作者：陳智銘
小bî是一个五歲ê囡仔，愛交朋友ê囡仔。
有一日，五歲ê小bî，家己出門散步tshit-thô，tī公園看著一蕊特別ê花，青玉色ê枝kap葉，紅寶珠色ê瓣，卵白色ê蕊心，囡仔tsiânn好奇，想berh倚過去觀察，伊來到花ê頭前khû--leh，兩手抱家己ê雙腿，好玄掠花金金siòng。
「有啥mih代誌？」花問。
「Eh！？」囡仔tshuah一tiô，心臟phi̍h-pho̍k跳，險leh倒siàng-hiànn。
「借問你有啥mih代誌？」花koh問。
聽著「借問」，囡仔有khah冷靜，好玄ê心隨淹過驚惶，kā緊張吞落喉嚨，講：「我……我是小bî，kám ē-sái kap你做朋友？」。
「朋友？」花問。
「Tio̍h！」囡仔ê面紅紅，雙手tī跤tâng挲來挲去。
「好--啊！」花講，「你若願意輕輕kā我ê子tīnn--一-下，我就做你ê朋友。」
花用葉仔比邊--a一粒ná水滴、表面一巡一巡像百襇裙，參枝連做伙ê青玉色ê子。
「好。」囡仔應煞，隨用手tshi̍h--一-下，果子變形破--開，淺咖啡色ê子tuānn--出-來，飛kah kua̋n-kuân-kuân，lak kah規sì-kuè，像雨水tsha̍p-tsha̍p滴，滴buē停。
「多謝--你，我ê朋友。」花bi-bi仔笑，規身隨風輕輕仔搖動。
「Buē！」囡仔講完，就kā花ia̍t手講再會。
跤步輕快，囡仔喙笑目笑，不時tiô--一-下，規个人kiōng-berh tèr心情飛--起-來--ah，tī公園走來se̍rh去，順路來到湖水邊。
「Eh？」
倚水墘ê水--裡有一尾魚，魚身一爿是紅色ê鱗，一爿是白色ê鱗，鰭是ē閃爍ê粉紅色，喙phué koh有長長ê鬚，suah hām身軀ê色水倒píng，tī hia khuann-khuann仔泅來泅去。
囡仔走--過-來，kā拍招呼，講「你好？」魚看著囡仔，就泅倚--來，喙開開停tī hia。
「Hngh？」囡仔m̄知魚leh創啥，伊koh講一遍「你好！」
「我有聽--著，緊--啊！」魚繼續kā喙開開。
「Heh！我……」小bî一下講話，魚仔suah合喙，越頭就berh泅走--ah。
「啊！Mài走--lah！Kám……kám ē-sái kap你做朋友？」
「朋友？」魚越tńg來問。
「Tio̍h！我是小bî，你好！」囡仔對魚仔笑--leh笑--leh，m̄知是笑啥mih代誌。
「好--啊！」魚講，「你若願意去揣一粒一粒圓圓、細細粒koh肉色ê mi̍h件hōo我食，我就做你ê朋友。」
「圓圓、細細粒koh肉色？」囡仔問。
「Tio̍h，he mi̍h件芳芳，滋味buē-bái，m̄-koh siunn少--ah，便若有人來，我lóng食無夠額，你去揣khah濟--leh來hōo我食。」魚án-ni應。
「好，我去揣。」講完，囡仔就走kah m̄知人。
魚仔tī水墘繼續慢慢仔泅，泅--過ê所在，水痕搖來搖去，ná像leh畫圖，畫一幅ē tín動ê圖。圖面ê水影浮浮沉沉，隨水iann搖擺，想berh脫離水面舞動ê款，魚仔用鰭huê-huê--leh，加添一寡……。
「Hmh？」囡仔倒來水岸--ah，徛leh喘大khuì，魚仔隨泅--過-來，看著伊ê面紅kì-kì，流汗流khó，規領衫tâm-lok-lok，buē輸拄仔lak落湖水--裡。
「失……失禮，我……我無揣--著。」囡仔ê頭tàm-suê-tàm-suê，無知是忝iah是歹勢。
「……無要緊，我ê朋友，多謝你願意為我來揣。」魚仔講。
「Buē……buē--lah。」Tsiah拄tann頭berh kā看，魚仔就游走--ah，tsit kái伊無回頭，直接bu̍t落水--裡。
囡仔行到邊--a ê大樹跤坐--leh，心內suah感覺燒lō。
「Sah……sah……sah……」
「魚仔？」囡仔徛起來看湖水面ê動靜，kám是魚仔tńg--來--ah？
「Sah……，請你mài siunn倚。」
聲音tuì正爿ê另外一欉樹仔來，離差不多五、六公尺ê所在，囡仔看著一隻鴨仔ku蹛水墘ê草地。
「你好！我是小bî。」囡仔講。
「有啥mih代誌？」紅面ê鴨仔講話速度tsiok緊，kánn-ná tsiânn緊張，iah是講恐惶？
囡仔m̄知koh berh問iah無，berh倚iah mài……「啊！」囡仔雄雄精神--起-來，向前一步，講：「Tio̍h--lah，kám需要我為你做啥？」
「M̄免，mài倚--來！」鴨仔隨接話，態度比湖水ê溫度khah冷淡。
「我ē-hiáu做tsiok濟代誌，無要緊--ōo！」囡仔講。
「M̄！免！」鴨仔態度踏硬kā拒絕。
「Ooh……好……好……歹勢。」囡仔踢著鐵枋，想berh越頭來走--ah。
「……等我ê鴨仔囝pū--出-來，歡迎你來kap in做朋友。」鴨仔ê態度雄雄變柔軟，ná講ná kā伊烏綠色ê翼股徙開一縫hōo囡仔看，原來，伊leh pū-siū--lah！
紅色ê卵、綠色ê卵、藍色ê卵……「Uah！」竟然有七粒彩色ê卵！ 看著tsit幕，囡仔ná覺醒，退後一步，講，「多謝--你，祝福你pū卵順利！」講完就離開--ah。
行無偌遠，囡仔坐tī公園ê椅仔歇睏，lim一寡家己紮出門ê果汁，koh食一塊昨hng賰ê pháng。
「Eh，飽--ah，我berh來tńg--looh。」拄食煞，mi̍h件收收--leh就看著遠遠ê所在有一隻狗tī hia，囡仔隨改變心意，想berh過去kā看。
「Eh？」M̄-koh，狗仔thài ē ná來ná大tuā、愈來愈hai？
「啊！」狗仔向伊衝--過-來--lah！
囡仔有淡薄仔驚，想berh走suah無法度tín動！
「Ai-ioh！」狗仔phak tī囡仔ê身軀，掠囡仔ê面一直tsī、一直tsī……。
「哈……哈……mài……mài koh用--ah--lah！」囡仔kánn-ná tsiânn享受。
「Ooh！」狗仔聽--著，隨tuì囡仔ê身軀落--來，kā囡仔拍招呼，講，「你好！ 我叫阿金。」
「你……你好！」囡仔ná拭面，ná坐起來kā看。
狗仔規身軀ê毛長長koh黃金色，連耳仔ê毛mā長，頭kap胸坎--ê khah倚白色，kha-tsiah後--ê淡薄仔tshàng-tshàng，尾仔一直幌--leh幌--leh，喙舌伸--出-來、發出「hah hah hah」ê聲，頭頂有一片m̄知啥mih時tsūn tiâu tī hia ê ta葉仔，頷頸koh有掛一个寫名ê牌仔。
「我叫小bî。」囡仔講。
「小bî，我kám ē-sái kap你做朋友？」狗仔ná喘ná問。
「Hannh？」小bî kánn-ná無聽--著。
「小bî，我kám ē-sái kap你做朋友？」狗仔koh問一擺。
Tsit時，眼前ê狗仔，開始有淡薄仔霧霧……ná來ná霧、愈來愈霧……，小bî kā目睭juê-juê--leh，「hngh？」有水順伊ê目尾流--落。
「我ē-hiáu顧門、趕歹人，iáu-koh……hmh？」Iáu未講完，小bî雄雄徛--起-來，kā狗仔攬ân-ân。
「好--ah，多謝--你，我……ê……朋……友……。」
Ai-iō-uê，阿金ê毛lóng是喙瀾！
