作者：王大維、吳玉祥
逐家lóng知影台灣是一个厚地動kah風颱ê島嶼，tsit幾冬mā不時仔有大地動發生。過去平均每20冬，就有一擺地牛大翻身，m̄-koh 2016年美濃ê地動kah兩冬後ê花蓮地動就倚真倚。哪ē美濃ê地動湠kah台南ê樓仔厝崩崩倒倒--去--leh？專家講tse就是『震源輻射』，伊uì地動ê源頭傳向四圍ê強度無平濟，tsit kái ê地動拄好向西爿tshuah khah濟。另外，『地震波』拄著台南沖積平原鬆軟ê塗肉發生『場址效應』，m̄-nā『地震波』變強、『震幅』變大，連動ê時間mā拖長，就ná像菜燕仝款tī hia sìm--leh sìm--leh。
台北盆地也是仝款ê『場址效應』，所以雖然九二一地動源頭hiah-nī遠，台北ê大樓mā是倒幾若棟。結構技師講，地動ê時tsūn亭仔跤íng-íng是上lám ê所在，tsit款「軟樓層」若是kan-na兩排柱仔ê『單跨距』，若準有柱仔斷--去，雙層樓枋就ná割包雙爿合--起-來變做一樓，規棟樓mā ná跤uáinn--著ê軟跤蝦，隨時就有可能ē khi--落-去。
1997年，政府kā『耐震設計』規範tuì《建築技術規則》內底切--出-來，tsiânn做獨立ê法規『建築物耐震設計規範』，仝時mā澈底修正『耐震設計』規範，採用khah先進ê『水平加速度反應譜』係數，參照地盤ê種類kap「塗肉含水」（『土壤液化』） ê評估方法，嚴格規定鋼筋紅毛塗ê施工細節。所以1997年以前起ê厝對『耐震設計』ê要求就khah līng，koh再若是借牌ê營造廠，in ê施工就khah凊彩，比如講鋼筋紅毛塗建築內底無仝樓層teh接鋼筋用gá-suh燒，無用新型ê『續接器』。另外mā有等到建築物出問題ê時tsūn，營造廠早就停業解散，親像花蓮地動大樓倒--去就揣無建設公司。Ài注意--ê是lán台灣ê厝平均有一半已經超過30歲，特別是台北市ê舊厝超過七成上嚴重（照戶數計算）。
按我專門teh診斷土地ê經驗來看，都市更新上好空ê就是厝主，免出本錢koh lóng上少增值50%以上。M̄-koh上歹參詳--ê mā是厝主，特別是一樓店面teh稅--人ê厝頭家。最近台北東區一个90戶ê都更案，其中有一間稅無啥ē出--去ê一樓，厝主mā是手攑「建商無誠信、欺騙地主」ê牌仔teh抗議，講伊25坪ê樓跤厝tsiah換一間20坪ê一樓hām一間23坪ê二樓，根本就無到建商當初講ê兩三倍。建商應講一切lóng mā照約teh行，beh告就在你……萬不二若án-ne，規个案來huah擋，時到是佗一爿損失iáu真歹講--leh。
Tsit款案件建商iáu有利純，khah艱苦伊mā是ē tshi̍h落去做，啊若一般住宅區ê舊厝，照《使用分區管制規則》規定，「容積率」就無kài kuân，新厝起好扣掉地主保留戶、賰ê厝kah車位賣掉tsiah有收入；建商算盤tiak-tiak--leh若無利純，伊就bē考慮合建。「容積率」就是一坪土地ē-tàng起偌濟樓枋面積ê比率，koh再ke添《都市更新條例》規定ê容積獎勵成數，算--出-來就是tsit塊土地ē-tàng起ê上盡磅ê規模。雖然政府用心計較teh tshiau空揣縫增加容積beh來siânn建商，比如講用錢買容積（移轉）、iah是捷運站出口500公尺內ê土地增加容積，m̄-koh建商ê風險iáu是上kuân--ê。
所以厝主beh等建商tshiâu kah好勢，規氣家己來『自主都更』，先hōo火車出月台tsiah-koh講。經過tsiah濟冬政府已經對『都更』ê流程真熟手，mā tsia̍p-tsia̍p teh公佈詳細ê規範hōo逐家照步去行。政府m̄-nā邀請專家做伙來審查送件ê計畫，所有ê siàu目有眾人teh金金看，koh公開抽籤選三个獨立估價師來隨筆仔評估產權ê價值，透明ê過程hōo逐家感覺khah公平放心。Mā是因為有án-ne teh監督，銀行tsiah願意提供全額ê貸款。新厝起好一部份賣掉去還貸款（總成本），賰--ê就hōo厝主照股聲（權值）來分——「ke pun就補錢，減pun就領錢，逐家歡喜甘願。」
Tú-tsiah講ê「自主都更」tsiok濟人iáu m̄知影，有ê案件mā真有可能因為開始發動hit時ê資金有厝主提bē出--來，講bē成就散股--去。Tsit-má tsit部份ê資金政府有補助一半左右，講--起-來是tsiânn有誠意teh tshui-sak。逐家m̄-thang愛錢無愛命，規工leh nǹg錢空，後擺大地動若koh來就走bē赴--looh！
