作者：國立臺灣文學館
Lán敬愛ê台語作家陳雷（1939-2025）， 2025年6月28 tī Kha-ná-tah（加拿大）過身。國立臺灣文學館表示m̄甘，mā呵咾陳雷ê台語文學貢獻出眾。
陳雷，本名吳景裕，臺南麻豆人。臺南一中、臺灣大學醫學系畢業，提著Toronto大學免疫學博士學位。1980年代uì華文成功轉換到台語文創作，陸續完成濟濟台語新詩、小說、散文、戲劇，作品優秀，代表作tsiânn濟，親像〈永遠ê故鄉〉、〈歸仁阿媽〉、《鄉史補記》。陳雷mā是台語文運動ê重要先輩，自1992年開始擔任《台文通訊》主筆，tiānn-tiānn寫社論，mā kiōng-beh逐期lóng有小說、劇本、散文、詩等作品發表。近年，國立成功大學臺灣文學系舉辦「陳雷台灣文學節」（2023）kap蔣發太孫玉枝台語文教育基金會（2025）頒發ê終生貢獻獎，肯定伊tī臺灣文學kap台語創作ê貢獻。
陳雷tshui-sak台語文運動，是kōo濟濟優秀ê創作來實踐，hōo讀者感受台語文ê suí，kap伊厚厚ê臺灣鄉土情、深深ê臺灣意識，無說教、kā政治社會批判自然藏tī內底。親像二二八事件、白色恐怖、西拉雅書寫、去殖民書寫，lóng tsiânn jió-toh。
國立臺灣文學館bat tī「愛・疼・惜：台語文學展」、「臺灣文學ê內在世界」常設展濟擺展出陳雷ê作品，庫房mā典藏陳雷ê《鄉史補記》、劇本〈有hīnn沒嘴〉（有耳無喙）等手稿。臺文館對外推廣ê文學燈箱展示，陳雷作品tsiânn做親近大眾ê好文本。
陳雷堅心tshui-sak台語文學，起造戰後台語小說ê重要風格，作品m̄-nā見證臺灣歷史，mā hōo在地語言ê文學表達能力ē得thang釘根，伊引導真濟人投入台語文學，是一位非常溫暖ê人。伊過身正正是臺灣文壇大大ê損失，伊ê精神kap貢獻lán永久ē kā記tiâu-tiâu。
