宜蘭ê米粉羹、魚丸kap草仔粿

作者:李麗華


阮爸爸是宜蘭人,uì 16歲就到台北學師仔修理車。後--來,伊若tshuā阮tńg去宜蘭,lóng愛tshuā阮去食米粉羹、買魚丸kap草仔粿。宜蘭ê米粉羹是tsiok在地ê食mi̍h,親像台北ê蚵仔麵線仝款。


M̄-koh宜蘭米粉羹ê麵線是用khah粗ê米粉,大骨、柴魚先去kûn湯,摻木耳絲、筍絲、紅菜頭簽kap肉羹了後,tsiah-koh牽羹。Khat tī碗公內,lâm淡薄仔烏醋、囥一點仔芫荽,就tsiok好食。阮爸爸逐擺tńg--去,lóng ài去永和寺邊--a ê擔仔食一大碗tsiah歡喜。


阮爸爸koh ē tshuā阮去羅東市場前買魚丸,伊講宜蘭ê魚丸是正港鯊魚去拍--ê,食--起-來khah芳。一擺伊lóng ài買十外斤帶tńg來台北。


Suà--落-來,koh ài去冬山買草仔粿。阮爸爸講宜蘭粿kap台北--ê做法無仝。台北--ê是tsu̍t米漿包餡了後囥tī lâng-sn̂g去炊,tsit款--ê囥到下晡就tīng--去--ah。宜蘭--ê是tsu̍t米漿炊了ài去絞--過tsiah包餡,現買現包,皮khah khiū,ē-sái囥三工,皮bē tīng--去。


Tsit三項就是阮兜上愛食ê mih仔。



(作者是永和小小書房台語課學員)














寶島好食mi̍h 專欄,本文使用教育部推薦漢字kap臺灣閩南語羅馬字拼音方案。

#台文通訊BONG報 342期,2022年9月出刊。

歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會


#李江却台語文教基金會 需要你ê定期捐款,逐年贊助本會(台文通訊BONG報發行單位)NT$2,400,lán做伙復振台灣語文ê事工kap雜誌編印發行費用,捐款thang抵稅。