作者：廖啟助
今仔日又koh是三個月一擺、捐血ê日子，我看著冰箱頂ê明信片，提醒家己今仔ài繼續來捐血，m̄-nā ē-tàng幫助有需要ê人，koh ē-tàng hōo家己體內ê血新陳代謝，真正是一兼二顧，助人koh利己。
來到捐血站，猶原無聽著人leh講台語，m̄管是志工iah是護理師lóng講華語來服務tsia-ê愛心人士。我猶原是行到tueh，台語就講到tueh，m̄管身軀邊有偌濟人leh講華語，我仝款是真大pān、真自在全台語kah身邊ê人tsih接溝通，一點仔to bē歹勢。邊--a服務ê志工，繼續講華語來問我ê基本資料，kā我量血壓，無要緊，我mā是繼續用台語來回答伊ê問題。
真緊我就來到捐血車頂面，suà--落-來就是入去一間細kâ間仔ê訪談室，由護理師問beh來捐血ê人一寡khah私人ê問題，我照常用台語應--伊，伊問煞了後，換我問--伊，我講：「Lín tsit-má做護理師ê人，mā tsiok少講台語--ah--honnh？」
伊用台語回答--我：「是--lah！因為lóng無人leh講，阮就tsiok少kah人講--ah。」了後，因為後壁真濟人leh排隊等beh入去訪談驗血，所以我就無koh繼續kah tsit位護理師開講，行出來外口ê椅仔頂坐，恬恬仔觀察來捐血ê人kah護理師lóng用啥mih語言溝通。
換我坐落去捐血ê膨椅頂面，護理師仝款用華語確定我ê基本資料，我照常用台語回答--伊，結果tsit位護理師主動用台語對我講：「你kám是進前bat tī消防隊hia捐過血？」
我講：「Tio̍h--啊，你哪ē知？」
「因為我ē認得你ê聲，而且你lóng講台語。」
我講：「是--啊，原來你是頂擺我kā你鼓勵ài khah tsia̍p講台語hōo其他來捐血ê人聽、hit位我講你ê台語講了真好聽ê護士？」伊講：「是--啊！」
我真歡喜koh kā講：「你kám知，lán hit擺捐血了，我koh專工去寫一篇〈來捐血兼鼓舞護理師講台語〉 ê文章去投稿，koh有錄取--őo！你看，就tī tsia。」我隨tshi̍h手機仔hōo伊看。伊講：「Uah！你真正tsiok有心--neh！」
阮就án-ne ná捐血，ná用台語開講，邊--a leh抽血ê另外一位護士，mā開始用台語kah伊ê同事拍lā涼，suà--落-來來捐血ê一位阿伯--à，聽著阮leh講台語，原底用華語報名姓了，mā開始tuè阮用台語做伙開講。
後--來一位阿公tshuā一个兩、三歲ê查某孫做伙起來beh捐血，伊頭起先mā lóng kah in孫講華語，我就專工用台語去kah tsit个妹妹拍招呼，妹妹lóng聽無，我就繼續用台語koh講一擺hōo伊聽，順suà用華語解sueh hōo妹妹聽。
Tī對面頭拄仔先起--來ê hit位阿伯--à，看著tsit个狀況就開喙講：「Tio̍h--lah，lán iáu是ài盡量kah囡仔講台語，若無，你看tsit-má ê囡仔lóng聽無！」
我mā tuè leh koh補充講：「免煩惱囡仔聽無，頭起先囡仔聽無是tsiok sù常ê代誌，m̄-koh只要lán有堅持kah囡仔講台語，時間一下久，囡仔自然就lóng ē-hiáu聽，甚至是ē-hiáu開喙講台語！」
Hit位阿公聽阮án-ne講，mā應講：「是--lah。」Suà--lueh，我就聽著伊沓沓仔ke用一寡台語kah in阿孫講話。捐血車頂面tī tsit个時tsūn，m̄管是護理師iah是民眾，開始愈來愈濟人leh用台語開講。
所以我kā現場ê人講：「Lán社會氛圍就是親像tsit-má án-ne，頭起先lóng無啥人leh講台語，m̄-koh只要有人願意開始開喙講台語，堅持繼續講台語，身邊ê人，就ē khuann-khuann仔hōo lán tshuā--起-來，mā開始tuè lán講台語，開始將台語khioh--tńg-來。所以邀請lán逐个所有ē-hiáu講台語ê人，m̄免驚歹勢，lán tshuā頭來講台語，hōo台語ē-tàng繼續傳--落-去！」
