作者：周欣晴
細漢ê時tsūn，我上愛看尪仔戲。因為伊充滿快樂kap 幻想。Iáu-m̄-koh大漢了後，我顛倒愛去看真人搬ê戲。我感覺透過劇情中ê人，我ē-tàng tuì無仝ê角度去了解濟濟ê代誌。Mā因為in ê經歷直接kap我現實ê生活有關係，所以伊m̄-nā hōo我tsiok濟啟示，mā tī我ê心肝內加添一寡安慰kap勇氣。
五冬前，我bat看過一齣照事實故事搬ê美國電影，號做〈天頂來ê奇蹟〉（Miracles from Heaven）。故事中有一个十歲大ê查某囡仔Anna，伊得著一種無藥thang醫ê病。Anna in老母tshuā伊去看tsiok濟醫生，m̄-koh lóng無法度診斷出Anna破病ê原因。就án-ne，Anna in老母對天公伯--à ê信念受著考驗。原本逐禮拜lóng是伊鼓勵規家伙仔去教堂做禮拜祈禱，後--來因為kap教友有小可仔諍喙，Anna in老母就無koh去教堂--ah。
Anna ê病情愈來愈嚴重，in老母ê心情就愈tio̍h急。伊無法度了解是按怎慈悲ê天公伯--à ē hōo hiah-nī善良ê囡仔受苦，mā無法度確定天公伯--à kám有聽著伊ê祈禱。雖bóng in翁kā伊安搭講：「天公伯--à自然有伊ê舖排」，但是事實就m̄是in所想--ê，伊看bē出天公伯--à按怎kā伊tàu-sann-kāng。伊頭殼內底滿滿lóng是beh按怎去救in查某囝，根本就無心思去祈禱。
Tī絕望ê時tsūn，Anna in老母tsheh心tshuā Anna坐飛機飛去遠遠ê城市，無預約就想beh去揣一个出名ê兒科醫生。Beh約著tsit个出名ê醫生kám有hiah-nī仔簡單？經過幾若擺ê哀求kap幾若工ê等候，安娜終其尾有機會去看著門診，醫生mā kā Anna做真幼路ê全身檢查。落尾醫生kā in老母解sueh講：Anna得著一種歹症頭，現此時iáu未有法度醫治，伊kan-na ē-tàng盡量減輕Anna ê艱苦。聽著醫生tsia-ê話，in老母ê ǹg望即時lóng hua-hua--去--ah。
Tńg去厝--裡，in老母繼續khà電話揣醫生參詳。看著邊--a憂悶ê Anna，in阿姊就招Anna做伙去外口peh樹仔。Tuì頂kuân ànn頭看四箍圍仔，in兩人感覺tsiok心適--ê。Siáng知，in tng-leh ná開講ná享受ê時tsūn，樹枝雄雄斷--去，Anna無張持tuì三層樓kuân ê樹枝跋落去樹心內底，無聲無sueh，m̄知伊ê生死。
來援助ê消防隊講kā樹仔剉--去，對安娜有危險。因為tsit欉樹仔有百年外--ah，樹心內底lóng是phànn--ê，in驚規欉樹仔ē kā伊teh--著。In tio̍h-ài用天梯peh-tsiūnn樹仔，koh用索仔落去樹心內底kā Anna khiú--出-來。三點鐘過--去--ah，救援ê khang-khuè是hiah-nī仔慢趖kap艱難。看著in猶原無法度kā Anna救--出-來，無望ê老母，suah跪tī樹跤，ná哭ná開始唸he伊tsiok久lóng無koh唸ê祈禱文。
經過規工拚勢救，消防隊終其尾kā Anna khiú--出-來。好佳哉，伊iáu leh喘khuì。Anna tuì九公尺kuân跋--落-去、頭殼直接挵著塗跤 ，醫生實在m̄敢相信伊ê皮肉kan-na輕傷niā-niā，無烏青，骨頭mā無斷--去。經過tsit个意外，奇--ê是，Anna顛倒逐工tī外口kap姊妹sńg kah笑頭笑面，mā無koh食止疼藥仔。看著Anna原本圓圓ê腹肚現此時變成平平--ah，in老母歡喜kah hiu-hiu叫。Anna應講mài hiah-nī仔大驚小怪--lah，「伊」講我ē好--起-來--ê。In老母好玄問Anna啥人講伊ē無代誌--ê？Anna tsiah kā伊跋落去樹心了後，靈魂離開身軀kap拄著天公伯--à ê代誌，講一遍hōo in老母聽。
像Anna tsit款奇妙ê遭遇，無定著是每一个人lóng ē拄--著--ê。總--是，若是lán關心ê人心情無爽快，lán濟少ē感受--著。凡勢tse是因為lán溝通ê頻率sio倚，sóo-pái khah ē接受kap受著影響。親像Anna in老母，看著Anna疼tiuh-tiuh，伊mā感覺tsiok痛苦。但是就是因為伊ê心思lóng囥tī Anna hia，bē記得天公伯--à，伊無法度智覺著發生tī in身軀邊濟濟微妙ê奇蹟。反倒tńg看Anna，伊m̄-nā tiānn-tiānn體會著天公伯--à ê陪伴，mā因為伊ê信念，無形中幫助著tī病院熟sāi ê朋友。雖bóng in朋友tio̍h癌艱苦，m̄-koh beh過往ê前幾若禮拜，伊ē-tàng感受著天公伯--à ê愛、心情mā安詳無koh驚惶--ah。
頭一擺我看著tsit齣電影ê時tsūn，我是一tsūn目屎koh一tsūn鼻水。因為真濟冬前我確實有bat經歷--過，mā真了解電影中每一个人ê立場kap心情。Hit當時阮朋友請漢醫來醫治in阿叔阿華，tī邊--a tàu跤手翻譯ê我，看著漢醫用盡伊規身軀ê步數，無暝無日hām閻君khiú大索，心肝內是又koh焦tso又koh無奈。雖bóng漢醫是hiah-nī仔拚勢救， 阿華叔終其尾mā hām每一个人仝款，ài離開tsit个世間。Hit久我無beh相信，mā無法度接受tsit个事實，滿腹ê遺憾kap悲哀實在是無tè講--ah。
Tsit-má想--起-來，我有tang時mā像Anna in老母仝款，愛au tī煩惱內底，愈滾絞就愈bo̍k-bo̍k泅。我lóng是tī拄著上困難iah是上艱苦ê時tsūn，tsiah ē想著beh祈求天公伯--à ê保庇。顛倒若是心情歡喜，代誌lóng sù-sī，心肝就放外外，mā m̄知kā天公伯--à囥tī佗位--ah。M̄-koh tī陪伴阿華叔ê過程當中，我suah智覺--著，我無法度放sak對天公伯--à ê信念。就是因為tiānn-tiānn祈求、hām天公伯--à溝通，tsiah ē-tàng頭攑kuân，離開濁水，kā狀況看hōo清楚。每一種解決ê辦法lóng ē-tàng kā心肝內ê ǹg望點to̍h，mā加添濟濟khuì力繼續向前行。雖bóng結果有可能m̄是我所料想--ê，不而過我ē-tàng看khah開，mā khah ē接受。
每一个人對奇蹟lóng有無仝ê理解。總--是，若是lán ē-tàng用感恩ê心去感受，每一个狀況lóng是微妙ê奇蹟，lóng有天公伯--à ê加持kap保庇。一枝草，一點露，天公伯--à lóng kā lán照顧kah好勢好勢。假使lán ē-sái隨時提醒家己，體會著天公伯--à ê陪伴，lán ê生活定著是真幸福--ê--őo！
