作者：蘇正玄 （《台文通訊》前總編輯）
台語文學作家陳雷tī今年多倫多時間6月27過身，chit日拄好是伊ê生日。伊ê離開hō͘我感覺真艱苦、真m̄甘。
陳雷本名吳景裕。我無慣勢叫伊陳雷，lóng叫伊吳醫師。知影吳醫師chit个人是tī 1980年代，hit-chūn伊tī離多倫多點外鐘ê Hamilton開業做家庭醫生，tiāⁿ-tiāⁿ ē出來多倫多參加台灣人ê活動。後--來，阮有做伙參與一寡台灣人ê社團組織，鬥陣ê機會愈來愈濟，就愈來愈熟。
我第一擺讀著吳醫師ê作品，是1991、1992 ê時，美國台獨聯盟ê機關報《台灣公論報》有連載伊ê中篇小說《李石頭ê古怪病》。Hit个進前，我m̄ bat讀過台文小說，m̄-koh小可ē-hiáu台語羅馬字，所以讀有。Chit篇小說用ê語言是生活口語ê台灣話，主要是teh批判台灣社會ê怪現象，原來用台語mā ē-tàng寫真好ê文學作品。
吳醫師是我ê台文老師。1994年初，伊受邀請去多倫多台灣聯合教會教台語文。伊ùi上基本ê羅馬字字母教起，koh chhōa逐家欣賞台文文章，認bat台語文學，引起逐家對台語文ê興趣。聯合教會ê台文課結束了後，一寡人就tī教會外成立一个台文班。
台文班ê老師猶原是吳醫師，每個月上課一擺，不管透風落雪，伊lóng ē tùi Hamilton駛車來多倫多上課。阮tī hia學習羅馬字、練習寫台語文，mā有機會讀著真濟伊ê作品，親像〈永遠ê故鄉〉、〈苦痛ê三月天〉、〈未忘花〉、〈美麗ê樟腦林〉、〈歸仁阿媽〉、〈出國這項代誌〉、〈圖書館ê秘密〉……。真緊就有人ē-hiáu寫台文。
1995年7--月，吳醫師招我做伙去美國德州Houston參加第一屆北美洲台語文夏令會。Chit擺夏令會是台獨聯盟美國本部主席蔡正隆發起--ê。吳醫師tī會中有一場演講，大會節目表kā伊排ê演講題目是「永遠ê故鄉」，m̄-koh其實伊是teh探討台灣人智識份子kap新台灣母語文學運動ê關係。
蔡正隆tī伊性命ê上尾站iáu teh拍拚chhui-sak台語文。伊bat寫一篇〈你願意繼續做一位文盲？〉ê文章刊tī《台灣公論報》，伊問家己kám是母語ê文盲？伊做主席ê時，促成《台灣公論報》ê社論mā有用台文書寫。夏令會過了無偌久，伊tī 10--月過身，吳醫師感念伊ê台灣精神，寫一篇〈M̄願做母語文盲ê博士——蔡正隆〉來記念--伊。2022年，吳醫師親手用PowerPoint做一塊影片「台灣精神——蔡正隆博士」，siàu念chit位好同志。
吳醫師是chhōa我入來做台語文事工ê人。1999年9--月《台文通訊》徙來多倫多，阮成立一个編輯小組，負責編輯khang-khòe。吳醫師雖然無掛名總編輯，m̄-koh伊實際上是幕後ê靈魂人物。伊了真濟時間參與規畫、選稿、改稿、校對種種ê khang-khòe。因為伊ê帶領，刊物ê內容有ke真豐富多元。伊每一期至少ē提供一篇伊ê小說，有時mā有伊ê詩、散文、論說kap戲劇。為著配合《台文通訊》ê刊出，伊寫真濟短篇小說。
2011年12--月，《台文通訊》徙tńg去台灣，台灣總聯絡處接手編輯khang-khòe。多倫多編輯小組tī 12冬ê時間，lóng總編144期。《台文通訊》是台語文運動ê一份真有代表性、真重要ê刊物，有機會tī吳醫師ê領導下參與編輯事工，是一个真有價值ê經驗。
後--來，吳醫師三不五時ē派khang-khòe hō͘我做。親像做一寡台文影片、替伊kā文章貼起去網站、替伊ê演講片加字幕……。最近chit幾年，我ē替伊校對作品，有時mā ē kā漢羅翻做全羅。伊講，漢羅kap全羅對照ē-tàng幫助少年人讀台文ê文章，因為有ê人雖然ē-hiáu讀白話字，m̄-koh無一定ē-hiáu kā漢字用台灣話唸--出-來。
寫作以外，吳醫師mā有參與海外台灣人ê事務。伊bat做過加拿大台灣人教授專業協會副會長。Bat加入加拿大台灣人權協會、加拿大台灣人公共事務會（FAPA Canada）做會員。伊是台灣獨立建國聯盟加拿大本部ê資深盟員。1992年底，伊陪幾位加拿大國會議員kap教會領袖，去台灣觀選立委選舉。伊bat tńg去台灣參加世台會〔1〕ê助選團，為民進黨ê總統候選人助選。
吳醫師最後幾個月入院，大部份ê時間lóng teh睏，m̄-koh精神ê時，iáu是ē想beh寫寡mi̍h件。伊家己拍字寫14篇「Thought of the day」，kā伊tī病疼中間思考ê代誌寫--落-來。每一篇lóng無長，甚至短短幾句，有ê是用英文寫--ê，有ê是用白話字寫--ê，有ê是英語kap白話字對照，大部份是思考人生ê代誌。其中一篇是用英文寫hō͘伊ê牽手明美姐：「To you I have given everything. To me I have received everything. All together they call it Love, the greatest gift of magic of all.」意思是：「對你，我hō͘你一切 。對我，我得著一切。Che一切合--起-來叫做「愛」，是上奇妙、上寶貴ê禮mi̍h。」表達伊對明美姐深深ê感情。
吳醫師是台語文學上重要ê代表性人物。伊雖然離開--lán，m̄-koh伊ê作品ē繼續傳--落-去。Lán永遠siàu念--伊！
1.編註：全名是「世界台灣同鄉會聯合會」。
