin-tsiànn tsiok huan-hí--ê!
Āu puànn tiûnn sī guá ê im-ga̍k kòo-sū, guá hun-hióng im-ga̍k ki-iân ê khuài-lo̍k, liân guá ka-kī mā kám-kak kóng liáu bē-bái neh! Guá it-tīng ē kè-sio̍k pó-tshî guá sóo kah-ì ê im-ga̍k hìng-tshù.
喙（有聲♪）
台文通訊BONG報（No.292）
-----------------------------------------------
▍喙
作者：洪錦田
人講
菱角喙 sian食無夠khuì
闊喙 食四方
Khih喙 未講就làu風
Bih喙 講話bē膨風
粟鳥仔喙 一支喙tsia̍uh bē停
koh孤單
花蛤仔喙 gâu pū瀾
扁喙--ê 講khah密過米篩
Tāi魚喙--ê khah古錐
翹喙--ê 厚性地、快受氣
庄跤生活（有聲♪）
台文通訊BONG報（No.292）
-----------------------------------------------
作者：蘇晏德
庄跤生活真趣味
拄著大廟leh搬戲
廟埕鬧熱有童乩
童乩起tâng頭khi-khi
古早guán兜有飼豬
看伊大隻真歡喜
賣掉ē-tàng趁大錢
全家歡喜好過年
歇睏相招去釣魚
掠魚來做sa-sí-mih
Uan-na食uan-na看電視
暗時埕斗看天星
天頂ê月娘suí koh圓
月娘啊月娘
請你tàu保庇
Hōo guán萬事lóng如意
掠魚來做sa-sí-mih
Uan-na食uan-na看電視
暗時埕斗看天星
天頂ê月娘suí koh圓
月娘啊月娘
請你tàu保庇
Hōo guán萬事lóng如意
愛睏神（有聲♪）
台文通訊BONG報五月號（No.266）
-----------------------------------------------
▍愛睏神
作者：Chiúⁿ
Ji̍t-êng
Siánn-mi̍h
是愛睏神？
老師講：
愛睏神ē hông想beh睏
若án-ne
老師一定是愛睏神
逐擺上老師ê課
我lóng
ē想beh睏
愛睏神上無乖
Tsái
時媽媽叫我起床
我想beh
peh--起-來
伊lóng 叫我
等--一-下….
koh等--一-下
愛睏神上愛看我讀冊
逐擺我kā課本提--起-來
伊就隨來陪--我
阿公上愛聽愛睏神講話
E晡時仔
愛睏神lóng
ē來揣阿公
M̄
知kap阿公講啥
Kan-tann
看阿公ê 頭
一直tàm
一直tàm
愛睏神kap阿公仝款
Lóng bē
陪我sńg電腦
Mā bē 愛sńg
tshit-thô-mih仔
Suah無來叫我睏
害我m̄知thang beh睏
無應該ê歇睏日（有聲♪）
台文通訊BONG報十月號（No.271）
-----------------------------------------------
▍無應該 ê 歇睏日
作者：亞茱
歇睏日
是叫人寫兩倍宿題ê的日子--m̄？
Guán感覺
無應該neh
睏醒--ah
神神--ā倒--leh
M̄免趕緊beh起床
Ē-tàng好好仔想一下tú-tsiah做ê夢
Phâng一杯牛奶、一粒煎卵包
Tī埕--裡
閒閒仔食，閒閒仔lim
Koh ē-tàng聽著白粉鳥kuh-kuh唱歌
去學校ê時，tshiâng-tsāi經過ê小路
M̄-bat名ê野花野草teh ia̍t手
koh有飛--ê、跳--ê、行--ê、爬--ê
真濟古錐 ê小動物
若無歇睏日
Beh按怎有thang去揣--in？
歇睏日
是叫人寫兩倍宿題ê日子--m̄？
Guán tī心內
一直搖頭、搖頭
來去掠地牛（有聲♪）
台文通訊BONG報十月號（No.271）
-----------------------------------------------
▍來去掠地牛
作者：林美麗
細漢ê時，hām阿公去掠地牛是我上快樂ê代誌！
伊騎oo-tóo-bái載我kap小弟，阿兄就騎跤踏車tuè tī後壁，就án-ne，guán一行四名，「phuh、phuh、phuh、phuh」騎tuì舊飛行機場hia。機場拄好tī屏南工業區ê牆圍仔外，一片闊莽莽，khah倚工業區hit頭ê草仔生kah őm-ōm，有人放牛tī hia食草。阿公tshuā guán tī沙仔地tsit頭揣，tsia四khoo輾轉無圍也無tsa̍h，佳哉日頭無kài mé，若無，guán一定曝kah變人乾。
「地牛是啥？」我問阿公。阿公刁工kā我hánn，講：「啊to蹛tī塗跤底ê牛啊，伊mā有兩支角，你若kā弄，伊ē kā你tak őo！」哪有可能？我m̄信！伊若kài大隻哪ē蹛tī塗跤？而且guán雙手gīm兩片薑－ia̍h無提ke-si，是beh按怎「掠」？阿公教guán先揣有落陷kah親像酒漏仔ê塗空，講地牛ē bih tī內底納涼。
阿兄目色好，真緊就揣著一空，阿公kā guán hiàm倚--來，koh suà手at一枝草仔枝，沓沓仔kā伸入去塗空lā。無一下久，草仔枝有leh tín動，阿公緊kā giú--出--來，一隻phú-phú細細隻仔ê龜仔，就hōo草仔枝釣--出--來--ah。哪ē tsiah趣味？地牛可能kài iau-sâi ê款，若無，guán ia̍h無用啥mi̍h做釣餌，suah凊凊彩彩就kā釣--著--ah。
阿公kā地牛囥tī手底hōo guán觀察。詳細kā看，伊除了有一對角koh有六肢跤，連腹肚mā圓滾滾，身軀頂有發幼毛仔，生做是有夠奇怪。阿公講：「地牛真gōng，若揣無草仔枝，tshuah妹妹ê頭毛來釣mā ē使--得。」啥！Beh tshuah我ê頭毛去釣地牛？我tsiah無愛--leh，到時若tshuah了了，我m̄就變秃頭？
大漢了後，tsiah知影阿公講ê「地牛」就是專門食狗蟻ê『蟻獅』，伊ē bih tī沙仔地iah是草埔ê塗跤底，而且伊是「沙牛」m̄是「地牛」，因為阿公m̄-bat字，可能án-ne來hut m̄-tio̍h--去。伊koh有真濟偏名，親像：「沙豬」、「沙猴」，m̄管伊叫做啥mi̍h，hit段掠地牛ê日子，是guán做囡仔ê時上suí ê記持。
Lâi khì se̍h Bān-tan-hiong（有聲♪）
台文通訊BONG報九月號（No.270）
-----------------------------------------------
▍Lâi khì se̍h Bān-tan-hiong
作者：N̂g Huī-lîng
Ta̍k-ê nā kuè-lâi Bān-tan, lóng ē siūnn-tio̍h âng-tāu-á；bô m̄-tio̍h, Bān-tan ê âng-tāu-á ta̍k-lia̍p pá-muá, bô-lūn sī tsú âng-tāu-thng ia̍h-sī tsò âng-tāu-piánn, lóng tsiok ū tsu-bī koh hó-tsia̍h.
M̄-koh, Bān-tan tû-liáu hó-tsia̍h ê âng-tāu í-guā koh ū tshàu-tāu-hū, iûnn-bah-lôo koh ū ōo-ping,tse lóng sī「Tíng-káng ū miâ-siann, ē-káng siōng tshut-miâ」.
Līng-guā, koh tshui-tsiàn ta̍k-ê kíng-tiám, tō sī nî-hué-suann（泥火山） koh bo̍k-tiûnn, lóng sī tsin sik-ha̍p tshin-tsú lí-iû ê hó sóo-tsāi！
Huan-gîng ta̍k-ê nā ū-îng, tsò-hué lâi Bān-tan se̍h-se̍h--leh.
(Tsit篇是高師大台語師資班學員ê宿題，感謝鄭雅怡老師提供)
田頭kap車頭（有聲♪）
台文通訊BONG報九月號（No.270）
-----------------------------------------------
作者：簡鴻綿
以早庄跤囡仔ná外勞仔，時行來台北蹛工場，ka̋ng煮飯tshuā囡仔照顧老大人，趁錢tsiah寄轉去厝tàu-sann-thinn。見若過年過節轉（tńg）--來，查埔查某隨个koh lóng穿kah pha-lih-phá-lih。
看人穿鞋tioh襪，變kah跤尖手幼，hōo留踮故鄉跤手做kah結lan，一khoo烏loo-soo曝kah ná烏鬼仔番，穿插無一个款ê草地sông，想著tsiok厭氣（iàn-khì）--ê，講bē欣羨是hau-siâu--ê！
庄跤人天光做kah暗，做kah beh死beh活，kan-na換三頓飽！規年thàng天，tsiah等二九暝thang有紅包teh年，koh tio̍h看年兜ē有人來討錢--無？Hiàng時起冬落冬lóng相放伴--ê，tàu-sann-kāng作穡bē-tàng提工錢。少年khah愛suí，穿--ê抹--ê有是kā布莊hām賣搖鼓--ê先賒。
有錶仔thang帶tsiah是bē講得稀罕--ê。庄內有一口灶拄tuì海口搬--來，後生有tuì台北寄錶仔hōo老--ê，m̄知是tshenn-mê牛看無，iah是機器漚古tiānn故障，田庄人孽siâu，便路頭路尾拄--著就刁工問：海口伯--à，tsit-má幾點--ah？伊suah逐遍lóng用真重ê腔口應講：「拄好恬--khìr (去)」。Tsit句話母，hōo踮庄跤過in無聊人生ê鄉親，不時提來相謔。
出外是好是bái無人知，上無thang食一个名，少年人相看相樣，suah ē相報拚起來都市。查某囝軟心，m̄甘家己出外，放厝--裡ê人leh受苦，若有兄哥未娶，mā驚歹名；khang-khuè做kah一半，不時坐踮田頭田尾ná聽〈孤女ê願望〉ná吐大氣（khuì），暗時bih leh棉tsioh被--裡háu。查埔ê心肝ke真硬，厝--裡穡頭濟無thang讀冊，序大koh m̄肯放人，in就半暝相招kōo偷走--ê。
「Guán一个叔伯大--ê身軀現to ná hōo狗舐--過，無半sián也siàu想beh kap人去頂港。In hia-ê王--哥柳--哥就教伊偷夯肥料去賣，利用半暝tsiah tshu去mooh；肥料規袋mooh著ē si̍h-su̍t叫，暗時地靈輕緊出破。Khah鬼頭鬼腦--ê，教伊一手ná絞鐵馬ê電火tshiō光，順suà崁袋仔搬tín動ê聲音；一手tsiah ná kā肥料mooh上雙台ê後座，厝內面若有人huah聲tsiah應講：Leh修理孔明車ê電火--lah！」有趁著錢，青峰仔記持iáu不止仔好，若有人講著農家長農家短，伊lóng真興thi̍h íng過細漢蹛庄跤ê代誌，家己ná講頭koh ná phue！
聽著tse，李仔高雄雄想起做囡仔，in規家族仔ê內衫褲lóng穿肥料袋仔做--ê：「有一遍，guán叔--à lim kah醉茫茫，半暝逐个lóng睏了了--ah tsiah轉（tńg）--來，家己摸去屜仔提內衫褲beh洗盪（tn̄g），好死m̄死去hiannh著底線iáu未拆好ê布袋仔；等身軀拭好beh穿，哭爸--ah褲跤suah nng bē過，現tò-siak-hiànn，tshoh kah牙險歪--去，規庄kiōng-beh hōo吵精神！有影有夠無siá-sì--ê，幾若十年--ah，到tann iáu hőng khioh起來餾（liū）。」
李仔高、青峰--a in庄內hit沿仔，lóng是tsih載he無人有ê日子bē tiâu，姑不將tsiah bih-bih-tshih-tshih tuè人沿路唱〈流浪到台北〉。參tshit-thô伴、至親至愛kap土地分開，無奈來到人地生疏ê異鄉拍拚，in ê心情hām志氣，就寄tī〈田庄兄哥〉kap〈舊皮箱ê流浪兒〉ê歌聲--裡。
青峰--a in兜是散kah連肥料錢to無才調納，koh tiānn ài糶（thiò）粟青！Kā人tshuah來相添tsah ê所費khai beh ta--ah，紹介所iáu允無著頭路，先kap人去大橋頭做阿友--ê，tàu搬貨走車碌路，uan-na tī艋舺後驛飼蠓飼幾若暝。
失栽培ê出外囡仔，濟濟目色真好，烏手仔拄著貴人、踏著時機家己做頭家，序細koh有thang受khah kuân ê教育；Ē-hiáu守--ê若m̄是有工場beh「都更」，就是徛家tī市中心厝價大夯。真濟下港囡仔ê艋舺車頭，tsiânn做in對田庄起動出外人生、夢ê列車ê火車母……。
Tann農倉ê田園有hōo政府徵收去做路、公共用地hām特區ê高鐵站、航空城、科學園區無所不至，m̄甘--ê想bē開行短路，m̄願--ê iáu leh陳情抗爭；好運--ê拄著都市計劃，就hōo留leh顧田頭、nuá田塗ê田僑仔khioh著好額人做。
田頭變車頭，hōo tsit頭kap hit頭交通ke真利便，「一日生活圈」kā人kap人ê距離，逐項suah lóng愈離愈遠。
訂閱：
文章 (Atom)