作者：吳孟儒
濟濟人掠準講：台語欠詞，補--起-來就好。舊--ê失傳，掀台語文獻khioh--tńg-來。新詞iáu無--ê，就借外來語、用華語詞照漢字讀做台語音，a̍h是另外創新詞。
論真，台語詞彙欠缺一直有人leh補。古早詞語，有ChhoeTaigi thang查早前語料。現代詞彙，有教育部「學科術語臺灣台語／臺灣客語對譯查詢」〔1〕、公視「台語新詞辭庫」〔2〕，mā有民間「台語STEM標準化計畫」〔3〕等等。看tsit个pān勢，台語詞lak--ê、欠--ê，就算iáu無補hōo全，mā是早慢ê代誌——代誌當然無tsiah簡單。
弱勢語言欠詞，病根是因為脫離現實生活，tsiah ē舊--ê phàng見，新--ê koh sa lóng無。語言是人leh接觸變--出-來--ê，beh保存、beh進化tio̍h-ài靠生活中使用。無實際leh用，m̄-nā無法度保留原本ê詞，mā無機會用tsit个語言去理解新ê概念，免講mā無動機去創新詞。就算創--出-來，mā bē繼續用。
每一个詞，拄開始lóng是新詞，親像一粒一粒子，m̄是有掖種就有thang挽瓜。無塗無水，tse子永遠bē puh-ínn。Ài創造環境hōo伊大，台語ê子tsiah有機會開花結果，生湠--出-去。
網路逐工有人leh問：「『ＸＸ』ê台語按怎講？」He下跤留話，講十喙九kha-tshng實在siunn客氣，至少有九百粒kha-tshng，全意見--了-了。意見濟代表有leh關心，當然是好。M̄-koh，留話至少一半是華文；就算是khah頂真寫台文--ê，看in平常時仔leh鋪文，mā是華語為主。台語文就án-ne，一直關tī台語社團、教室內底，行bē出--去。
弱勢語言leh用，有影khah重本。講華語，練痟話、答喙鼓凊彩講lóng無要緊。若講台語，bē輸leh考檢定a̍h是論文口試，每一字lóng ài細膩koh細膩。無慣勢講--ê，ē問--你：為啥mi̍h beh講台語？慣勢講--ê，ē應：台語無人án-ne講--lah，你就講『ＸＸ』（華語）就好。就算拄著仝理念ê台語有志，可能mā ē停落來kah你參詳：為啥mi̍h án-ne講？Án-ne翻kám妥當？Tse是m̄是華語khuì？台語kám有影ē-tàng án-ne講？
是講，教（示）台語--ê竟然koh濟過實際上講／寫台語--ê，tse若寫做小說，m̄知kám算是「魔幻寫實」（magical realism）？
你可能想講：「魔幻寫實」tse詞礙虐礙虐、華語khuì、m̄是台語。是--tih，在下不才程度無夠，想無khah suí-khuì ê台語對譯，先借華語參考翻譯。我mā相信，濟濟有志看著tsit篇隨想ē著一个台語詞，而且phīng「魔幻寫實」khah有台語khuì。
M̄-koh，tsia-ê有志內底，有偌濟ē tī日常生活用著in心目中上suí-khuì、上有台語味ê hit-lō詞？討論文學，拄--著a̍h是其他用ē著「magical realism」tsit个詞ê情境，有偌濟gâu人願意用台語來討論？
Tse tsiah是台語欠詞背後真正ê困境。連（教示別人、糾正別人台語tsiah來）發明台語詞ê人，家己to無啥leh用tsia-ê詞。
新詞án-ne，啊舊詞--leh？有一寡台語自本就有ê詞，tsit-má hông講是華語khuì，hōo華語透lām--著，m̄是台語。比如講「麵包」（mī-pau）tsit个詞，濟濟人當做是hōo現代華語透lām--著。其實1896年《日臺會話大全》就有收，台語至少已經用百外冬。台灣是1895年tsiah hōo日本殖民，若準講「pháng」是日本時代tsiah tsiânn做台語詞，無的確「麵包」ê歷史顛倒khah長。
「麵包」tsit个詞kám是uì古漢文a̍h是閩南語來--ê、用法kah現代華語有仝--無，m̄是判斷台語「有純--無」ê唯一標準。古早台語文獻有收、現代mā有leh講--ê，就是台語。無kah意一種講法，ē-tàng揀家己慣勢--ê講；華語khah強勢，刁工無愛用台華共通詞、beh用台語獨有ê詞，當然mā有伊ê道理。M̄-koh，sì-kè放送「麵包」tsit類台華共通詞是現代華語透lām--過-來ê「新詞」，甚至看--著就beh歹聲嗽huah tse m̄是台語，叫人m̄-thang用，m̄-nā m̄是事實，對台語mā傷害濟過幫贊。Khioh一个「pháng」tńg--來，suah koh tàn一个「麵包」出--去，ke一个減一个，台語詞彙mā無khah濟，極ke是符合一寡有志對「台語khuì」ê想像。
當然，保存弱勢語言m̄是kan-na靠字典就有夠。台語iáu無死，頂一沿ê濟濟人iáu-koh tī--leh，ài緊做調查保存--落-來。按怎調查？Tńg去厝--裡kah家己序大講。台語母語世代ê序大人就是lán上重要、mā上要緊保存ê活語料。
比如講「畢業」tsit个詞，有一寡有志認為「卒業」（tsut-gia̍p）kah卒業變--過-來ê「出業」（tshut-gia̍p）tsiah是台語原本ê講法。實際上，bē少日本時代出世ê序大人慣勢講「畢業」〔4〕，而且1932年ê《臺日大辭典》就有收「畢業」（pit-gia̍p）kah「畢業生」（pit-gia̍p-sing），可見「畢業」絕對m̄是現代華語透lām--過-來ê詞。其實，日語mā用過「畢業」tsit个詞〔5〕，只是現代日語已經無leh用，m̄-tsiah ē造成ē-hiáu現代台語kah日語ê人誤會tsit个漢字詞是現代華語透lām--過-來ê新詞。
若去斟酌聽，就知影濟濟序大慣勢唸「pi̍t-gia̍p」，a̍h是潘科元先生注意--著ê「pī-gia̍p」〔6〕，m̄是《臺日大辭典》收ê「pit-gia̍p」，「畢」tsit字tī其他辭典mā無收「pi̍t」tsit-lō呼音。Khah罕得聽--著ê詞，tuè辭典有收ê讀音來讀khah妥當；m̄-koh像「畢業」tsit種一直有人leh講ê詞，既然民間普遍唸做「pi̍t-gia̍p」，無定ē-tàng當做俗音收入字典，m̄-thang看著kah字典文獻無仝就當做唸tîng-tânn--去。
台語詞有欠ài補，千萬bē-tàng停睏。M̄-koh，tse台語子掖--出-去，ài hōo伊活--落-來，mài hōo伊死tī路邊無人知。Lán出外kah別人講台語，tī社群媒體寫台文，就是leh創造台語環境hōo台語子活--落-來、湠--出-去。台語人tī佗m̄知無要緊，台語Wi-Fi開--落-去：出聲，就有人來sio認；寫--lueh，自然有人來看。
Kā過去ê台語khioh--tńg-來，kah tsit-má ê台語kap做伙，tsiah有法度揣出台語ê理路；用台語自本ê理路去講萬事萬項，tsiah有thang用原本ê語法kah詞彙去吸收新ê概念，hōo欠詞tsit个症頭斷根。
