《我ê故鄉——桃園龜山楓樹坑》
/舞雨輕風
桃園龜山是一个tiānn-tiānn hōo人跳--過、làng--過ê所在，因為山崙真濟。一般人lóng m̄知影龜山有偌大：一部份ê人蹛tī南崁，一部份蹛tī迴龍，tsit-má有khah濟人蹛tī林口台地。有一寡新搬--來ê外地人掠準講in是蹛tī林口，其實在地人lóng講tsia是坪頂，iah是講koh-khah在地ê地號名。大部份人講ê「龜山」是區公所tsit搭仔，khah早號做「龜崙口」ê所在。
阮兜蹛tī坪頂kap區公所中ng ê山谷內底，號做「楓樹坑」。以早細漢ê時m̄知影是按怎tsia-ê地號名號kah tsiah-nī suí，大漢聽人講是因為古早tsia有tsiok濟野生ê楓仔，一開始叫是華語ê『楓樹』。M̄-koh十外年前，我tńg來故鄉創業，開始調查地理文史tsiah發現，阮tsia ê山區根本就揣無一欉野生楓樹，顛倒是tsit-má已經開墾做忠義路邊--a ê土地公廟「楓福宮」附近，過去有真濟楓仔1。
聽講有4、50欉、lóng ài兩个人以上tsiah攬ē tiâu ê大欉楓仔，莫怪在地人lóng講tsit間土地公廟號做「楓仔跤土地公」。可惜早前人無錢，有人建議kā楓仔跤剉來做戲棚枋，hit-tang-tsūn mā無保護大欉樹仔ê觀念。後--來開忠義路雖然有聽講kā楓仔遷徙走，m̄-koh lóng m̄知影遷去佗位--ah。Tsit-má土地公廟ê大欉楓仔lóng無--去--ah，佳哉tī庄仔內其他山崙內底iáu-koh看ē著。
我tī網路揣著日本時代ê舊地圖，楓仔跤土地公hia ê地名就寫「楓樹坑」，所以阮tsia ê地號名自日本時代就是án-ne。我臆講可能hit當時在地人lóng講台語「楓仔」，hōo人掠準講是「楓樹」；mā有可能以早植物判斷ê錯誤，因為楓仔樹欉khah kuân，葉仔看bē清楚，就hōo人hut m̄-tio̍h--ah。
楓樹坑m̄-nā是一个坑，阮tsia lóng總有三个坑，光（公）華坑、中坑、風尾坑，iáu-koh有一个所在，在地人lóng講hia是「社底」，就是平埔族龜崙社族人蹛ê所在。以早龜山龜崙口是平埔族龜崙社ê社域範圍。清國ê時tsūn，漢人來到龜崙口tsia，一部份龜崙社ê原住民就遷徙來到阮楓樹坑，號做「頂社」，一部份遷徙到tsit-má銘傳大學桃園校區附近，號做「下社」。阮在地人講ê社底，就是leh講頂社hia。
Tsit-má華語寫做「光華坑」ê所在，mā有地圖寫做「公華坑」，台語仝音無仝字，聽講是一位陳光華來tsia開墾，tsiah ē號伊ê名。風尾坑mā有寫做「鳳尾坑」，應當是台語「風」--字走音ê緣故，tsiah hōo人掠做「鳳」--字。Khah奇怪--ê是，中坑kah風尾坑，m̄知影日本時代編電火柱仔ê時tsūn，按怎中坑hia--ê寫「風尾支線」，風尾坑hia--ê寫「中坑支線」，tsit-má中坑已經改做「中坑街」、風尾坑改做「風尾街」，電火柱仔mā是無改，有夠特別！
阮tsia ê地號名真趣味，雖然號做楓樹坑，m̄-koh無野生ê楓樹，tiānn-tiānn有人來揣紅葉仔ê楓樹。阮tsia ài行入去山內底tsiah ē-tàng看著野生大欉ê楓仔，koh有風尾坑路邊有一欉老楓仔，tiānn-tiānn hōo人hut m̄-tio̍h。尤其是hit-tang-tsūn台東池上ê咖啡廣告tshìng--起-來，畫面就是田邊有一欉樹仔ê風景，阮tsit欉樹仔mā hōo人講是「大明星ê樹仔」。M̄-koh，大明星伊本人無來過阮tsia--lah！Tsit欉老楓仔，就是阮楓樹坑家己ê大明星--lah！
1 楓樹，華語ê『楓樹』；楓仔，華語ê『楓香』。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
