作者：陳錦月
Tsit月日，是lán人7--月，不sám時看ē著人家厝門跤口，tshāi一塊桌仔，tshuân kah tsiânn tshenn-tshau teh普渡，敬拜中元公kah好兄弟。逐年中元節beh到進前，阮庄社區ê超峰寺邊--a hit枝放送頭，ē聽著里長放送，通知里民中元普渡舉辦ê日子時辰，招逐家撥時間，踴躍來超峰寺廟埕，參與社區贊普活動。阮tńg來故鄉beh六冬--ah，逐年lóng tī家己厝頭前祭拜。
今仔日頭一改來參加祭典，款幾項果子kah一寡ta料。來到廟埕，看著來參加--ê，占大多數lóng是老大人，in歲頭上無有7、80歲--ah。Tsia-ê序大，有ê掠我金金看，無人bat--我，in叫是我拄仔uì外位搬--來--ê。等我報阮翁ê名了後，一个阿伯隨kā我講：「你tio̍h-ài叫我叔公，tsit个你ài叫伊嬸婆。」Koh有姑婆、姆婆lóng行倚--來，我suah tī tsia kah in sio認、sio-bat。
庄頭細，牽來牽去，kánn-ná菜瓜鬚肉豆藤，牽--起-來lóng是親tsiânn。有一个半ló老ê阿媽講：「啊我就lín ta-kuann ê姑表小妹，蹛lán庄路口入--來倒爿第二間，你tio̍h叫我姑婆。」Hit个叔公笑笑應講：「啊伊就嫁tī lán仝庄裡人，人講 “肥水無流過別人坵”--lih--leh……」。我嫁來tsia一冬khah-ke tio̍h tuè翁婿搬去北部食頭路，時間真緊，離開到tann mā過30外冬--ah。退休tńg來故鄉tsit幾年，我罕得出來kah人puânn-nuá。
頭家固定一禮拜當中，撥一个下早仔，hiânn一大鈷養生茶，來廟前榕仔樹跤，陪tsia-ê老大人開講，講lán食老tio̍h-ài kā身體顧hōo好；koh教in按怎預防pián仙仔，m̄-thang接著一通生份人ê電話，就kā藏tī衫仔櫥內底ê sai-khia錢，phián出來hōo-hōo--人--去。Tsit-má ê老大人，無親像íng過，有店仔頭thang坐，thìng好phò-tāu；in一工到暗，踮厝內坐晝坐暗，無議量。超峰寺廟前tsit欉榕仔樹跤，是in thang行踏開講ê好所在。
Tsit幾年，政府tiānn-tiānn leh宣導，為著環保，普渡拜拜mài燒金紙。姆婆講：「金紙有影ē影響著空氣好bái，lán燒khah少--leh；m̄-koh，經衣白錢bē-sái無燒。經衣是燒hōo hia-ê好兄弟，thang好穿suí-suí來食tshenn-tshau。He ài tī燒頭落香了後，就緊燒--ah」。伊koh講：「桌面ê供品，逐項菜碗lóng tio̍h插一枝香，án-ne叫做 “孝孤”。意思是對好兄弟ê布施、敬意kah感恩。」Tsia-ê老輩，tī儀式--裡，一點仔to無凊彩。
儀式中，有tshiànn唸經團來唸經，逐家徛tī道士後面，用恭敬ê心tuè拜。等第三落香燒kah賰一半ê時，唸經ê主持，伸手kā桌頂一盤一盤ê供物（kìng-mi̍h），me一me一me，向半空中掖，lak kah規塗跤。我斟酌siòng一下真，是糖仔餅仔、紅龜粿、糕仔餅、銀角仔、môo-honn kah pit桃……。
我心肝內teh想：「孝敬孤魂野鬼，tshuân kah規桌頂，有夠phong-phài ê供物，beh hōo好兄弟食一頓tshenn-tshau，哪ē有桌仔無椅仔？Hōo in有thang坐kám無khah sù-sī？供物koh用掖--ê，án-ne khah pì-sù、iah是有年歲、跤手慢鈍ê好兄弟，kám搶有食？Tsia-ê好兄弟，m̄知in有來領受--無？」He是lán凡間人看bē著ê代誌。
儀式過程中，看著tsia-ê 7、80歲ê阿媽，hām囡仔做伙tī hia khû起khû落，khioh銀角仔、khioh紅龜粿、糖仔餅仔等等ê供物，khioh kah歡喜kah。Tī tsit个少年人lóng出外趁食，文化傳承愈來愈簡化ê時代，看著老大人參kan仔孫，做伙出來參加tsit-lō活動，感覺tsiânn貼心。參與tsit改ê普渡，邊--a有長輩牽教，hōo我學著tsiânn濟普渡ê mê角。
