台一線350.3公里，十字路口ê東爿，高10線鄉道，我kā伊號做路竹ê火焰道；chit篇路竹小故事，beh來紹介路竹紅phàⁿ-phàⁿ ê火焰道沿路ê景觀。
高雄市路竹區大仁路長3,200公尺，chit條火焰道我kā分做三段。
第一段：西爿tùi高10線ê起點，到大仁路kap仁愛路交叉路口，長1,500公尺。
路口南爿ê大姨檳榔（pun-nn̂g）擔，烏貓穿kah súi-tang-tang，北爿ê路友自助餐，供給平民大眾ê腹肚，火焰道ê起點tùi chia開始；沿路行200公尺，經過平交道，tùi北爿看，就是大湖火車頭；行到400公尺，北爿有一間拋hng ê和宏鋼鐵工場，聽gún牽手teh講：chit間鐵工場，gún丈人少年ê時有股份，m̄-koh資金中途hō͘大股東揹走--ah。
行到600公尺，南爿原本有一間歷史悠久ê木材行，m̄知啥in-toaⁿ，soah行chiūⁿ關門ê命運；沿路行到1,200公尺，北爿是印象中ê東昌食品工場，chia是古早ê蘆筍會社。囡仔時代若到假日ê透早，天iáu未光，阿母就叫我起床，chhōa我去揀工場拍掉ê蘆筍，ē-tàng配飯mā ē-tàng俗俗仔賣，m̄-koh chit間蘆筍工場早就收--起-來--ah，chit-má盤hōo統一公司做補給站。
沿路行到1,400公尺，南爿是上mini ê一甲公園，三分鐘公園se̍h一lìn，一甲公園主要ê功能是美化環境。行到1,500公尺，北爿是一甲衙門（派出所）ê舊址，大仁路kap仁愛路交叉路口，也是火焰道第一段ê終點。少年時代ê一甲衙門已經遷徙，老衙門已經拆掉變成pha荒地，hō͘人感嘆時間ê無情。Chit段ê火焰道lóng總1,500公尺，紅phàⁿ-phàⁿ ê火焰花插tī青gím-gím ê樹葉頂面，紅花配青葉ke-thiⁿ大仁路ê光彩。
第二段：中段tùi舊衙門，到大仁路kap金平路交叉路口，長900公尺。
中段是一甲舊街，chit段因為雙爿lóng是建築物無種樹仔，chia是路竹區一甲庄內上鬧熱ê街市。一甲庄真特別，王是庄內第一姓，親像前立法院長王金平、路竹鄉末代鄉長、第一任kap第二任ê區長lóng姓王。Tùi高10線起點行1,650公尺，北爿就是囡仔時代ê一甲福壽戲園舊址。早就已經消失ê老戲園，看bē出過去ê chhia-iāⁿ，逐擺tùi chia經過，lóng ē想著囡仔時代無錢thang看電影，等看戲尾仔ê點點滴滴。
沿路行到1,800公尺，南爿是代天府、一甲市仔、巷仔內有王金平ê老厝，北爿ê大智路路口是全家便利商店，大智路行chiūⁿ北就是往高速公路。行到1,900公尺，北爿是路竹農會一甲分部，2,300公尺是福德宮，短短900公尺ê舊街就有兩間大廟，看ē出一甲舊街過去ê繁華。來到2,400公尺，大智路kap金平路口是中段ê終點，我少年ê時規條金平路lóng是田地，是因為王金平做立法院長tsiah新開ê道路。
第三段：東爿tùi大仁路kap金平路口，到大仁路kap太平路ê交界陸橋頂，長800公尺。
橋跤就是國一高速公路，東爿chit段ê景觀單純，mā是火焰道ê精華地段，雖bóng短短800公尺，m̄-koh花蕊比西爿koh-khah chhia-iāⁿ，徛tī陸橋頂看tùi東爿是阿蓮（A-lian）ê佛教勝地大崗山，橋頂看tùi西爿就是火焰道ê精神——青葉插紅花。火焰花開ê時間通常tī每年ê 1--月到4--月，因為火焰花台灣各地lóng有，所以路竹ê火焰道無管制ê困擾。
#光景bóng uē 專欄，本文使用教育部推薦漢字kap傳統白話字。
台文通訊BONG報316期，2020年7月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
