作者：蕭文興
Ē記得tī 38歲ê時tsūn，食頭路食kah真艱苦，頭家tiānn-tiānn揣我麻煩，我mā bē-hiáu kap人鬥陣。日子過kah tsiânn bē爽快，我知影án-ne落--去m̄是辦法。
Hit-tang-tsūn真想beh出國去學英語，iáu-m̄-koh lak袋仔無幾箍銀，mā煩惱講若辭頭路，無收入beh按怎？而且大漢囝tsiah三歲外，太太iáu leh上班，想kah一粒頭兩粒大。
Ak-tsak--一-站-仔，拄著有人紹介一个機會，ē-sái規家伙仔去澳洲學三個月英文；機票kap學費大約25萬，he差不多是阮兜全部ê財產。哈哈哈！哪有可能？想bē到太太竟然同意beh鬥陣去！原來伊mā tsiok想beh出國讀冊，he是伊嫁hōo--我進前上大ê ǹg望。
翁仔某兩人辦好請假三個月ê手續，tshuā大漢後生，飛12點鐘到澳洲南部上大ê島嶼Tasmania，一間基督教神學院WEC。第一擺坐飛機飛tsiah遠，tit-beh歪腰！
Tsit間神學院WEC有世界各國來ê學生，全部lóng用英語溝通。我頭起先聽kah霧sà-sà，親像鴨仔聽雷，感覺真硬táu。差不多規個月了後tsiah慣勢。有一暝眠夢，阮某講我用英語kap人冤家，英語koh tsiânn liàn-tńg。哈哈！Hit-tsūn就知影英語ê「任督二脈」已經拍通--ah。
WEC有tsiok大ê農場，除了讀冊以外，逐禮拜koh ài去農場作穡，lu̍t牛奶、挖馬鈴薯、khau草、piànn掃。逐項lóng ài做，真忝頭，m̄-koh身軀mā ná來ná健康。
目一下nih三個月過--去，tńg到台灣，mā回復原來ê khang-khuè。無偌久發現三四個月進前買ê股票雄雄起一倍外。算算--leh去澳洲ê所費kap留職停薪期間ê薪水lóng趁倒tńg--來--ah。
半年後我換頭路，薪水ke beh一倍。無偌久公司leh問ē-hiáu講英語--無？應講ē-hiáu！就án-ne公司派我去英國蹛三冬外。規家伙仔四个人tī hia有kap台灣無仝款ê生活，真趣味！
俗語leh講：「做雞ài tshíng，做人ài píng。」Tsit-má想起hit當時，我gōng-gōng仔píng，勇敢kā píng--落-去。想bē到顛倒píng出一條新ê人生路，實在真心適！
