作者：夏玉華
飛行機khuann-khuann仔降落tī桃園機場，空中小姐拄放送講ē-tàng使用手機仔通訊--ah，我趕緊拍開，看--著--ê suah是大姊ê查某囝傳--來ê歹消息：「媽媽tī今仔日早起5點39分過身--ah！」，我控制bē tiâu、開始細聲tshn̍gh--leh tshn̍gh--leh，管待邊--a koh有別人掠我金金siòng，目屎一滴一滴滴tī手機仔頂。
我一直siòng手錶仔，桃園機場到台北殯儀館哪ē變kah tsiah-nī遠？入去靈堂看--著--ê只賰hit張阿姊微微仔對我笑ê相niā-niā。無法度koh當面kap阿姊sio辭，kan-na ē-tàng kā我滿腹ê遺憾寫tī下面tsit張永遠寄bē出--去ê批內。
阿姊：
Tī你tih-beh過身ê前半個月，你講知影家己賰無偌濟時間--ah，叫阮tsia-ê小弟小妹ài去kā你看，我回你講因為趕beh出國，等阮khah有閒tsiah做伙去。若準講hit-tang-tsūn我知影he是lán兄弟姊妹最後一擺見面，半暝我mā ē kā逐家拖--去。過年前你ê內孫出世，lán lóng希望一喜ē-tàng破九災，你ê身體ē-tàng khah好--淡-薄-仔。無奈你仝款無法度抵抗病魔ê折磨，tńg去天頂做仙--ah！
Tī國外手機仔因為開飛行模式，tńg來台灣了後檢查無接--著ê電話，內底有一通是阿姊你khà--來--ê，你kám是beh khà電話kap我sio辭？你哪ē無beh等--我，等我tńg來kap你好好仔開講、同齊看你ê金孫--啊？Lán姊妹仔m̄是有約束beh koh做伙食飯、做伙唱歌、做伙tshit-thô，你哪ē-tàng騙--我？
你ê告別式拄好是tī愚人節hit日，大姊，tse kám是你leh kap阮滾sńg笑？Tse m̄是真--ê tio̍h--無？你kám真正無--去--ah？阮真正希望he一切lóng是假--ê。Kap你見最後一面，看著你安詳ê面容，kánn-ná leh睏，我有khah放心--小-可。雖然我知bē-tàng哭，你tsiah有法度行ē開跤，m̄-koh愛哭神本來就tài重ê我，beh哪擋ē tiâu--leh？規條手巾仔tâm-lok-lok。除了m̄甘iáu是m̄甘，以後lán五个兄弟姊妹減你一个，已經無夠完整--ah。日後beh koh見面，kan-na ē-tàng tī夢中。
收音機傳來一條歌：「想beh tuè你飛」，愈聽心肝頭愈酸，我tī心內一聲koh一聲leh叫阿姊，你kám有聽--著？現此時kám有人陪你開講，我對你ê思念，你kám有收--著？
