記錄／王璽馮
編按：本文是2023/8/13棲地復育台語講座ê摘要記錄，講者蘇銀添是嘉義縣生態保育協會總幹事。
台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃有關生態環境議題ê台語講座，歡迎逐家同齊來擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
今仔日ê講者是嘉義縣生態保育協會總幹事蘇銀添老師，伊是研究鱟20年ê學者，beh來kā阮好好仔介紹鱟tsit个神奇ê動物。
鱟ê歷史演化
鱟tī四億八千萬年前「古生代奧陶紀」就已經存在，伊kap「腔棘魚」仝款是活化石。鱟ê形態自兩億年前經歷「恐龍滅絕」kap「冰河時期」到tann無siunn濟變化。Tī 4,000萬到5,000萬年前演化出「月盾鱟」，「月盾鱟」kha-tsiah分做七tsat、尾分做三tsat，身軀無刺；m̄-koh現代鱟ê kha-tsiah kap尾就lóng無分tsat，身軀有刺。鱟雖然是活化石，mā是有一寡無仝ê所在。
鱟ê生態kap構造
鱟是海洋節肢動物，kap蜘蛛、蠍仔是khah倚ê親tsiânn。英語叫做「馬蹄蟹（Horseshoe crab）」；討海人叫in「翁仔某魚」，因為鱟lóng是一對做伙生活，所以討海人leh算鱟是用「對」做單位；阿兵哥叫in『鋼盔魚』。現代鱟有四種：「三棘鱟（中國鱟）、南方鱟（巨鱟）、圓尾鱟、美洲鱟（唯一無tī亞洲ê鱟）」，lóng是海水種。分佈tī台灣西部、台灣東北角、澎湖、金門ê鱟是「三棘鱟」，tsit-má有棲地受破壞ê問題。因為現代鱟有寄生蟲，蘇銀添ê研究團隊ē kā in洗身軀，m̄-koh鱟若食淡水超過三分鐘就ē死，ài真細膩。
鱟分做頭胸甲、腹甲、劍尾。鱟頭周圍有八蕊感光用ê單眼、鱟頭兩爿有一對看mi̍h件ê複眼。鱟ê喙tī kha-tsiah後兩肢跤ê中ng，有倒勾ê鋼毛，in用第一對跤ngeh食物。鱟ê書鰓下跤有生殖空，hōo in體外受精。鱟ê生殖期是五日節到中秋，鱟母ē āinn鱟公到海坪交尾。鱟母khah大隻，鱟母ê頭圓圓，tī劍尾有三對刺，方便hōo鱟公khi̍p，鱟母ê跤lóng是khînn仔ê形；鱟公khah細隻，鱟公ê頭翹翹，tī劍尾有六對刺，鱟公ê跤第二、三對是鉤仔ê形，方便kā鱟母khi̍p-tiâu--leh，賰ê跤是khînn仔ê形。M̄-koh鱟母kap鱟公細漢ê時lóng生做仝款。
一齡鱟消化家己身軀卵黃囊內底ê卵黃質，m̄免食mi̍h件，就ē-sái活一冬；二齡鱟以後tsiah開始需要食mi̍h件。幼鱟蹛tī海坪ê lo̍k糊糜，食螺貝、海蜈蚣等；成鱟蹛tī海面下底20到30公尺，是雜食性，除了食螺貝kap海蜈蚣，koh ē食海草。鱟食螺貝是用跤iah是刺弓開螺仔殼，食殼內底ê肉。
鱟kap人類ê關係
討海人ē掠鱟來食補、lim鱟血（鱟奶）、食鱟殼炒蚵麵，kap用鱟ê頭胸甲做水khat仔、藝術作品。金門人ē用鱟畫「虎頭牌」來避邪，三峽祖師廟有鱟ê石雕kap柴雕，台灣府城隍廟有鱟ê石雕，艋舺龍山寺門柱ê石珠mā有畫鱟kap石距，有「有孝」ê意思。Tī生態方面，觀察海坪kám有鱟ē-sái知影環境有健康--無；tī醫學用品方面，鱟ē-sái做試劑來檢測細菌內毒素ê感染。
相關ê gia̍t-khiat仔話kap俗諺
「掠孤鱟，衰到老；掠鱟公，衰三冬；掠鱟母，衰真久」：漁民講掠一隻鱟ē拍歹好姻緣，ē有歹運，所以ài放伊走。「掠鱟」是掠猴ê意思；「鱟hia」是古早人用鱟殼做ê水khat仔；「鱟跤蟯」是bih tī鱟下底ê蟯，m̄免煩惱代誌，比喻『靠爸族』。「M̄掠蟳，beh掠鱟」：蟳有兩肢蟳管，beh kā掠可能ē受傷，m̄-koh鱟kan-na ē沓沓仔爬，khah好掠，比喻食軟驚硬。
蠻野講堂
#棲地復育台語講座 專欄，本文使用教育部推薦漢字kap台羅。
#台文通訊BONG報 354期，2023年9月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
