作者：藍春瑞
庄跤人蹛tī iap-thiap ê山邊，ke減lóng有飼狗仔，是濟少niâ。一--來tàu顧厝兼掠蛇，二--來khah bē孤單無聊。就是tsit个緣故，我tī園仔內mā飼三隻來kah阮做伴。逐工看in無煩無惱leh tsông來tsông去，連我to欣羨kah想beh kah in sńg參--落-去。料bē到hit隻上顧家ê白狗仔，kah一尾歹liú-lak ê飯匙銃tshia拚十thóng分，suah無張持過往--去。阮規家口仔lóng m̄甘tiuh-tiuh，連suà幾若工khí-moo bái kah bē清心、無自在。Koh-khah害--ê是文雄kah秀珠，見若講著「阿白」lóng隨喉tīnn，就知影伊kánn-ná一个阮厝內ê人仝款，khah-ke mā凝心、鬱卒bē煞。
是m̄是過頭siàu念ê緣故，文雄kah秀珠koh去斗南鎮一間獸醫hia抱一隻tsiânn古錐ê白狗仔tńg--來。Hit種有透淡薄仔肉色、m̄是純白ê外形，就kā號做「麻糍」。該當有ha̍h，你一聲、我一聲叫kah親hòo-hòo，suah叫tiâu--leh。
論真來講，tú-tsiah出世ê狗仔囝，身軀肥軟仔肥軟、圓kùn-kùn ê漢草，行路開跤ná搖ná tiô ê pān勢，kah白phau-phau、幼mī-mī tú-tsiah ē-hiáu行路ê囡仔phí，bē輸仝一个粿模印--出-來hit一樣，若有精差mā無kài濟。
伊iáu ē趁另外hit兩隻烏狗仔tī園仔內走sio-jiok、tshia拚ê時tsūn，親像lo̍k-kho̍k馬án-ne tuè tī kha-tshng後直透tsông。Khah ē知影跤短身軀矮，sian jiok to bē著。就準講hōo大隻狗e kah kō-kō輾、pha車輪，lóng無kainn kah半聲隨翻身追參--落-去。我是看kah笑bē出--來，tsiok想beh kā mooh來惜惜--leh。
食飯ê時間，我驚伊tsông去kah烏狗sio搶食，三隻分做三个所在kā鍊--起-來，一隻一碗隨人ê隨人好，tsiah bē撞突。Khah ē知影kan-na先倒大隻ê飼料，極ke是thōng兩三秒niâ，做押尾ê細隻就liòng起liòng落吠kah heh-heh叫，親像sái話拄leh huah無pênn-pāng án-ne，真正是iau-sâi kah有賰。Koh-khah壓霸--ê是食四秀仔ê時tsūn，大--ê ē讓細--ê，反顛倒細--ê lóng無leh讓，tsiah是hiau-hīng。
人講細隻飼ê狗仔khah ē仝心，得人疼。啊若大隻tsiah掠來飼--ê，性癖早to tiâu入骨，bē受教。總--是tse lóng iáu小局niâ，m̄管早飼iah是uànn掠，bat飼過狗仔ê人lóng知影，in ê顧家、盡忠顛倒無人ē giâu疑，tsiah是上大齣--ê。Ǹg望伊ē-tàng趕緊大漢，kah阮規家伙仔做伴，求平安順序、逐工樂暢過日就好--ah。
（Tsit篇文章bat刊tī教育部電子報，漢羅用字有調整，原文網址：https://reurl.cc/46GN5v）
