作者：Teng Hongtin 丁鳳珍
一、戰後解嚴了後，台灣母語教育簡史
1987/7/15台灣解除戒嚴。1988/1/13中國國民黨蔣經國總統過身，中國國民黨李登輝用副總統身份繼任中華民國總統。1990/5/20國民大會選舉李登輝做中華民國第八屆總統。1996年，李登輝當選中華民國第九任總統，是中華民國歷史上頭一位公民直選ê總統。〔1〕 2000/5/20～2008/5/19民進黨陳水扁做總統，2008/5/20～2016/5/19中國國民黨馬英九做總統，2016/5/20～2024/5/19民進黨蔡英文做總統，2024/5/20到taⁿ民進黨賴清德做總統。
1990年宜蘭縣縣長游錫堃tī全縣國小開始實施母語教育，是全國頭一个開始做小學母語教育ê縣市，hit時ê教育部長毛高文公開反對。1993年教育部chiah修訂發佈實施ê國民小學課程標準，增列「鄉土教學活動」，納入正式課程。
2001/8/1（90學年度）開始，照教育部國民中小學九年一貫課程綱要ê規定，國小一～六年級學生，tio̍h-ài按台語、客家語、原住民族語chit三種本土語言揀一款修習。國中是自由選修，結局是chiâⁿ罕得開課。高中kap大學無要求ài有母語課程。
2019/8/1（108學年度）教育部正式實施《十二年國民基本教育課程綱要總綱》（108課綱），因為文化部（鄭麗君部長）tī 2019/1/9公佈《國家語言發展法》，致使教育部tī 2021年3--月公佈修正版ê總綱。
文化部tī 2019/1/9公佈《國家語言發展法》，第9條第2項『中央教育主管機關應於國民基本教育各階段，將國家語言列為部定課程。學校教育得使用各國家語言為之。』明確規範ài tī三冬內kā國家語言列做國民教育各階段ê部定課程，上尾ê生效日期是2022/8/1，規定中華民國ê中小學生ài按台語、客語、原住民族語、手語iah是馬祖話，揀一款語言來學習。
2022/8/1（111學年度）中華民國教育部開始tī國中一～二年級逐學期必選修一節本土語文，國中三年仔是選修，由學校調查學生ê學習意願chiah決定kám beh開課；高中kan-na必修2學分，koh thang規劃兩个2學分ê「校訂課程」選修。M̄-kú，選修課lóng無強制力，國中三年仔參高中ê台灣母語選修課，事實就是「放牛食草」，教育部全然無beh承擔責任。
2024/5/20賴清德總統就任，新內閣ê行政院長是卓榮泰、行政院副院長是鄭麗君、教育部長是鄭英耀。2024/7/19中央通訊社新聞：教育部預告 閩南語認證考試正名「臺灣台語」。Lán ǹg望mā要求教育部ài kā『中國閩南語』lóng改做「臺灣台語」。啊che，kan-na是lán ài beh實現ê公平正義ê一屑屑仔niā-niā。
Lán若是提台灣母語tī十二年國民義務教育ê必修節數，參「外國語言（中國話、英語）」做比較，特別是中國國民黨紮來台灣ê殖民語言「中國話文」，就明顯ē-tàng看著當今ê教育部參規个中華民國政府對台灣母語猶原是不公不義，猶原堅持beh延續中國國民黨紮--來ê殖民語言教育政策。台灣人kám有感覺án-ni chiâⁿ hiau-hēng？Lán定著ài繼續為義來鬥爭。 〔2〕
二、大學ê台灣語文學系創系ê歷史
1997年新竹師範學院成立「台灣語言研究與教學研究所」碩士班，2003年成立博士班。2016年11--月新竹教育大學、清華大學kap校，新設「竹師教育學院」，chêng 2017/8/1正式招生。Chit-má清華大學「竹師教育學院」ê「台灣語言研究與教學研究所」有碩士班kap博士班，無大學部。
2003/8/1台灣師範大學成立「台灣文化及語言文學研究所」碩士班。2011/8/1增設大學部，mā改名「台灣語文學系」，簡稱「台文系」，chit个系是目前唯一有博士、碩士kap學士班ê台灣語文學系。
2007年高雄師範大學成立「台灣文化及語言研究所」、2008年成立「台灣歷史研究所」，2011/8/1 kap做「台灣歷史文化及語言研究所」，kan-na碩士班。
Tī台灣ê大學想beh有機會讀台灣語文學系學士班，是ùi 2003年8--月chiah開始有--ê。Che也是因為hit時ê總統陳水扁參教育部鼓勵大學積極設立台灣學相關系所ê政策。 〔3〕
2003年熱--人，真理大學ê台灣語言學系kap中山醫學大學ê台灣語文學系大學部第一屆開始招生，che是通世界頭一擺有大學設立台灣語文學系ê學士班。
隔tńg年，2004年8--月有兩間大學mā設立台灣語文學系ê學士班，就是台中師範學院（2005/8/1改名台中教育大學）台灣語文學系、聯合大學台灣語文與傳播學系。2005年8--月花蓮教育大學台灣語文學系第一屆招生，2005年hit時台灣有五間大學有設立台灣語文學系。
可惜--ê是，真理大學台灣語言學系自2007年8--月停止招生，已經廢系。2008年8--月東華大學kap花蓮教育大學正式合併，台灣語文學系kap入去華文文學系，也已經廢系。中山醫學大學ê台灣語文學系tī 2013年8--月停招，thèng候2016年第十屆學生出業，就無--去--ah。
2024年台灣ê高中出業生若是想beh讀台灣語文學系ê學士班，就kan-na賰台中教育大學台灣語文學系（台語為主）、聯合大學台灣語文與傳播學系（客語為主）、台灣師範大學台灣語文學系。
三、中教大人文學院台語系簡介
1. 台中教育大學
簡稱「中教大」、「NTCU」。Éng過bat簡稱「中師」、「台中師範」、「台中師專」。現任校長郭伯臣（2022/8/1 chiūⁿ任），是教育資訊與測驗統計研究所ê教授。Chit-má是師培kap非師培並行ê大學，有教育學院、人文學院、理學院kap管理學院，學生大約5,000外人。
日本時代1899年tī彰化文廟「台中師範學校」創校，到2024年創校125冬。1902年bat停辦。1923年台灣總督府台中師範學校tī台中川端町kap後壠子（現此時ê住址：台中市西區民生路140號）復校，設演習科，修業年限七冬。1928年4--月chit-má ê行政樓落成，創設附屬小學。
1945年12--月改做「台灣省立台中師範學校」，開辦三年制普通科，收初中、初職出業生。1960年9--月升格做「省立台中師範專科學校」，辦理三年制國小師資科，招收普師、特師、高中kap高職出業生。1963年8--月增設五年制國校師資科，收初中、初職出業生。Koh成立夜間部。1987年7--月改制做「省立台中師範學院」。1991年7--月改屬教育部，校名改做「國立台中師範學院」。2000年8--月賴清標做校長，任內2004年設立台灣語文學系。2005年8--月改名「國立台中教育大學」到taⁿ。
2. 人文學院
2005年成立到taⁿ 19冬。現任院長是林欽賢（2022/8/1 chiūⁿ任），是美術學系ê教授。目前有設七个系所：1.語文教育學系、2.區域與社會發展學系、3.美術學系、4.音樂學系、5.諮商與應用心理學系、6.台灣語文學系、7.英語學系。
3. 台灣語文學系
簡稱「台語系」，屬tī人文學院。現任系主任：楊允言（2024/8/1 chiūⁿ任）。2004年（93學年）創立台灣語文學系學士班一班，創系系主任是洪惟仁。2018年（107學年）增設碩士班一班。Chit-má是師培kap非師培並行ê學系。創系ê時kā教育部申請ê名是用「台」m̄是「臺」，官方用字寫做「台」，系上課程lóng用「台」。Chêng 2022年（111學年）開始，閩南語ê課lóng正名做「台語」。
四、中教大台語系20冬（2004/8/1～2024/8/11）
1. 中教大台語系創系ê故事
2004年7月17，中華民國副總統呂秀蓮來台中師範學院，主持台灣語文學系「開系典禮（揭牌儀式）」，在場koh有來自各地ê學界、文化界三百外位ê貴賓，包含國史館館長張炎憲教授。Chit个系是tī 21世紀初新設立ê學系，以培育母語教學師資kap多元能力ê台灣語文人才為宗旨。
有接受過戰後ê台灣教育ê台灣人lóng知影，數十年來，lán國家ê師範教育所栽培--出-來ê老師，lóng是tī教育前線禁止學生囡仔講台灣母語ê母語殺手。因為án-ni，2004年台中師範學院ē-sái成立台灣語文學系，m̄-nā意義重大，mā hō͘台灣人有萬千感動kap感慨。Che ài感謝hit當時ê校長賴清標ê全力支持，koh-khah ài感謝幾位資深ê教授：蔡志展、張炫文、陳弘昌ê催生，koh請本底tī元智大學教冊ê洪惟仁來做創系系主任，規劃創系濟濟事工，hō͘ chit个系有真讚ê開始，親像堅持台語系ê課堂語言ài以台語為主，包含hit時台語系ê大一國文kap英文mā是án-ni。
2. 中教大台語系ê系主任kap師資
中教大台語系到taⁿ lóng總有五位系主任：
1. 洪惟仁（2004/8/1～2009/1/31，創系主任）
2. 張淑敏（2009/2/1～2015/1/31，第二位）
3. 方耀乾（2015/2/1～2021/1/31，第三位）
4. 林茂賢（2021/2/1～2024/7/31，第四位）
5. 楊允言（2024/8/1到taⁿ，第五位）
中教大台語系歷年ê專任教師，按到任ê時間排順序：
1. 洪惟仁（教授，2004/8/1到任，2011/7退休）
2. 江俊龍（助理教授，2004/8/1～2005/7/31）
3. 張淑敏（副教授，2005/8/1到taⁿ）
4. 陳麗雪（助理教授，2006/2/1到任，2011/8升副教授，2014/7/31退休，2014/8/1～2015/1/31兼任）
5. 丁鳳珍（助理教授，2006/2/1到任到taⁿ，2017/8/1升副教授）
6. 潘科元（講師，2007/2～2010/2）
7. 林茂賢（副教授，2008/8到taⁿ）
8. 方耀乾（副教授，2010/8/1到任，後--來升教授，2024/7/31退休）
9. 楊允言（助理教授，2010/8/1到任到taⁿ，後--來升副教授）
10. 程俊源（助理教授，2012/2/1到任到taⁿ，2022/8/1升副教授）
11. 駱嘉鵬（副教授，2015/2/1到任，2024/4/7過身）
12. 何信翰（副教授，2017/2/1到任到taⁿ）
13. 梁淑慧（助理教授，2017/2/1到任到taⁿ）
14. 杜仲奇（助理教授，2024/8/1到任到taⁿ）
2024/8/1（113學年度）兼任ê教師有：陳永鑫（客語類kap台語類教師）、林美雀（歌仔戲教師）、王英峻（布袋戲教師）、邱偉欣（台語文學類教師）、林宗德（台灣文化類教師）。
3. 中教大台語系ê教學kap課程設計
中教大台語系2004/8/1（93學年度）成立到2024/8/11（113學年度），有21屆ê大一新生，頭屆到第三屆逐年lóng招收40名學生，自2007年第四屆新生開始，招收50名學生。2008年6--月開始有大學出業生，到2024有17屆出業生。2018/8/1（107學年度）設碩士班一班，逐年收八位碩士生。
Chêng創系到taⁿ，20冬來，除了客語類ê課程，教室ê學習語言kap文字主要lóng是台語kap台語文，老師講台語，系辦講台語，學生上課用台語口頭報告，學生ê課堂簡報、作業、畢業作品kap碩士論文用台語文寫。
2004/8/1創系ê時，全系學生lóng是國小師培生。2007/8/1第四屆改做國小師培kap非師培雙軌並行ê學系。2021/8/1（110學年度）配合師培處ê中等教育學程台語科師資培育生頭屆開始招生（逐年30个名額，全校招生），台語系ê課程規劃mā tòe leh lio̍h仔調整。
初設立ê時無分組，2008年入學ê第五屆學生開始分組，tī大二頂學期起，分做語言文學組kap藝術文化組兩組（2008/8/1～2015/7/31），2015/8/1（104學年度）到taⁿ學士班分組改做「語言與教學組」、「文學與文化組」兩組。
語言課程以台語教學為主，客語、日語、英語等語言教學為輔。課程規劃以多元豐富ê「台灣學」為主，包含台灣語言、台灣歷史、台灣文化、台語文學、台語傳播、台語資訊等等ê領域。Tī台灣母語ê學習頂頭，以開設台語相關ê課程為主；mā有客語類ê課程，koh有台灣南島歷史、文化kap文學類ê課程。
2022/8/1（111學年）中教大台語系課程有khah大ê修改，閩南語ê課lóng正名做「台語」，koh新增學士班大一下必修「台語白話字文獻導讀」2學分，碩士班mā新增必修「台灣學研究方法」kap選修「台語白話字文獻導讀與研究」等等課程。
4. 中教大台語系學生ê出業戶tēng
中教大台語系堅持嚴格辦學，ài beh替世界kap台灣培養優秀ê「台灣學」多元人才，鼓勵學生認真來栽培家己，ǹg望出業生m̄-nā專業能力hō͘人肯定，tī做人、做代誌ê態度頂koân，mā得人呵咾。
為beh確保學生出業了後ê專業才調，中教大台語系有嚴格ê出業戶tēng。大學部ê學生出業進前tio̍h-ài通過台語檢定B2中高級、客語初級、日語N5 ê語言證書；其中客語iah是日語，ē-sái有一項語言檢定採用配套，前提是ài先考過兩擺檢定，無通過，chiah thang用修相關ê選修課來抵免；m̄-kú台語B2（教育部iah是成大全民台檢lóng ē-sái）是一定ài通過ê出業戶tēng，bōe-tàng配套。大學部koh ài完成300點鐘ê自主學習，大學四年仔ài完成koh發表一件畢業作品。
碩士班出業ê要求包含ài通過台語檢定B2中高級，除了特殊狀況，碩士論文ài用台語文寫，無論是漢羅文、全羅文、白話字iah是教育部羅馬字lóng thang。
5. 中教大台語系出業生ê khang-khòe場tī佗位？
因為中教大台語系ê出業生lóng一定有台語檢定B2中高級ê證書，che是in上有利ê特色，因為通世界kan-na in有án-ni奮鬥拚勢考台語檢定ê資歷。In mā是通世界接受嚴格ê台灣學kap台語文教育「折磨」ê台灣特有種，所以，in若是ài beh做參台語文相關ê khang-khòe，in ê實力lóng phēng別人khah勇、khah在。
雖bóng in tī台語文對手競爭激烈ê中教大台語系學習ê過程當中，可能不時ē感覺家己無夠猛、無夠強，m̄-kú，in只要離開中教大台語系，四散到通世界各所在，in lóng是gió-toh ê台語文人才kap台灣學人才。
Lán可能ē tī中小學ê台語課ê講台看--見--in，in mā有可能是國小一般科ê老師。Lán mā有可能tī台語台ê電視畫面內底看--見--in，iah是看著in策劃ê台語節目；也有機會買著in為出版社編輯ê台語文專冊，iah是買著in寫ê台語文ê冊；lán mā thang tī台灣文化相關ê khang-khòe場看見in無閒chhih-chhih ê身影。只要有台語人需要服務ê所在，in lóng有機會出現。
當然，任何一个系所，lóng有kan-na ǹg望ē-tàng有畢業證書就好ê自由青年，中教大台語系mā是sio-siâng。就算出業了後無繼續ǹg台語文ê路行--去，相信in mā是台語文上好ê支持者。
五、話尾kap ǹg望
中教大台語系ē-sái創系是濟濟關心台語教育ê前輩拍拚奮鬥ê成果，中教大台語系ê老師kap學生定著ài感恩，mā ài寶惜chit个台語教育ê基地，奉獻家己ê青春kap khùi力，骨力栽培家己，chiâⁿ做有志氣koh肯拍拚ê台灣青年。
2024/8/1第五位系主任楊允言已經chiūⁿ任。1992/5/3全國性ê「學生台灣語文促進會」成立，楊允言是創會ê會長，青春一目nih，經過32冬，楊允言hōaⁿ中教大台語系chit个台語文教育ê重要基地，hō͘ lán安心kap ǹg望。Lán mā ài繼續骨力拍拚。
1.2012年林瑞榮發表〈我國鄉土教育沿革與發展趨勢〉，chit篇論文討論中華民國ê台灣本土教育發展史kap正式課程ê設科史，mā提出對未來本土教育ê建議。Tī『參、鄉土教育正式設科之過程分析』討論李登輝總統任內chhui-sak教育台灣化ê政策。
2. 1924年賴和ê詩〈吾人〉：「世間未許權存在，勇士當為義鬥爭。」
3. Che mā是鄭正煜kap台灣南社政治遊說ê成果。2000/7/6台灣南社tī高雄市成立，創社ê社長是曾貴海醫生，鄭正煜擔任執行長。發表〈台灣南社宣言〉kap〈台灣南社宗旨〉。鄭正煜先是擔任台灣南社ê執行長，後--來擔任副祕書長、社長，伊是台灣南社chhui-sak「教育台灣化」搖頭旗ê旗手。
