《『星空隧道』
——你hōo我揣kah tsiok辛苦！》/馥耘
透早日頭就精神飽tīnn，kā規个世界tshiō kah光iānn-iānn，看著tsiah-nī好ê天氣，我心內hit个愛tshit-thô ê靈魂又koh擋bē tiâu--ah。想著昨hng tī手機仔有看著人leh分享旗津ê風景，好，就是伊--ah。行！來去！
火車坐到高雄車頭了後換坐捷運，tī月台就ē-tàng直接行到捷運ê通道，拄好uì今仔日透早開放1，有夠好運--ê，án-ne就m̄免樓頂樓跤tī-leh peh起peh落--ah！Tī哈瑪星站落車了後，去租公共跤踏車，騎去坐船過去旗津，就開始今仔日ê旅程--looh。
我今仔日beh來去走揣一个號做『星空隧道』ê所在，看地圖是tī燈塔附近，án-ne就先去燈塔行行--leh。日頭實在siunn熱情--ah，透中晝ê時曝kah ná行汗ná流，m̄敢siunn延tshiân，趕緊揣一个好角度hip一張燈塔kah藍天白雲ê合相，in真正是上sù配ê一對，按怎看按怎suí。
開手機仔ê地圖起來看，是ài行uì炮台hia去，我心內ná行ná giâu疑：tsia to kan-na炮台niâ，哪ē有啥mih磅空--neh？透中晝真正有夠熱ê熱，se̍h來se̍h去揣kah人kiōng-beh hōo日頭曝昏--去--ah。先mài揣--ah，來去食中晝khah要緊，食kah一半ê時，tsiah雄雄想著ē-sái tī手機仔頂kuân揣人分享ê影片來看--啊，有影有夠giàn頭to tio̍h。
Tsit步真正有效，就án-ne我uì另外hit爿開始騎，來到港口ê時，想bē到hōo我看著郵輪tng beh入港，天公伯--à今仔日tsiok疼惜--我--ê。頭起先tī peh去燈塔ê半路就看著軍艦駛--入-來，tsit-má koh看著tsiah kuân、tsiah大隻ê郵輪tī我ê面頭前沓沓仔駛--過，我緊ná kā船頂ê遊客ia̍t手，ná用手機仔kā tsit个景象記錄--落-來。
跤踏車騎tī海邊ê樹林仔內，lóng無人，心內有淡薄仔驚驚，想bē到騎到盡磅看--著--ê是山壁kah海手牽手leh跳舞。我m̄知影旗津有tsiah-nī suí ê風景，ē-tàng聽著海湧拍tī石壁ê聲音，看著tī海水浴場hit爿看bē著ê海，tsiok suí tsiok suí--ê。
Tsia是磅空ê另外hit頭，伊ê名號做旗津灣峽。『星空隧道』，我總算揣著你--ah，雖bóng日頭tsiok炎，天氣tsiok熱，hōo人tsiok忝--ê，m̄-koh我ê心內tsiok歡喜、tsiok滿足--ê。今仔日ê旗津行踏，ē tiâu tī我心內上深上深ê所在。
1 編註：高雄車頭kah高雄捷運ê連通道tī今年8月11開放。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
