主講／黃建龍
記錄／蔡天享
本文是2024/4/10「台語sa攏有」講座ê摘要記錄，黃建龍是台南市湯德章紀念協會理事長。
台語sa攏有 - YouTube 頻道
Lán tsit擺講座來探討湯德章是啥人？為怎樣湯德章tsiah-nī仔重要？煞尾來講轉型正義。講者黃建龍講，湯德章一生bat用過四个名：「新居德章」、「林德章」、「坂井德章」kah「湯德章」，日本人講伊m̄是日本人，中國人講伊是日本人。伊是中國人iah是台灣人？Tse是伊身份認同錯亂ê大問題。伊出世tī日本時代ê台灣，老爸是日本人新居德藏（原姓坂井），擔任日本警官，tī「噍吧哖事件」ê時殉職，老母是台灣人，本姓湯。
湯德章公學校出業了後，考tiâu台南師範學校，m̄-koh第三冬就退學，suà--落-去考tiâu警察，做到「警部補」（差不多是現時ê警察分局局長），後--來，日本人鹿沼正雄駛車挵死台灣人，鹿沼政商關係好，日本警察無人敢辦tsit个案件，湯德章主張追究，致使頂手不滿，伊就憤慨kā頭路辭辭--leh，尾手去日本讀法律，tńg來台南改做辯護士（律師）。
二次大戰結束，國民政府接管台灣，湯德章bat做過台南市南區ê區長，擔任「台南市人民自由保障委員會」主任委員ê時，替受著枉屈ê人申冤，重視人權保障。比論講1946年發生員林事件，台中地方法院指派法警執行緝捕任務，suah tī台中縣警察局hōo警察開銃拍死，湯德章用主任委員ê名義，發文行政長官公署警務處，要求有關當局照相關法律，維護司法正義。
1947年發生二二八事件，湯德章hit時致病染著ma-lá-lí-á，猶原hōo眾人iang做二二八事件處理委員會台南市分會治安組組長，維持台南地區ê治安，尤其是勸戒烏道人士bē-sái作亂。無疑悟，suah hông掠--去，伊無king出其他相關ê人士，終其尾南部防衛司令部講伊是暴徒坂井德章，組織非法團體，擾亂治安，搶劫軍用銃械，判死刑，押去台南民生綠園示眾銃決，連正式ê判決書to無。
有關轉型正義kah歷史記憶ê部份，用西班牙Dictadura de Francisco Franco（『法蘭西斯科．佛朗哥』）獨裁統治來做例，Franco tī 1936年到1975年實行獨裁統治，反對派人士hông監禁、出走流亡iah是受迫害無命。
Franco 1975年過往了後，西班牙tsiah沓沓仔轉型民主，2007年通過《歷史記憶法》（Ley de Memoria Histórica），主要內容包含：一、恢復內戰kah獨裁統治期間受害者ê名譽。二、公共場所禁用獨裁政權ê符號kah標誌，拆除Franco ê記念碑kah雕塑，用Franco號名ê街仔路改名。三、政府愛去發見內戰受害者ê塚仔埔，協助受難者家屬指認。四、埋Franco ê所在烈士谷（Valle de los Caídos）禁止集會遊行，Franco記念碑改做受害者記念碑。五、補償受難者kah in ê親族。六、恢復流亡海外ê受難者kah家屬ê國籍。七、設立歷史記憶檔案文獻中心，公開所有ê資訊。
2020年西班牙進一步通過《民主記憶法》（Ley de Memoria Democrática），內容比《歷史記憶法》ke tsiânn濟koh幼路，比論講為著beh確認受難者hām家屬ê血緣關係，需要抽取人民ê DNA，按怎抽取、保存kah毀掉ê方式lóng有規定。
翻頭來看湯德章，伊tī民生綠園（日本時代ê大正公園）hông銃殺，hia是權力ê中心，邊--a有議會、市政府kah消防隊，本tsiânn有台灣總督兒玉源太郎ê雕像，後--來改做孫文銅像。1997年張燦鍙tsiūnn任市長，kā改名做「湯德章紀念公園」。啊若湯德章ê老厝，2012年當時ê台南市長賴清德kā規劃做歷史城區保留，避免因為都市計畫hông拆--去；2020年有志募款2,000萬，成立湯德章紀念協會，kā老厝買--落-來，tsiânn做湯德章紀念館。
黃建龍強調，tuì文化資產ê角度來講，m̄-nā是保存建築本身niā-niā，koh-khah要緊--ê是大眾共同ê歷史記持。湯德章紀念協會ê宗旨是記念湯德章先生iáu有其他民主前輩、推廣人權kah民主教育、提升歷史文化ê保存kah研究。協會除了tī逐冬3月13湯德章受難日ē辦記念追思會，也tng-leh進行民主人權、轉型正義kah歷史教育，親像辦講座kah展覽、去學校做教育宣傳、導覽人權地景、記錄口述歷史kah出冊。Tsit-má in tī各地戲園leh放ê《尋找湯德章》tsit齣記錄片，ē-tàng hōo lán koh-khah了解湯德章律師。
上尾，黃建龍表示，lán ài知影若無揣出歷史ê真相，就無可能談原諒；若無互相對話，mā免講啥mih和解。
