白節蛇（『雨傘節』）

作者：易俊宏

圖片來源   https://upload.wikimedia.org/wikipedia/commons/0/01/Bungarus_multicinctus_2.jpg

過去三、四個月，介紹著棕簑猫、黃葉猫、羌仔虎……差不多lóng是ē掠蛇來食ê動物；tsit個月來介紹台灣陸地頂kuân上毒ê蛇類：白節蛇。

  台灣主要ê毒蛇有五種：青竹絲、飯匙銃、山古鱉、龜殼花kap白節蛇。青竹絲是有咬人記錄中ê第一名，但是毒性上kuân--ê是白節蛇。若hōo蛇咬--著，無毒ê蛇是hōo人受傷，有毒ê蛇ē有兩種可能：一種是血流bē停，tsit種毒是「出血毒」，像講山古鱉、龜殼花就是tsit種；另外一種是ē hōo人頭眩目暗，bē講真疼，但是嚴重ê時tsūn就ē昏死，tsit種毒是「神經毒」，白節蛇、飯匙銃就是tsit款。

  一般來講，生活tī陸地ê毒蛇，頭型是三角--ê；但是並m̄是所有三角頭--ê，lóng是毒蛇，因為有一寡無毒--ê，ē趁樣毒蛇 ，hōo其他動物m̄敢kā掠。像講臭青公就kap青竹絲sio-siâng，頭mā是三角--ê。但是有一寡海蛇kap白節蛇ê頭，lóng是圓頭--ê；tsit種誤解，是因為經驗上來講，tn̄g著圓頭ê毒蛇機會khah少。Mā有人認為是因為「出血毒」ê蛇，喙齒khah長、數量khah濟，所以就ē有「毒蛇lóng是三角頭」ê印象。趁tsit個月來介紹「白節蛇」，hōo逐家熟sāi tsit種喙齒khah短、數量khah少ê「神經毒」圓頭毒蛇——白節蛇。

  白節蛇ê身軀，就是一箍烏、一箍白ê色，án-ne烏白sio摻，差不多有30到50箍，特徵tsiânn明顯，自án-ne號名。Mā有人叫in節仔。In主要生活ê所在，是tī-teh水田、溪流附近，食niáu鼠、魚仔、杜定、四跤仔。雖然in ê毒性tsiânn強，但是in ê個性tsiânn pì-sù，若是發現有危險，倒--落iah是bih--起-來，是in主要ê反應。白節蛇主要是tī暗時tsiah ē出來活動，生活範圍是亞洲南部、包括越南、香港、緬甸……對in來講，因為毒性強，是beh自保，主要面對ê威脅，是無所在ē-tàng生活，因為lán人類ê活動，koh有用毒藥去thāu niáu鼠、魚仔，mā ē thāu著白節蛇。

  今年年初，lán台灣ê「保育類動物名單」，白節蛇由「保育類」變成「一般類」。Tse代表保育有成，包括羌仔、果子猫、飯匙銃、龜殼花等等，暫時無即時ê危害。但是tsiânn做lán台灣ê動物，互相尊重，揣著和平相處ê方式，做伙tī tsit塊島嶼頂kuân生活，tsiah是lán人類展現智識kap能力所要緊--ê。

#台灣動物記事 專欄，本文使用教育部推薦漢字kap臺灣閩南語羅馬字拼音方案。

台文通訊BONG報308期，2019年11月出刊。

歡迎捐款贊助　#李江却台語文教基金會　（捐款thang抵稅，匯款了後請通知02-23112199）

線上捐款(定期定額) https://ppt.cc/fF5bhx

線上捐款(單筆) https://ppt.cc/fcycox

郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會

李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。