改變uì教育做起
10月份ê salon講座邀請著政大民族學系主任王雅萍副教授kap lán分享台灣原住民教育ê新發展。王副教授tī演講一開始就用原住民語kā逐家問好，kā現場聽眾教「逐家平安、逐家好」ê阿美族語。歷史系出身ê王副教授，講伊tī大學ê時就有做原住民議題ê研究。研究ê主題是原住民教育。因為在伊來看，街頭運動是一時--ê，uì教育做起，tsiah有才調真正幫贊原住民族群ê發展。Tī過程中參與真濟服務性質社團ê基層khang-khuè，想盡辦法beh來改善體制內底ê各種問題。透過田野調查、社區營造等等ê方式來做研究，mā因為án-ne，熟sāi真濟參與街頭運動ê人。
10年來ê改變
王教授講，以早看探討原住民教育ê論文，內容lóng真sio仝，主要講『隔代教養』kap『中輟率』。Tsit幾冬，因為相關法律通過，開始有寡無仝ê發展。原住民ê教育相關法律比《原住民族基本法》koh-khah代先通過。有法律ê根據了後，一陣有心ê教育者，tī苗栗卓蘭揣所在辦學校，ǹg望進一步推sak原住民教育。
原住民ê教育相關法律齊全了後，開始實行原住民ê實驗教育，台灣各地lóng有依照家己族群語言號名ê學校，目前已經leh運作--ê有15間，未來總數按算有30間。內底有原住民老師、有看重文化特色ê課程。大學mā有原住民學生資源中心，希望透過設立專業單位，來解決學生『中輟』ê問題。
Beh ài有完整ê教育資源，需要政府ê支持，台中市tī市長林佳龍ê支持之下，國校仔ê原住民實驗教育辦了真好。課程ê設計kap日常文化結合，期待學生tuì家己ê族群身份有深入ê認bat。族群身份認bat ê關鍵是語言，所以學校老師開始用母語上課，mā因為課程內容kap in ê生活經驗有thang對應，hōo學生ê成績進步真濟，家長mā tsiah ē-tàng認同文化特色實驗學校ê理念，甚至專工kā囡仔送去讀。因為「刣豬」是原住民生活中真重要ê能力，有學校tī學生beh畢業進前替in辦「tńg大人」ê儀式，查埔囡仔負責刣豬、查某囡仔負責煮食。
原住民ê實驗教育，頭起先真濟原住民並無認同。In感覺政府ê濟濟政策tiānn-tiānn是kā原住民當做實驗對象，無保障in發展ê權益。後--來因為學校ē-tàng家己揀教材，mā ē-tàng規畫特色課程，有相當程度ê自主權，tsiah漸漸受著支持。
2017年，《原住民族語言發展法》通過，hōo原住民族語言、文化ê保留kap推sak koh-khah有行氣。2016年，政府頭一擺正式kā原住民會失禮，而且表示講，關係原住民權益，有幾个ài爭取ê重點：正名運動、母語權、土地正義。相關政策ê改革，mā hōo原住民權益ê進展向前hānn一大步。
2010年ê紐西蘭經驗
2010年，王教授kap一陣原住民老師去紐西蘭看Māori（『毛利』）人ê學校。校長專工安排in蹛tī原住民傳統ê草厝仔，koh逐暗來kap in介紹Māori人ê教育議題。Tī紐西蘭，in實行「雙文化教育」，也就是講，無論你是m̄是Māori人，你lóng ài認bat Māori文化。學校ê老師lóng ài學Māori語kap Māori文化。
問答交流時間
有聽眾問王教授講，「Tsit-má真濟原住民老師，mā lóng bē-hiáu家己ê母語--ah，án-ne beh按怎？」王教授講，上重要--ê，iáu是家己ài有身份認同ê自覺，án-ne伊tsiah有可能重視母語。
Koh有聽眾問王教授，「若反倒tńg來看台語ê發展，有啥mih想法？」王教授講，以早拄開始連beh推sak成立「台語系」就真食力，tsit-tsūn有法律支持koh有台語電視台，應該tuì發展真有幫贊。聽眾suà--落-來講--著，tī學校教育內底，傳統文化愈來愈失--去，王教授kap逐家分享『華德福（Waldorf）』教育理念，kā生活、文化ê內容澈底用教學行動來實踐。
講座上尾，一位tng-leh實踐「全台語家庭」ê媽媽，分享伊想beh「辦全台語學校」ê困境。王教授講，紐西蘭拄開始beh辦Māori人學校ê時，mā無人敢去讀，校長代先kā家己ê兩个囝lóng tshuā入去讀，tsiah有thang成立學校。王教授認為，自覺kap意志，是逐个族群發展ê關鍵。
（本文是2019年10月初2 ê講座摘要記錄，主講者王雅萍是政大民族學系副教授兼系主任。）
#台語sa攏有講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報308期，2019年11月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
