主講：翁渙瑤
記錄：涂軒豪
本文是2025/2/12講座ê摘要記錄，翁渙瑤先生是文化部「縣市政府推動國家語言專業輔導團隊」計畫主持人、燊玨工作室負責人，mā是台灣基進嘉義黨部主委。
翁渙瑤是台中教育大學台文系出業--ê，中教大ê台文系主要beh培育台語教育相關ê人才。13冬前，翁渙瑤拄畢業，感覺家己對教冊無熱情，加上khah無耐心，若是beh逐工面對學生仔定著chih載bē tiâu，顛倒是伊對地方ê文化、舊厝khah有興趣，自án-ne決定beh kah其他同學行無仝款ê路——做社區營造。
翁渙瑤講起，過去tī農業時代，逐家lóng ē做伙參詳庄頭ê大細項代誌，m̄管是神明生、修理電火柱仔，所有有關社區未來--ê，lóng ē做伙激頭殼，看beh按怎分工khah好勢，無論按怎，lóng ē有一个坐落來討論ê過程。進入工商業社會了後，逐家愈來愈無chit个機會，mā漸漸仔kā chit个概念放bē記--得。
社區營造是啥mi̍h？
1999年，台灣開始chhui-sak「社區營造」。翁渙瑤講，chit个概念是ùi日本來--ê，日本人in ê社區chiok團結--ê，每一个「町」beh做啥mih代誌，lóng有一个機制，每一口灶輪流去做代誌，m̄-koh lán chit-má tī台北，可能連厝邊ê名to hoah bē出--來。社區營造ê核心就是beh hō͘逐家koh tńg來社區內底，參與家己社區ê事務。
講著社區營造，chiok濟在地ê序大ē問：「Lán chia草地所在，我一世人lóng蹛tī chia，thài有啥mi̍h好講--ê？Tńg--來beh創啥mi̍h？」像雲林ê台西，徛tī濁水溪尾，是人講ê「風頭水尾」、無好種作ê土地，beh討趁kan-na ē-tàng靠掠魚，tiāⁿ-tiāⁿ有人出海了後就無tńg--來--ah。台西老輩--ê lóng認為序細若beh有出脫，絕對bē-sái留tī chia；少年人若beh tńg--去，頭一關就是ài回答長輩ê質疑。
西螺ê社區營造
翁渙瑤用伊ê經驗做例來說明社區營造ê實際內容，親像西螺ê「國際志工」。Ùi 2010年開始，每一年ê歇熱lóng ē有一陣20 thóng歲ê少年家行tī西螺ê街仔路，in ùi無仝款ê國家來，m̄是來chhit-thô--ê，in是來參加工作營--ê，tī兩禮拜ê期間做一寡修理舊厝、藝術創作、種菜等等ê khang-khòe。便若有工作營，在地人就ē徛出來tàu出跤手。國際志工hō͘在地人真濟刺激，in ē hòⁿ玄講chia-ê阿啄仔是leh舞啥？
西螺ê另外一个例是「社區劇場」。翁渙瑤ùi西螺大橋講起，chit pán橋tī日本時代開始起，橋墩拄起好就tn̄g著太平洋戰爭，材料chŏaⁿ hō͘日本人運去南洋，一直到戰後，國民黨靠美國ê援助chiah kā橋起好。社區劇場ê頭一齣戲是leh搬李應鏜先生ê故事，伊是起橋過程其中一个chhui-sak者。原底kan-na記錄tī紙本ê歷史，透過戲劇hō͘在地人熟sāi，後--來koh有搬其他在地ê故事，hō͘人知影西螺有真豐富ê人文歷史。
朴子ê社區營造
朴子是翁渙瑤ê故鄉，伊tī chia參與真濟社區營造，其中一个例是日新病院ê保存。日新病院是兩層樓ê西洋樓，起病院ê涂爐醫生是朴子第一代ê西醫，真有歷史價值。M̄-koh涂--家ê後代soah拍算beh kā日新病院賣掉，hō͘建商起大樓。地方ê人知影了後kā擋--落-來，請嘉義縣政府做文資審議，chiah核定列做暫定古蹟。
文史人士希望透過募款來買chit間舊厝ê產權，落尾是hōo朴子配天宮kā買--落-來。廟方認為，既然chit个建築過去是一間病院，就kā轉型做醫療文化館。過去，朴子有真濟人做醫生，翁渙瑤ê團隊leh收集chia-ê醫生ê故事ê時，聽著chiok濟傳奇ê故事，比如有醫師是騎白馬往診--ê，去庄跤kā人看病，無收錢koh騎馬tńg--來。
政治交社區營造ê關係
社區就是有人ê所在，有人ê所在就有政治，政治ê力量若是好--ê，社區就ē ùi好ê方向行，若是bái--ê，進前ê拍拚可能就ē烏有--去。翁渙瑤講，伊拄到西螺ê時chūn，hit个鎮長chiâⁿ支持螺陽文教基金會ê khang-khòe，in kah公所lóng配合了真好。M̄-koh換一个鎮長了後，看重ê mi̍h件lóng無啥仝，新ê鎮長khah要緊社福，對社區營造無注重，致使in需要家己去揣資源。
翁渙瑤認為，若拄著想法無對tâng ê人，tio̍h-ài koh-khah拍拚。像chiok濟所在ê村kah里，lóng有一个發展協會，里長kah協會ê理事長tiāⁿ-tiāⁿ是無仝人，若是in兩个ê意見鬥bē bā，社區ê事務就sak bē tín動，總--是有人ê所在就是ē發生chia-ê代誌，chit款代誌是無答案--ê。
Tī翁渙瑤做社區營造ê chit幾冬，影響上大--ê是馬英九。馬英九執政ê時，文化部長是龍應台，伊要求每一个社區lóng ài去kah中國交流，若有去，chiah ē得著khah濟補助。M̄-koh，m̄是每一个社區lóng有能力kah意願去交中國交流。社區營造ê khang-khòe有真濟是提補助--ê，政策若改變，對社區影響就ē真大。
啊若lán一般人beh按怎參與社區營造--leh？翁渙瑤講，就是做伙去支持願意tī社區拍拚ê人，無論未來ē變做按怎，你chit-má ê行動lóng ē留落種子，tī chit phiàn土地puh芽生湠。
台語sa攏有
線頂看影片
