作者：施玉鳳
同學sio招花蓮台東三工tshit-thô，第一站阮來到吉安慶修院，khah早來ê時免收門票，tsit-má除了收門票以外，也改變真濟。早期日本統治台灣ê時，鼓勵日本人移民到花蓮吉安tsit个所在開墾，吉安鄉有一項特色：道路是用棋盤式ê規劃，tsiânn整齊。Tsit間寺廟慶修院，應該是hit時日本人ê信仰中心，內面石柱有落款--ê，是日本高野山真言宗ê教派。慶修院雖然無真大間，但是莊嚴樸實，除了服sāi釋迦牟尼佛，koh有大悲出相88尊，建築iáu維持日本庭園ê風格。
Suà--落-來，花東縱谷一路uì北向南，台9線直直kā催--落-去。秋風吹過嶺，山靜靜靜，經過壽豐新開幕上kài紅ê Starbucks（『星巴克』），講是目前台灣上suí--ê，來kā欣賞--一-下。已經ē-sái看著規箍liàn-tńg漸漸變紅ê美國水松（『落羽松』），逐家停睏--一-下-仔，欣賞夠khuì，繼續起行，來到玉里，來去食ài排隊koh真出名ê臭豆腐kap玉里麵，真正m̄是kan-na食名ê古早味。
第二工早起，去食池上有名ê豆皮做早頓，仝款mā ài排隊，人插插插，好佳哉有價值，芳koh酥，真好食。行tńg去民宿，頭家已經kā鐵馬送到位，同學鬥陣騎鐵馬向池上ê「伯朗大道」前進 ，踮半路拄著田邊有一間土地公廟，逐家leh拜拜，e-e-tīn-tīn真鬧熱，koh有leh搬布袋戲。同學一陣人真hònn奇，就騎鐵馬過去看 ，攑香tuè人拜。鄉親lóng tsiânn好禮，kā阮ia̍t手，邀請阮食芳kòng-kòng ê平安麵，同學逐家碗仔提--leh，就thui--落-去，食平安。廟埕無kài大，有男男女女大人囡仔3、40人。一位oo-bá-sáng講年冬收成，每年lóng無定佗一工，pua̍h-pue請土地公選日子hōo庄頭慶祝拜拜，逐戶lóng ē tshuân好料來謝平安。莫怪阮透早就有聽著炮仔聲，伊koh講liam-mi beh請阮逐家去in厝食tshenn-tshau。
啊！感恩土地ê母親、善良ê百姓、田庄人ê人情味。
騎過黃gìm-gìm、稻穗滿滿ê田路 ，風一tsūn一tsūn，稻浪一湧一湧，田中ng有割稻仔ê車，lu過來lu過去，一車koh一車——五穀豐收，看著hōo人心情歡喜。目睭kheh-kheh，lán就ē鼻著khiū-teh-teh、芳kòng-kòng ê飯芳。
第三工透早天iáu未光，阮kap同學踮鹿野Bunun（『布農』）族ê部落lau-lau se̍h-se̍h--leh，看著在地真濟人前往禮拜堂做禮拜，講是基督教長老教會。Tsit个派系真正hōo人感動，對台灣tsit塊土地貢獻真濟， 無論是深山林內、山頭崙谷尾iah是偏僻原鄉lóng有伊ê身影。Tī鹿野iáu有看著日本ê神社，隔壁有一間廟。廟--裡有一尊有神蹟ê土地公，喙邊ê喙鬚直直長到塗跤koh leh長。Iáu-koh有慈濟證嚴法師少年時為母親祈福、修行ê所在， 阮也有拄著新住民leh賣古早味ê草仔粿……。台灣tsit塊土地是ē生蜜（senn-bi̍t）ê好所在 ，包容能生（lîng-sing）、腹腸真闊。
一路向北，通過玉長磅空接海線台11線， 拄拄接著海岸線hit个時tsūn，真正ē hōo sannh--著。藍色ê大海真迷人，鹹鹹ê海風微微吹，阮一陣人，揣位坐--leh，看海、食便當，kan-na恬恬坐hia搧海風看天頂，koh倒落來靜靜聽海湧聲，一湧koh一湧拍海岸，替大地母親ê喘khuì聲伴奏，享受長濱ê海岸。天清清清，心淨淨淨。
經過「金剛大道」，沿海岸長濱kap真濟年前比較，建築物kap公共設施增加真濟，但是藍色ê天、白色ê雲，波浪花jiok岸猶原無變。
金剛大道浪jiok花
海湧伴奏音樂聲
鹿池豐濱已繁華
鄉土溫情iáu未煞
青春歲月憶風華
十八姑娘少年兄
鏡花水月心中花
蓬萊寶島sì-kè行
