作者：許惠婷
30幾冬前，tī台南ê一个普通人家，有一个查某囡仔出世，伊ê名叫阿英。自細漢到大漢，阿英看in阿母辛苦照顧家庭，tshiânn養家己hām三个兄弟姊妹到大漢。阿英in阿爸是一个無負責任ê老爸，逐工kan-na知影lim酒kah pua̍h-kiáu。趁ê錢家己全部khai了了，m̄是來飼家。阿英in阿母只好做苦工趁錢飼家，無錢就sì-kè kā人借錢。阿英tiānn-tiānn聽in阿母講，個人造業個人擔，伊tsit世人唯一做了m̄-tio̍h ê代誌就是嫁hōo in阿爸。
阿英in阿母是一个傳統ê婦女，雖然嫁m̄-tio̍h人，m̄-koh伊猶原嫁雞tuè雞飛，嫁狗tuè狗走。阿英in阿母只有一个願望——囡仔平安健康大漢上重要。家己儉腸neh肚，辛苦趁錢飼囝，已經變成伊活tī tsit个世間ê目標。阿英hām三个兄弟姊妹知影阿母ê辛苦，家己lóng ē守本份，好好讀冊，tàu做家事，減輕阿母ê負擔。阿英in阿母tiānn-tiānn kah厝邊頭尾講伊tsit世人上幸運ê代誌就是生著乖巧ê囡仔，tsit世人按怎辛苦，mā有價值--ah。
Tī艱苦環境下成長ê阿英，逐工lóng希望家己ē-sái趕緊大漢，出去趁錢，hōo阿母hām其他ê兄弟姊妹一个khah好ê生活。阿英細漢時知影散食人翻身ê機會只有靠讀冊，所以伊tī學校就認真讀冊，考試tiānn-tiānn提著獎學金kah獎狀tńg去厝，hōo in阿母tsiok歡喜。阿英uì阿母身軀頂學著認真拍拚ê重要性，阿母生活態度hōo伊養成負責任、無放棄ê個性。
阿英大漢了後出社會，tsiânn緊就揣著頭路，伊做khang-khuè認真、負責任ê態度hōo逐家lóng信任。伊拄著困難mā bē放棄，伊逐工一步一跤印，最後得著頭家ê欣賞，hōo伊升官加薪，改變厝內底ê經濟環境，hōo阿母食老ê時tsūn m̄免koh辛苦趁錢--ah。
人ê一生，有長有短。有人出世就是好命囝，有人生--出-來tio̍h面對真濟苦難。阿英知影家己m̄是好命囝，阿英一直ē記得阿母講ê話：「做牛tio̍h拖，做人tio̍h磨。」伊相信天公伯有leh看，只要認真拍拚，天公ē疼gōng人。
